[CONVIGNIS]

Ai 5 e ai 6 di Novembar, e tire adilunc la memorie di Pieri Pauli Pasolini, dai dîs che si ricuarde la sô muart. Il Centri studi di Cjasarse al onore il paisan-poet cu la convigne “Con te, contro di te, il Gramsci di Pasolini” sul rapuart fra la sô opare e il pinsîr di Antonio Gramsci. Li dal municipi, il dibatiment al larà indevant vinars di 15.30 a 19 e sabide di 9 a 13 (“green pass” obligatori).

[ART]

La clape cjargnele dai “Amici dei Musei e dell’Arte”, sabide ai 6 di Novembar, e presente a Paluce il ristaur de statue di len di un sant vescul, patrimoni de glesie di Cjasteons. L’opare e sarà inlustrade a 15, li de glesie di San Jacum, dulà ch’a intervegnaran Marina Di Ronco, pre’ Tarcisio Puntel, Giuseppina Perusini, Giulio Del Bon e Francesco Candoni. Si scuen prenotâsi (333 9032145 - 320 4032670).

[POLITICHE]

Sabide ai 6 di Novembar, e torne la manifestazion noviolente “No Amx (no avions di vuere”, a 14 devant dal aeropuart militâr di Rivolt. L’organizazion e je curade dal Comitât “No Amx Pâs”, ch’al opere cuintri dal incuinament ambientâl, politic e sociâl des “Frecis tricolôrs” e dal militarisim leât parie dal 1993.

[MOSTRIS]

I Museus civics a proponin sul cjiscjel di Udin, insin ai 28 di Novembar, la mostre: “Cjargne Carnia 1960-1975. Fotografie di Giovanni Edoardo Nogaro”.

[CONVIGNIS]

La sclavitût a esist ancje in zornade di vuê e ancje tes campagnis nostranis: e je la cuistion che si fronte vinars ai 5 di Novembar, a Pordenon, intant de convigne “Schiavi nei campi. Il fenomeno dello sfruttamento in agricoltura in provincia di Pordenone e in Italia”. Il dibatiment, inmaneât di “Nuovi Vicini”, di “Sipla Centronord”, di “Arci”, di “Consorzio Communitas” e de Caritas diocesane di Concuardie, al tacarà a 20.30, li de “Casa Madonna Pellegrina”. Intervents di Marco Omizzolo di “Eurispes” e di Alessandro Armando, coordenadôr dal proget “Sipla Centro Nord”.

[MUSICHE]

Il spetacul “Purgatorio”, programât a Udin vinars ai 5 di Novembar, al smire di puartâ i spetadôrs da la cuintrimusiche dal Infier a l’armonie polifoniche dal Paradîs. La rapresentazion di Arianna Plazzotta e sarà interpretade di Stefano Rizzardi, vôs narant, e de “Schola aquileiensis” (ch’e proponarà “In exitu Israël de Ægypto”, lis Beatitudinis, “Salve Regina”, “Veni sponsa de Libano” e musichis cividalinis). L’apontament al è stabilît a 18.30, li dal Ospedâl di Sant Svualt, tai spazis de “Comunità Nove” (prenotazion obligatorie).