[AMBIENT]

Lis Ministrazions comunâls di Comeliàns e di Davâr a àn palesât un biel «No» a la Centrâl idroeletriche, progjetade des ditis forestis “Enricom” e “Partel”. L’oposizion e je stade consegnade al Servizi regjonâl gestion risorsis idrichis (risorseidriche@regione.fvg.it). Joibe ai 14 di Genâr e je programade, a 10, la visite locâl d’istrutorie, inmaneade de Direzion regjonâl Difese dal ambient, Energjie e Svilup sostenibil. L’infrastruture, cun stabiliment in Patossera, e pericule di suiâ il Dean di Runcje a Dentramp, comprometint il comprensori vuardeât de plêf di San Zorç e cjantât di Giorgio Ferigo ma ancje di fiscâ une part dai Dominis coletîfs di Cjalgjarêt e di Runcje.

[LIBRIS]

Il Centri per ricercjis cjarsolinis “C. Seppenhofer” ur propon, su la rêt des rêts (te sezion “download” dal so lûc internet), i siei libris a ducj i passionâts di speleologie. L’ultin al è chel dedicât al “Carsismo di Monteprato” di Nimis. Altris oparis a son: “La Valle dello Judrio. Progetto di ricerca speleologica Judrio 2000” (https://drive.google.com/.../1W0dkJhcmG0V6x30rJkPoOP.../view); “Il territorio carsico di Taipana. Progetto multidisciplinare di ricerca speleologica” (https://drive.google.com/.../1Qjn12ACmRfEIUAPFbbMMfi.../view); e “Monteprato di Nimis. Progetto multidisciplinare di ricerca speleologica” (https://drive.google.com/.../1bxWEWBEX6AGm1Oe0J9cWt.../view).

[POLITICHE]

Il prindalan, la “premier” scozês Nicola Sturgeon, ch’e je ancje la guide dal “Scottish National Party”, e à tornât a palesâ la volontât de Scozie di tornâ daurman te Union europeane. «La Scozie e tornarà in curt – e à declarât –. Europe, ten la lûs impiade».

[POLITICHE]

Ancje chest an, l’Union Cumons talians par stralozâ di une Regjon intun’altre e à scuignût fâ la samblee anuâl cul sistem “ad referendum”. Il dean, Francesc Frattolin di San Micjêl, ur à spedît a ducj i socis, ator pa l’Italie, i belançs e la relazion preventive pal 2021. In zornade di vuê, i Cumons plui indevant tal “iter” pal passaç di Regjon a son: Montecopiolo e Sassofeltro (des Marche a l’Emilie-Romagne), Pedemonte (dal Venit al Trentin/Süd Tirol), Magasa e Valvestino (de Lombardie al Trentin/Süd Tirol). In Friûl, il Cumon di Cint, tal Mandament di Puart, al spiete dal 2006 la riunificazion stabilide de votazion popolâr.

[INFORMAZION]

Lis lidrîs furlanis dal mît di Romeo e di Giulietta a son profondidis e confrontadis intal “forum” di discussion “Luigi Da Porto / Lucina Savorgnan”, curât di Gregorio Grasselli. Il lûc internet al tire dongje e al ordene «dâts e ideis su la teorie ch’e calcole Luigi Da Porto l’autôr de prime version di “Giulietta e Romeo” (1531)». La conte di Da Porto e je dedicade a done Lucine Savorgnane.

[ECONOMIE]

L’Empori solidari di Glemone, “Di man in man”, lunis ai 11 di Genâr, al torne a viergi daspò dai mês de emergjence sanitarie. Ma al à bisugne streme di jutoris, pal fat che si è svuedât, in chescj dîs, par socori lis vitimis dal taramot dai 29 di Decembar in Cravuazie, spedint sore il dut munturis pal Invier. I ambients de “Cjase dal Piligrin” di strade Sant’Antoni a saran vierts lunis e sabide, di 9.30 a misdì, e miercus, di 14 a 17. Lis volontariis a domandin ch’a sedin puartadis dome vistîts e scarpis di sest e daûr de stagjon. Par domandâ robe si scuen prenotâsi par telefon (353 4099610 o 340 614598, intant dai oraris dal Empori).

[POLITICHE]

Il Comitât popolâr ch’al à inviât la Petizion publiche “Un patrimonio comune da proteggere / Liberiamo il fiume Fella dalle speculazioni”, lunis ai 11 di Genâr, e presente in Consei regjonal lis primis mil e 200 firmis. L’apontament al è a 15, li dai uficis dal president Piero Mauro Zanin. Seont i firmataris, il Cjanâl dal Fier nol pues jessi sacrificât par favorî il profit di cualchi privât e iniziativis ch’a puartin dome cagnèris di compensazions, cence garantî ni curint nete e a bon presit ni lavôr pes Comunitâts locâls, ni sigurece dal teritori. La ricolte di firmis e tire adilunc su la rêt des rêts, in gracie de plateforme: www.change.org. Il Comitât al à screât par informazions il grop WhatsApp “Salviamo il Fella” (320 0430247).

[CONVIGNIS]

La Societât di Studis trentins di Siencis storichis e scree l’an sociâl, lunis ai 11 di Genâr, cuntune convigne su la plateforme “GoogleMeet” a 17.30, dedicade ai “Testimoni della storia: le società storiche locali nello specchio del presente”. Di chê strade, a fevelaran i puartevôs de “Deputazione di Storia patria per le Venezie”, dal “Institût di storie sociâl e religjose” di Gurize e dal “Tiroler Heimat” di Ispruc. I reladôrs a saran: Christina Antenhofer, Marcello Bonazza, Micol Cossali, Italo Franceschini, Ivan Portelli, Michele Toss, Gianmaria Varanini e Sara Zanatta. Par seguî il dibatiment, si varà di prenotâsi dentri misdì di lunis, cuntune letare eletroniche, là che si varà indaûr la direzion de convigne eletroniche. La videuconvigne e sarà disponibil ancje su la rêt des rets.

[ECONOMIE]

Sconzurât il risc che il guvier al puedi impugnâle, la Leç regjonâl 21/2020 su lis grandis derivazions idroeletrichis, par deventâ pardabon operative, e scuen jessi compagnade dai proviodiments atuatîfs. Par chel, la Zonte e scuen daurman scoltâ i Cumons, lis Comunitâts montanis e i beneficiaris ch’a spietin di ricevi energjie eletriche a gratis o compensazions adatadis. I conseîrs Cristian Sergo (“M5S”) e Nicola Conficoni (“Pd”) a ricuardin che la Zonte e à timp fint ai 10 di Fevrâr par fâ la part dal so dovê.

[CULTURE]

Cuntune cuote di 25 euros (soci ordenari) o di 10 euros (soci student), si pues dâsi in note par dutelan al Institût furlan pe Storie dal Moviment di Liberazion (“Ifsml”).