[ECONOMIE]

“Forum pai Bens comuns e l’Economie solidarie”, “Società dei Territorialisti” e “Associazione per la Decrescita”, lunis ai 5 di Lui, a organizin un ’seminari “on line” par discori su “La giusta misura delle Comunità solidali territoriali”. Daspò di une relazion de geografe Nadia Carestiato, a proponaran lis sôs riflessions Alberto Budoni, Sergio De La Pierre, Elena D’Orlando, Anna Marson, Massimo Moretuzzo e Alberto Ziparo. Il dibatiment al tacarà a 18, su la plateforme “Zoom” (https://us02web.zoom.us/j/85803634456).

[MOSTRIS]

La mostre su la crise ecologiche “ClimArte 2021”, inmaneade dai zovins cjargnei di “Fridays For Future”, e restarà imbastide dai 10 ai 31 di Lui li di palaç Frisacco di Tumieç. L’orari pes visitis al sarà: 10-12.30 / 15.30-19. Fin in chê volte, e je za previodude une visite virtuâl, a la direzion: https://www.artsteps.com/view/60d395576db63138c444d891.

[POLITICHE]

Dai 3 di Lui, ogni sabide di 18 a 19, il Comitât “No Amx” al tornarà a manifestâ devant dal aeropuart militâr di Rivolt. Lis sclavitûts militârs, tal Friûl di Mieç, a son deventadis ancjemò plui pesandis, periculosis e cjaris (un avion des Frecis tricolôrs al coste 5 mil euros par ore di svual) di cuanche il “51esimo Stormo” al è rivât chenti di Istrana.

[MOSTRIS]

Sabide ai 3 di Lui, il “Craf” al scree dôs mostris fotografichis gnovis. A misdì, li de glesie di San Laurinç di San Vît dal Tiliment si vierç l’esposizion “Memoria e identità. Italo Michieli 1907-1976”, ch’e restarà viertre fintremai ai 5 di Setembar (sabide-domenie, 10-12/17-21). A 17, li di vile Savorgnan di Lestans, e sarà inaugurade la mostre “Memoria e identità. L’archivio fotografico Segale” (fintremai ai 29 di Avost; sabide-domenie,10-13/16-19). Par prenotâ un puest: segreteria@craf-fvg.it.

[SPORT]

Par cure de societât “La Nuova Atletica dal Friuli”, sabide ai 3 di Lui, si fasarà li da stadion “Teghil” di Lignan il XXXII “meeting” internazionâl di atletiche “Sport Solidarietà”. Campions olimpics e mondiâl a saran in gare cun zovins di biele vignude, “master” e atletiscj cun disabilitâts.

[MOSTRIS]

Il Museu archeologic di Cividât al cjape part a la Gnot europeane dai Museus (#nottedeimusei2021), restant viert, di 20 a 23, sabide ai 3 di Lui. A 20.30, si podarà fâ une visite guidade a la colezion langobarde. Lis visitis a varan di jessi prenotadis (0432 700700).

[ECONOMIE]

L’Universitât furlane e à screât che nol è trop il “Portale del Riuso”: al è un sistem par ufrîur sore nuie a ents publics, scuelis e organizazions di volontariât imprescj eletronics e bens che no dopre plui. Il proget al è stât inmaneât dal Dipariment “Lingue e Letterature, Comunicazione, Formazione e Società”, cul jutori de Aree “Servizi Informatici e Multimediali”. Il magazen al è logât te strade des Siencis 201C, ai Riçs di Udin.

[MOSTRIS]

E restarà vierte fintremai ai 12 di Setembar, sul cjiscjel di Udin, la mostre “Zuan da Udene Furlano. Giovanni da Udine tra Raffaello e Michelangelo”. Si jentre a grops numerâts ogni mieze ore, daûr prenotazion telefoniche (0432 1272591).

[POLITICHE]

Dal I di Lui ai 31 di Decembar, pe seconde volte, i tocje a la Slovenie il compit di diregi il Consei de Union europeane, parie cun Gjermanie e Portugal.

[ECONOMIE]

E je partide l’organizazion dal “Festival dal Svilup sustignibil” dal 2021 e si pues za proferî lis iniziativis locâls ch’a saran acetadis tal program, curât de Aleance pal svilup sustignibil “Asvis”. La rassegne e larà indevant par 17 dîs, dai 28 di Setembar ai 14 di Otubar, une zornade par ognidun dai 17 obietîfs/“Goals” de Agjende 2030 des Nazions unidis.