[ECONOMIE]

La “Scuola delle Cooperative di Comunità”, cul jutori di “Aiccon”, e à promovût la redazion di un scandai par tamesâ lis esperiencis talianis svilupadis in gracie dal ativisim des Comunitâts. Il studi “Economie di luogo: fotografia e dimensioni qualitative delle cooperative di comunità” al è disponibil su la rêt des rêts. Ai 30 di Jugn dal 2021, a risultavin ativis 188 Cooperativis di Comunitât. Il 44% al operave come cooperative di produzion e di lavôr; il 20% come cooperative sociâl. I setôrs d’intervent plui preferîts a jerin il turisim (60%), la protezion dal ambient (47%) e l’agricolture (38%).

[LIBRIS]

La schirie di convignis “Bibioteca d’autore”, vinars ai 4 di Març, e organize la presentazion dal libri di Gianni Colledani “Sliperârs. Sulle tracce dei segantini della Val Tramontina”. A 18, li di palaç Tadea di Spilimberc, al presentarà Dani Pagnucco.

[SOCIETÂT]

Si rinove l’Osservatori cuintri de mafie de Regjon Friûl-V. J. Il Consei regjonâl e à sielzût l’avocade Barbara Clama par dâi la volte a Monica Catalfamo. Dai 22 di Fevrâr, duncje, cul president Michele Penta, a colaborin Ruggero Buciol, Lorenzo Pillinini, Enrico Sbriglia e Barbara Clama.

[CONVIGNIS]

Ai 18 e ai 19 di Març, e torne la convigne di Rovigo su lis “Areis rurâls fragils”. Chest an, e vegnarà frontade, “on line” su “Zoom”, la cuistion: “Empatia Agrosilvopastorale nelle aree rurali fragili”. Si pues dâsi in note tal modul https://www.eventbrite.it/e/biglietti-empatia-agrosilvopastorale-in-aree-rurali-fragili-267802252747.

[ECONOMIE]

Sabide ai 5 di Març, si scree a Udin la panatarìe di Comunitât “Pan dal Des”, impastanade de Cooperative dal Distret di Economie solidarie “Friûl di Mieç”. La ceremonie e je stabilide a 11, li dal ambient di strade Ermes di Colloredo 19. Il Proget “Pan e Farine dal Friûl di Mieç” al è nassût dal 2015, inspirât des iniziativis pe valorizazion dai Bens coletîfs di San Marc.

[MOSTRIS]

E torne pe diesime seste volte la manifestazion “Tolmezzo Città Stenopeica”, ch’e celebre il “Pinhole Day”, la zornade internazionâl de fotografie Stenopeiche. La pluipart dai apontaments a colaran tal mês di Avrîl, ma si tache ai 5 di Març, cu la scree des mostris di Vincenzo Marzocchini e di Marko Vogric, li di palaç Frisacco, a 17. L’esposizion e restarà vierte fintremai ai 31 di Març. Oraris: lunis-sabide, 10.30-12.30 / 15-17.30; domenie, 14-18. Al organize il Circul culturâl fotografic cjargnel.

[POLITICHE]

Al cole tal mieç de vuere de Ucraine l’apontament dal mês di Març cuintri des armis e cuintri des sclavitâts militârs dal Comitât “No Amx Pâs”. I pacifiscj si daran dongje a 14 di sabide ai 5 di Març, devant dal aeropuart militâr di Rivolt, continuant une proteste noviolente ch’e je començade dal 1993 e che d’in chê volte no je mai altri stade fermade.

[POLITICHE]

Sabide ai 5 di Març, a 10.30 li de Cjase dal Cumon, si da dongje un consei comunâl strasordenari di Çurçuvint par discori e par aprovâ une instance di ricognossiment de sô aghe come “aghe di cualitât” (“acqua di pregio”). Cun chê decision, la Comunitât – ch’e je invidade a cjapâ part a la riunion – e intint di ribati la volontât di continuâ a guviernâ la sô aghe e il Servizi idric integrât, menaçât di escomi des riformis statâls e regjonâls cuintri de decision popolâr dai Referendum dal 2011 (www.acquabenecomune.org).

[LIBRIS]

Fra lis tantis campagnis di mobilitazion a pro dal popul tibiât de Ucraine e cuintri de vuere, e figure ancje chê di “Vita” (#abbraccioperlapace). Chê azion positive di pacificazion, ch’e je sugjeride, e pues jessi tignude sù di un “Libri de pâs par animâ i dialics pe pâs”. L’antologjie noviolente, cuntune cuvierte di Gianluca Costantini, e pues jessi discjamade sore nuie de rêt des rêts.

[MOSTRIS]

Dai 6 ai 27 di Març, li di vile Frova di Stevenà di Cjanive, si podarà rimirâ la mostre fotografiche di Paola Feltrin “Donne… Il viaggio di una vita”. L’esposizion e sarà screade dal critic Marco Dabbà, domenie ai 6 di Març, a 11. Oraris: sabide, 15-19; domenie, 10-12 / 15-19. Vie pe setemane, si pues prenotâ lis visitis, telefonant al numar 0434 797492.