[INFORMAZION]

Joibe ai 2 di Decembar, “Le interviste di InfoHandicap” a saran dedicadis a l’Economie solidarie. A 17, su la pagjine “FaceBook” di InfoHandicap, si resonarà su “Beni Comuni: un Diritto di Tutti, un Dovere per Tutti”. Une riflession speciâl e sarà dedicade su l’aplicazion de leç regjonâl 4/2017 “Norme per la valorizzazione e la promozione dell’economia solidale”.

[MOSTRIS]

La storie furlane fra 1960 e 1980, cu l’instituzion de Regjon Friûl-V. J. e la fondazion de Universitât dal Friûl, cu lis contestazions, lis manifestazion popolârs e la rivoluzion urbanistiche, e vegnarà contade fintremai ai 9 di Genâr de mostre “Fotografia come testimonianza. Friuli 1960-1980”, par cure di “Irpac”. L’esposizion e je imbastide li de glesie udinese di San Francesc. Oraris: martars-vinars, 16-19; sabide e domenie, 11-19.

[CINE]

Il “Biglietto d’Oro” de “Anec” (“Associazione nazionale esercenti cinema”), te categorie “Multisala - Città da 50 a 100 mila abitanti”, chest an, lu à cjapât il “Visionario” di Udin. La premiazion e je stade fate a Salerno, intant des “Giornate Professionali di Cinema”. Il cine udinês “Visionario” al è stât screât vie pal 2004, dal “Cec” e dal Cumon. In zornade di vuê, al à 5 salis, dutis rinovadis e tressadis cui proietôrs “4K” e cul sistem “surround” pal audio.

[DIASPORE]

Vinars ai 3 di Decembar, si presente a Buje (a 20.30, li dal Centri Meneute di Vile), il docufilm e il libri “Leo su Leo: un poeta (si) racconta” di Stefano Lizier, cui dissens di Emanuele Bertossi e cu lis fotografiis di Ulderica Da Pozzo e di Paolo Medeossi. Si racomande la prenotazion (333 4630836).

[ECONOMIE]

Su la rêt des rêts, si pues firmâ il “Mountain Education and Innovation Manifesto” (“Meim”), il manifest pe promozion dal svilup sostignibil des monts. A puedin aderî ents publics e privâts, impegnâts te valorizazion dai teritoris di mont.

[ECONOMIE]

In gracie di un emendament dal belanç regjonâl, al sarà possibil inmaneâ lis Comunitâts da l’Economie solidarie previodudis de leç 4/2017, superant l’abolizion des “Uti”. Votant la propueste dal grop dal “Patto per l’autonomia”, il Consei al à stabilît che il teritori des Comunitâts da l’Economie solidarie al à di coincidi cun chel dai Ambits teritoriâi pe gestion associade dal Servizi sociâl dai Cumons.

[POLITICHE]

A son passe mil e 300 i furlans ch’a domandin: “Ridiamo acqua al Tagliamento” e ch’a spietin de politiche regjonâl l’instituzion des “Zornadas dal Tajament/Giornate del Tagliamento/Die Tage des Tagliamento Flusses/Dnevi reke Tagliamento”. La lôr petizion e je stade consegnade in Consei regjonâl, ai 16 di December, presints il president Pier Mauro Zanin e i conseîrs Luca Boschetti, Massimo Moretuzzo, Christian Sergo e Furio Honsell. L’iniziative e je stade presentade di Franceschino Barazzutti, in dite di ducj i Comitâts popolârs che le àn prudelade.

[MOSTRIS]

Sul cjiscjel di Udin, si podarà visitâ, fintremai ai 30 di Avrîl dal 2022, la mostre “Marcello D’Olivo. Architetto del mondo in Friul-V. G.”, ch’e onore l’artist tal centenari de sô nassion (www.friul.net/dizionario_biografico/index.php).

[CULTURE]

Il “Lunari 2022”, chest an, al è dedicât ai 20 agn di ativitât dal “Ecomuseu des Aghis” dal Glemonat. La presentazion e je stabilide joibe ai 23 di Decembar, a 17.30 li de glesie di San Micjêl di Glemone (acès cun “green pass”). Te publicazion, si presente ancje la “Rêt des Latariis” e la sô “Carta dei princìpi”, cu lis fotos di Graziano Soravito.

[DIASPORE]

Lunis ai 27 di Decembar, li de Sale Corgnali de Biblioteche udinese “Vincenzo Joppi”, si presente a 18 il libri “Friûlout” di Massimo De Liva. Al intervegnerà il zornalist Maurizio Cescon. La vore e fronte la Diaspore furlane fra 1946 e 2021. De Liva al à za publicât ancje il volum “Friuleconomy”, une storie economiche dal Friûl fra 1946 e 2014.