[NAZIONS]

“I popui natîfs e l’apel par un contrat sociâl gnûf”: chel chi al è il titul di chest an de “Zornade internazionâl dai popui autoctons”, ch’e cole ai 9 di Avost. Cheste zornade e je stade inmaneade par che ducj a pretindin l’inclusion, la partecipazion e il ricognossiment dai popui natîfs te realizazion di un sistem mondiâl là i vantaçs sociâi e chei economics a sedin spartîts fra ducj, cence lassâ fûr nissun.

[POLITICHE]

Lunis ai 9 di Avost, devant dal aeropuart merecan di Davian, i pacifiscj furlans a organizin un “sit in” in memorie di Hiroshima e di Nagasaki e cuintri di dutis lis armis nucleârs (comprendudis chês logadis li de “Base Usaf” nostrane). La manifestazion e tacarà a 10, come ogni an. La riflession e frontarà ancje la cuistion “Covid e armaments”. Fra i promotôrs: “Beati i costruttori di pace”, “Centro E. Balducci”, “Emergency”, “Anpi”, “Bilanci di giustizia”, “Rete DASI”.

[ECONOMIE]

Lis sgrifis des mafiis a van dilunc a rafâ ancje passons e malghis. Lis denunciis di Giuseppe Antoci, che vie pal 2019 al à publicât il libri “La mafia dei pascoli” par palesâ la situazion siciliane, a son confermadis in plen te opare di Giannadrea Mencini, “Pascoli di carta”, ch’e scrutine la situazion taliane d’insom fin dapît, distaponant ancje il fraidessum ch’al impeste lis monts de Furlanie e dal Cjadovri. Su la cuistion, si à resonât ai 7 di Avost a For Disot, par cure de Biblioteche, ch’e à invidât Mencini e l’arlevadore Verdiana Morandi di “Rete Appia”, arlevadore venite ch’e lavore in Cjargne e te Val di Resie. Tal scandul, a jentrin Regjon e Cumons, Sindicâts dai agricultôrs e grancj arlevadôrs de Basse, biel che miârs e miârs di euros des contribuzions europeanis a finissin tes sachetis di speculadôrs disonescj ch’a son daûr a finî di sassinâ l’Alpiculture nostrane.

[AMBIENT]

“Legambiente” e torne a pandi la sô contrarietât al proget di “A2A”, ch’e intint di convertî a gâs la centrâl a cjarvon di Monfalcon. Il “Flash mob” ecologist al è stabilît a 11 di lunis ai 9 di Avost, li dal puart “Nazario Sauro” dilunc dal viâl Oscar Cosulich, par cure dal Circul dal Teritori.

[POLITICHE]

Ise imparziâl une Ministrazion publiche ch’e organize i siei concors par cjapâ sù personâl intal puest geografichementri plui ecentric dal so teritori? E je la cuistion proponude dal zornalist Claudio Carlisi, daspò che la Regjon Friûl-V. J. e à convocât li dal stadion “Nereo Rocco” di Triest i 736 concorints ch’a àn cjapât part a la selezion par 9 indotorâts tecnics e par 15 deplomâts dal profîl ministratîf e economic. «A meno che – al comente Carlisi – la scelta sia stata fatta apposta per scoraggiare la partecipazione di chi viene da fuori Trieste e favorire chi ci abita. Sarebbe interessante conoscere la provenienza dei partecipanti».

[POLITICHE]

Il grop politic “European Free Alliance”, dutun cul “Patto per l’Autonomia”, dai 27 ai 29 di Avost, al organize la convigne internazionâl “Zovins, Europe, Autonomiis”. A Vençon, si podarà confrontâsi su Federalisim e autonomiis te Europe dal dì di vuê, su Regjons e citâts viers dal 2050, su la cooperazion transconfinarie, sun esperiencis dai teritoris, sul Autonomisim e sul avignî energetic. Par informazions: 342 1633878.

[CORS]

A restin viertis fintremai ai 31 di Avost lis inscrizions pal Cors di formazion su l’Ecologie integrâl, inmaneât di “Focsiv”, di “Caritas Italia” e di “Fondazione Lanza”. Ancje l’aleance “Asvis” e colabore tal proget formatîf. La schede par dâsi in note si cjate a la direzion: https://forms.gle/Pmxpo2mCoA3hNX8E7.

[AMBIENT]

Un privât al smire di fâ indaûr une centrâl idroeletriche su lis aghis de Patrie, ma cheste volte al intint di realizâle te “Foreste regjonâl dal Prescudin”, condut ch’e je stade declarade “aree wilderness” (nature salvadie) pal studi sperimentâl e de biodiversitât. Il “Comitât Valceline”, tal comunicât dulà ch’al denuncie il proget e dulà ch’al pant di vê protestât cul Cumon di Barcis e cui uficis regjonâi ch’a àn autorizât l’opare, al conteste massimementri il fat che te documentazion e mancje la valutazion dal propietari dal Ben menaçât, al ven a stâi la Regjon Friûl-V. J. Il document dal Comitât al pues jessi let fûr par fûr tal lûc internet “Non solo Carnia”.

[MOSTRIS]

A Palai en Bersntol, tal cjanâl trentin dai Mochens, l’Institût culturâl “Bersntoler Kulturinstitut” al propon la mostre “Durchs Bersntolerische/Attraverso la lingua mòchena Klòffen, Sprechen, Parlare”. Vie pal mês di Avost, si podarà visitâle ducj i dîs de setemane (10-12.30 / 14-16); tai mês di Setembar e di Otubar, di lunis fin vinars (10-12 / 14-16).

[CINE]

E larà indevant fintremai ai 22 di Avost la XIII edizion de rassegne amor pes Alps Juliis “Kugy Mountain Film Festival”, inmaneade de clape culturâl “L’Età dell’Acquario”. Lis proiezions di cheta an a saran proponudis a Tarvis, a Malburghet e a Cjamparòs. La zornade di vinars ai 20 di Avost e sarà dedicade a Giacomo Ceconi, Giusto Gervasutti e Vittorio Podrecca (a 17, li de Vicìnie di Cjamparòs). Domenie ai 22 di Avost, la riflession e fronte la cuistion dal ambient e de sostenibilitât cul apontament “Governance”, a 10, e cu la propueste di “Proteste e Proposte”, a 15, midiant dai cines “Now” e “Domani” (Vicìnie di Cjamparòs).