[AMBIENT]

“Basta violentare la Val del Lago”: l’ultime denuncie dal “Comitato tutela acque del bacino montano del Tagliamento” e je intitulade cussì e, in 4 paginis plenis di dâts e d’informazions, e documente i efiets ch’e varès «la costruzione e l’esercizio nell’area della propria stazione di pompaggio di Somplago di Cavazzo Carnico di due generatori termoelettrici per la produzione di energia elettrica e di calore da fonti fossili». La domande di autorizazion par fâ sù chel implant le à presentade in Regjon la “Società Italiana per l’Oleodotto Transalpino” (“Siot”). Seont il Comitât, i generatôrs progetâts a causionaressin: consum di metan, emissions di gâs e di fum tossic e emission di polvars.

[LIBRIS]

Si moltiplichin lis iniziativis noviolentis par fermâ la vuere de Ucraine. Fra di lôr, al jentre il proget “#abbraccioperlapace”, presentât di “Vita.it” e compagnât cuntun libri, ch’al fronte la cuistion de pâs urint de risultive de grande letarature russe. L’opare “Letture per la pace” e pues jessi discjamade sore nuie da la rêt des rêts.

[SCUELE]

A son viertis lis inscrizions ai cors de Universitât dai Moviments sociâi par une transizion ecologiche e sociâl, ch’e je logade a Mönchengladbach, sù pes Gjermaniis, cul prudêl di “Attac” Gjermanie, de Fondazion Rosa Luxemburg e dal sindicât dai insegnants “Gew”. Lis ativitâts didatichis a laran indevant dai 17 ai 22 di Avost, cun sambleis voltadis sul moment par anglês, francês e todesc.

[AMBIENT]

Cemût mai che l’energie idroeletriche, ch’e sarès la plui preciose e la plui nete, e je deventade un mieç di sfrutament indiscriminât dal teritori alpin e dai siei abitants? A di cheste cuistion i da une rispueste il servizi “Energie che fanno male ai territori” che Mario Agostinelli e Ezio Roppolo a àn publicât tal lûc internet “Comune.info” la dì de Zornade mondiâl de aghe. Il scandai al tamese i presits des boletis e i profits dai produtôrs e dai distributôrs.

[CINE]

Il cine “Sociale” di Glemone al onore il strissinadôr noviolent dai neris merecans, Martin Luther King (15 di Genâr dal 1929- 4 di Avrîl dal 1968), cun 3 seradis dedicadis a la proiezion dal documentari “Martin Luther King vs Fbi”. L’opare di Sam Pollard e sarà proponude a 18.45 di lunis ai 4 di Avrîl, di martars 5 e di vinars 8.

[LIBRIS]

Martars ai 5 di Avrîl, la clape culturâl “el Tomât” e presente, a Vile di Buje, il libri “Storia del Friuli e dei Friulani” di Walter Tomada. La presentazion e tacarà a 20.30 li dal Centri “Meneute”. Cul autôr, e dialogarà Silva Ganzitti.

[INFORMAZION]

Il periodic “Lo Scatolino”, ch’al salte fûr ogni 3 mês, par cure de aziende “Scatolificio udinese”, al invide ducj i scritôrs interessâts a lis cuistions sociâls a publicâ i siei articui su la riviste. Al autôr i vegnaran spedidis 10 copiis a gratis.

[AMBIENT]

«No podìn sopuartâ l’imposizion di cheste opare tant danose pal teritori, inutil e çonte fûr anacronistiche»: mots di cheste persuasion, ancje la zoventût di “Fridays For Future Carnia” a son daûr a oponisi cuintri dal progjet “Siot”, ch’al smire di fâ sù une centrâl a metan par alimentâ la stazion dal “Oleodot transalpin” di Somplât. Promovi l’ûs dai combustibii fossii, tal mieç de crise ecologjiche e de crise geopolitiche, seont la zoventût cjargnele, e je une vere matetât che si pues fâi cuintri cul imprest dal “Mailbombing”. La mobilitazion informatiche e je proferide tal leam: https://actionnetwork.org/letters/fermiamo-la-centrale-a-gas-di-somplago?source=direct_link&.

[SALÛT]

Ai 7 di Avrîl, e cole la “Zornade di mobilitazion cuintri dal cumierç te salût”. Il Comitât “Stop TTIP” al intint di fâ la sô part, inmaneant doi apontaments par domandâur al Parlament europeu e a l’Organizazion dal cumierç la sospension dai brevets sui vacins. Li dal ambient “La Birreria sociale” di Udin (viâl Vât, 64/66), joibe a 20 si discorarà su “Nessun profitto sulla Salute. Vaccini diritto universale per tutti”, cun Mario Canciani di “Isde Medici per l’Ambiente” e cun Michele Negro dal “Coordinamentosalutefvg” (pal colegament “on line”: meet.google.com/jbb-kkch-krj). Il secont apontament al è stabilît lunis ai 11 di Avrîl, a 18.30, cuanche si resonarà su “Sanità pubblica in Friuli-V. G., un bene comune da difendere e riqualificare” (meet.google.com/hhm-cqwb-bdn).

[LIBRIS]

Moreno Baccichet, Alex Cittadella e i students de Clas III BG dal Institût “Il Tagliamento”, joibe ai 7 di Avrîl, si confrontin su “Uomini e paesaggi nell’Alta Val Meduna”. Il titul de convigne, ch’e tacarà “on line” a 20.30, al è chel istès dal libri che Baccichet i à dedicât a “L’ultimo taglio dei Boschi” tal cjanâl di Tramonç. La serade e jentre te schirie di apontaments “i libri delle Agane”, inmaneât dal Ecomuseu “Lis Aganis”. Si scuen dâsi in note tal lûc internet de instituzion culturâl (sezion “Eventi”).