[AMBIENT]

Ai 2 e ai 3 di Setembar, esperts, ativiscj natîfs e int di sintiment di ogni fate si dan dongje di persone e “on line”, a Marsilie, pe cuintri-convigne “Our Land, Our Nature”, dulà che si presentarà une vision alternative pe conservazion de nature, che no sedi un “truc” prepotent par distrugi o par sfrutâ la nature, usurpant la tiere dai popui natîfs. La discussion e contestarà il “World Conservation Congress” de “International Union for Conservation of Nature”. Par dâsi in note si pues doprâ il lûc internet: https://it.ourlandournature.org/online-event. Vinars ai 3 di Setembar, e je programade une proteste virtuâl par sensibiliâ l’opinion publiche mondiâl.

[MOSTRIS]

Di chê strade dal “Timp dal Creât”, che lis Glesiis di dut il mont a dedichin dal I di Setembar ai 4 di Otubar a la preiere e la riflession su la curie dal Marimont e sui slaifs necessaris par fâi cuintri a la crise climatiche, in Cjargne, e ven esponude la mostre “Agenda 2030. Etiopia un Paese in cammino”, ch’e jude a rifleti sul «Berli dai puars e il berli de Tiere” e su l’“Ecologjie integrâl”, ch’e cjacare l’Encicliche “Laudato si’”. L’esposizion, par cure dal Ufici missionari udinês e de Fraterne dal Spirtussant, e je imbastide fintremai ai 3 di Otubar, li de capele ecumeniche de “Polse di Côugnes”, daprûf de plêf di San Pieri.

[MOSTRIS]

L’artist udinês Claudio Mario Feruglio al torne a presentâ lis sôs oparis li de badie di Sante Marie in Silvis, a Siest. La mostre “In scolte. Oparis sieltis” e je stade screade ai 4 di Setembar e a restarà imbastide fintremai ai 5 di Otubar. Oraris: vinasrs, 15-18; sabide e domenie, 9-12 / 15-18. Par apontaments: 0434 693911.

[CULTURE]

Dai 7 di Setembar ai 17 di Otubar, la “Cortine di fier”, ch’e à spartît l’Europe intant de “Vuere frede”, e cjape sù un’inficje positive e a devente un’oportunitât d’incrôs e di confront, in gracie de rassegne “Ikarus - Green Belt Festival”. L’iniziative e cjaparà dentri cu lis sôs propuestis culturâls, artistichis e naturalistichis lis Valadis dal Nadison e de Tor, il Cjanâl dal Fier e la Val Racolane e il Cuei.

[LIBRIS]

Il scritôr Fawad e Raufi, miercus ai 8 di Setembar, al presente a Felet, li de sale “Egidio Feruglio” dal municipi, il so libri “Ultimi respiri a Kabul. Tra la neve bianca e i lupi neri” (“Zel Edizioni”, 2021). A 20.30, si confrontarà cun lui Dario Tedesco. L’opare e conte la vuere dal Afghanistan. I organizadôrs a consein di dâsi in note telefonant (0432 577395; di lunis a vinars, 16-19).

[LIBRIS]

Miercus ai 8 di Setembar, si presente a Udin, li de “Sale Ajace” dal municipi, il libri “Valori e simboli. Un tour dei monumenti commemorativi a Udine” di Simonetta Daffarra. La convigne, te suage dai “Dialics li de Biblioteche”, e tacarà a 17.30, dulà che l’autore e dialogarà cun Mariaelena Porzio. Il libri al propon i esits di un lavoratori didatic proponût li dal Liceu Marinelli, cun 70 students.

[ART]

Ai 10 e ai 11 di Setembar, a colin i ultins doi apontaments de rassegne di art contemporani “Passo a walk on tho wild side”, inmaneade tal cjanâl di Tramonç. Vinars si presente a 20 te place di Tramonç Disot il libri di Eva Grieco “Danze per bestie selvatiche. I artiscj de valade a intervistaran l’autore. Sabide ai 11 di Setembar, Azzurra D’Agostino e propon il lavoratori di scriture poetiche “Autobiografia poetica del paesaggio”.

[GLESIE FURLANE]

Dai 23 di Setembar ai 2 di Otubar, la “Libreria Editrice Vaticana” e presente a Gurize, Pordenon, Udin e Triest la XV edizion “Ascoltare, Leggere, Crescere”, rassegne di convignis cu l’editorie religjose. L’anteprime e je colade ai 10 di Setembar, cuntune riflession su “La sfida educativa in tempo di pandemia”, proponude dal retôr maiôr dai Salesians, pre’ Angel Fernandez Artime.

[AMBIENT]

Li dal “Curtîl di Firmine”, a Cividât, sabide ai 11 di Setembar, si resone su “Oltre 30 anni di abusi amministrativi ed ambientali in provincia di Udine”. Marino Visintini dal Comitât pe protezion dal teritori di Premariâs e di Cividât e puartevôs dal “Osservatori civic cuintri lis inlegalitâts” dal Friûl e di Triest al intervegnarà cjacarant su “Una lotta tra ostacoli, isolamento e intimidazioni”. L’iniziative e tacarà a 18.

[POLITICHE]

E tire adilunc la mobilitazion par memoreâ il X innovâl dai Referendums popolârs pe “Aghe Ben comun”. Lunis ai 14 di Jugn, il “Forum dai Bens comuns e da l’Economie solidarie” e il Moviment regjonâl pe aghe publiche a organizin un “webinar” su “Aghe, Nucleâr e Bens comuns no si torne indaûr”. A 20.30, si confrontaran Tiziana Cimolino, Marco Iob e Dario Predonzan. Il dibatiment al sarà transmetût su la pagjine “Facebook” dal Forum dai Bens comuns. Si pues ancje prenotâsi par pueste eletroniche.