[CONVIGNIS]

Lunis ai 3 di Mai, Universitât e Institût pe storie dal Moviment di liberazion a proponin une convigne “on line” su “La cuistion de punizion dai criminâi di vuere talians: politiche, justizie, memorie publiche”. Reladôr al sarà il professôr Filippo Focardi de Universitât di Padue. La lezion e tacarà a 16.30 (https://teams.microsoft.com/l/meetup-join/19%3ameeting_MGQ1MGQzNWQtZTU4YS00NmI0LWJmNmYtODhkZmEyMGIwMjhj%40thread.v2/0?context=%7b%22Tid%22%3a%226e6ade15-296c-4224-ac58-1c8ec2fd53a8%22%2c%22Oid%22%3a%221a009bcc-b761-4b88-9913-3d9463190570%22%7d).

[TEATRI]

L’esperience teatrâl “Città inquieta”, ch’e propon des spassizadis ator par Udin cun celulâr e auricolâr e des seradis in cjase par cognossi, in 39 stanziis, la capitâl dal Friûl, e sarà proponude fintremai ai 31 di Mai, par cure di Rita Maffei cui citadins dal grop di “Teatro partecipato”. Si compre il biljet li dal Teatri “Palamostre”, tal plaçâl Paolo Diacono di Udin, di lunis fin sabide, 17.30-19.30.

[CORS]

A restin viertis fint ai 5 di Mai lis inscrizions pal cors pratic di autoproduzion di detersîfs, inmaneât pai socis dal Circul “Livence-Tiliment” dal Moviment pe legre diminuzion. La lezion e je programade sabide ai 8 di Mai, a 15.30, li de abitance di strade Udin 118, a Puart Vieli di Puart, par cure di Tamara Marchese. Prin dal cors si podarà ancje associâsi.

[MOSTRIS]

E restarà vierte fintremai ai 30 di Mai la mostre fotografiche “Home” di Yann Arthus Bertrand, imbastide dal “Craf” li di palaç Tadea di Spilimberc. Oraris: lunis-vinars, 15-19; sabide e domenie, 10.30-12.30/15-19. Si consee di prenotâsi par pueste eletroniche o par telefon (0427 91453, di lunis fin vinars, 8.30-12/14.30-18).

[POLITICHE]

Miercus ai 5 di Mai, la clape udinese dai ex depuartâts “Aned” e fâs memorie de liberazion dal “Lager” nazist di Mauthausen, dulà ch’a forin impresonâts 196 furlans de provincie. La ceremonie e tacarà a 17.40, li dal monument di viâl de Vitorie, a Udin. A 18, l’atore Valentina Rivelli e learà bocons di tescj di Gianfranco Maris, storic president di “Aned” Italie, e di Lidia Beccaria Rolfi, depuartade tal “Lager” di Ravensbrück (destinazion par 13 depuartadis dal Friûl udinês).

[CULTURE]

Dai 6 ai 16 di Mai, e torne cuntune schirie di apontaments (pal plui “on line”), la “Setemane de culture furlane”, dedicade de “Societât Filologiche Furlane” a la storie, a la lenghe e al teritori regjonâl. Il program complet si pues cjatâlu tal lûc internet di pueste.

[MUSICHE]

Il scandul dal bombardament di Vivâr, cu l’esercitazion militâr che vie pe gnot dai 17 di Març e à disvinidrît un’aziende agricule di polam, al è deventât une cjante e un “Cd”, in gracie di Domenico di Donna e di Franco Giordani. “La canzone del Cellina” e je stade produsude cul jutori dai musiciscj Tommy Graziani, Elisa Minari, Matteo Breschi, Christian Palazzi, Leo Virgili e Nicole Coceancig. Alessandro Scillitani al à girât il videu ch’al compagne la musiche. La cuvierte dal “Cd” le à dissegnade Gigi Cavalli Cocchi. «La battaglia del Cellina non fa morti sia ben chiaro / Solo polli e una gallina, è la guerra di Vivaro», al dîs un viers de cjante che, in gracie sô, no si dismentearâ l’ultin spieli di trop che i coste al Friûl jessi la Patrie des Sclavitûts militârs talianis.

[GLESIE FURLANE]

Il sfuei sloven “dom”, tal numar dai 30 di Avrîl, al torne a marcâ la cuistion dal ûs liturgic e pastorâl dal sloven te Glesie udinese. «Alc si môf», al note il periodic daspò dal «Incontro tra l’arcivescovo di Udin e l’ambasciatore sloveno in Italia». Par “dom”, «tal ministeri di mons. Mazzocato l’aspiet lenghistic, culturâl e identitari dal Friûl al à pierdût centralitât e al à stât ridusût une cuistion di secont plan», cundut che lis Constituzions de Sinode udinese cuinte a ricognossin i derits lenghistics e culturâi dai slovens e dai todescs dal Friûl, in plui di chei dai furlans.

[GLESIE FURLANE]

Il protagonist dal numar dai 25 di Avrîl dal setemanâl “Credere la gioia del Vangelo” al è il benedetin gurizan Dom Stefano Visintin. Emanuela Citterio, te lungje interviste intitulade “La natura è un libro che parla di Dio”, e presente l’esperience e la riflession ecologjiche dal abât di Praglia (Padue), nassût za fa 61 agns a Gurize e cressût a Mugle. Prin di deventâ munic, Dom Visintin al à lavorât come fisic nucleâr tai Stâts Unîts. In dì di vuê, al è retôr dal Ateneu pontifici Sant Anselm di Rome.

[LIBRIS]

Di chê strade dal XLV cjadalan dal taramot dai 6 di Mai dal 1976, la Biblioteche civiche di Udin e à prontât une rassegne di oparis, par memoreâ la tragjedie, la riconstruzion e la rinassince. Cuarantesîs titui a son proferîts te rieste: www.sbhu.it/proposte-di-lettura/6-maggio-1976-il-terremoto-in-friuli/?utm_campaign=SBHU+News%2319+-+10+maggio+2021&utm_source=newsletter&utm_medium=email; altris 264 a son lis oparis te rassegne dal Sistem bibliotecari regjonâl: www.sbnfvg.it/ricerca/lista-risultati?opr_1=AND&fld_1=SO&val_1=terremoti%20friuli%201976&grp_1=1&ord=data1-desc.