[SALÛT]

In spiete de zornade di mobilitazion taliane dai 7 di Avrîl, e tire adilunc la ricolte di firmis a pro de iniziative dai citadins europeans par fermâ lis speculazions economichis te cure dai malâts di Covid-19. In Italie, si scuen rivâ a 53 mil 580 firmi; in Europe a 1 milion. La manifestazion dai 7 di Avrîl e sarà popolarizade sul profîl “Facebook” https://www.facebook.com/right2cure.it.

[LIBRIS]

Vinars ai 2 di Avrîl, la Biblioteche “Vincenzo Joppi” di Udin e organize la presentazion dal libri “I raccontini di Caterina Percoto”. A 17.30, il curadôr Edoardo Colombaro al dialogarà cun Angelo Floramo, daspò de jentrade di Romano Vecchiet. Si podarà seguî la convigne o sul profîl “Facebook” de Biblioteche o ben par “Zoom” (https://us02web.zoom.us/webinar/register/WN_f_BQ1n6RTHOwFmuyfq5AgA).

[AMBIENT]

Si clame “Ceag” e al pues jessi contatât li dal “Sportello del Cittadino” di Udin, in strade del Gelso (338 270 5293 Mary Santoro). Al è il Centri di azion juridiche, inmaneât di “Legambiente”. In plui di prudelâ la clape ambientaliste regjonâl tes sôs azions, ur ufrìs consulence e assistente ai citadins e a lis Comunitâts in cont di promozion e di protezion dal ambient. In zornade di vuê, a operin tal “Ceag” i avocats Daniela Moreale e Francesco Casarella di Udin, Dafne Crea di Gurize e Alberto Coslovich di Triest.

[INFORMAZION]

Tal numar dal mês di Avrîl, il mensîl d’informazion indipendent “Altreconomia” al fronte ancje la cuistion dal avignî de mont cjargnele. Il servizi “Viaggio in Carnia, tra chi sogna la rinascita della montagna”, par cure di Veronica Rossi, al mostre cualchi spieli di int impegnade par «contrastare l’abbandono della terra».

[DIASPORE]

Al larà indevant fintremai ai 25 di Avrîl il dizun “Tutte le vite valgono”, ch’al smire di sensibilizâ su la crise umanitarie de “Trate balcaniche”. Il siopar noviolent, inmaneât de Rêt “Dasi” (Diritti, accoglienza, solidarietà internazionale), al è començât ai 17 di Genâr, superant 350 adesions in Friûl e par dute l’Italie. Fra lis Comunitâts ch’a àn aderît: “Oikos” di Feagne, Centri “Balducci” di Çuian, Centri “Misericordia e Solidarietà” di Udin, la Comunitât musulmane di Gurize e la Campagne internazionâl pal escomi des armis nucleârs.

[MOSTRIS]

“A ferro e fuoco. L’occupazione italiana della Jugoslavia 1941-43” e je la mostre virtuâl screade ai 6 di Avrîl, juste tal LXXX innovâl de invasion fassiste. L’esposizion e je stade curade dal Institût “Parri”, dal Institût triestin pe storie dal moviment di liberazion e de Universitât di Triest. Te mostre, a son proferidis 200 inmagjinis, in 54 tabelons, cun 25 testemoneancis e 81 intervistis cun studiâts esperts de cuistion. I tescj ju àn scrits Giancarlo Bertuzzi, Štefan Čok, Costantino Di Sante, Filippo Focardi, Brunello Mantelli, Raoul Pupo.

[TEATRI]

Vinars ai 9 di Avrîl, par cure dal Cumon di Cjarlins, al sarà proponût il spetacul teatrâl “Femini’”, leture sceniche di Marta Riservato e di Paolo Forte, cun tescj gjavâts fûr di “La femina di Marasint” di Novella Cantarutti (www.friul.net/dizionario_biografico/index.php). L’apontament al començarà a 20.30 sul profîl “Facebook” de Biblioteche di Cjarlins (Biblioteca di Carlino).

[ECONOMIE]

Il “Decrescita Bike Tour” dal 2021, par cure dal Moviment pe legre diminuzion, al partissarà de dighe dal Vajont, ai 18 di Jugn. Po al puartarà fin Padue, ai 27 di Jugn, intun’esplorazion ciclistiche fra i dams causionâts dal svilup e i progets alternatîfs par un resuriment acetabil e sostenibil. Te organizazion, al colabore “Altri Mondi Bike Tour” (www.facebook.com/biketourdecrescita/).

[SCUELE]

Il Grop di coordenament “La Lavagne Plurilengâl”, ch’al opere tes Scuelis superiôrs de Furlanie par promovi i principis e i valôrs da l’educazion plurilengâl, sabide ai 10 di Avrîl, al presente la convigne “Plui lenghis, plui vite. Promovi il plurilinguisim inte scuele secondarie di secont grât”. Il confront al tacarà a 17 su la plateforme “Zoom” (https://us02web.zoom.us/j/85732006152#success), cun intervents di Tiziano Furlano, di Gabriele Zanello (“La fotografie linguistiche 2020/21: notis di leture dai risultâts”), di Luca Melchior (“Une ricjece uniche: tantis lenghis in Friûl”) e di Enrico Peterlunger.

[CINE]

Ai 10 e ai 11 di Avrîl, par cure de Fondazion “Museo storico del Trentino”, si podarà viodi sul cjanâl “History Lab” (canale 602 / hl.museostorico.it) il cine di Mario Brenta “Barnabo delle montagne” dal 1994, inspirât de conte di Dino Buzzatti. Sabide, la proiezion e tacarà a 21, domenie a 15. La rassegne e je permitude de colaborazion cul “Trento Film Festival”, ch’al è programât dai 30 di Avrîl ai 9 di Mai.