[SALÛT]

Sabide ai 4 di Lui, e je organizade une presentazion a la stampe de XI edizion dal “Libro Bianco sulle Droghe”. Il scandai al sarà presentât a 11, li dal ambient “da Caucig”, tal borc di Glemone, a Udin. L’edizion di chest an e fronte ancje la cuistion “Droghis e presons te ete dal Coronavirus”, cu la presentazion di cifaris e di dâts su lis presons dal Friûl e di Triest. Intervents di Franco Corleone, di Roberta Casco, di Natascia Marzinotto, di Andrea Sandra, di Mathieu Scialino e di Massimo Brianese.

[AMBIENT]

Lis Comunitâts bagnadis de Fele, cun dute la int dal Cjanâl dal Fier e cui Comitâts che, in ogni cjanton de mont, a procurin di difindi lis ultimis aghis naturâls dai speculadôrs idroeletrics a son invidâts di “Legambiente” a manifestâ, domenie ai 5 di Lui, a Pieretaiade, tal Cumon di Pontebe. L’apontament al tacarà a 10.30, daprûf dal puint di fier, cul intindiment di jessi une «protesta pacifica per salvaguardare il Fella da ulteriori manomissioni e prelievi d’acqua».

[GLESIE FURLANE]

Domenie ai 5 di Lui, Glesie furlane e celebre l’Avôt dal Friûl pai sants martars fondadôrs Ermacure e Furtunât. A 18, al cjantarà Messe grande, li de basiliche patriarcjâl di Acuilee, pre’ Mirko Franetovich, capelan di Roncjis di Monfalcon e diretôr dal Ufici de Pastorâl de Salût de Arcidiocese di Gurize.

[ECONOMIE]

La Politiche regjonâl e scuen meti man al setôr idroeletric, partint di chescj criteris impreteribii: 1. fermâ di molâ concessions; 2. scrutinâ il stât di dutis lis aghis; 3. verificâ se lis captazions a corispuindin fûr par fûr a lis concessions e a lis prescrizions; 4. stabilî dutis lis aghis ch’a àn di jessi in dut câs mantignudis te sô integritât; 5. fissâ cun criteris restritîfs i ponts di derivazion e i ponts di restituzion, par sconzurâ la realizazion di centrâls in cjadene; 6. concedi concessions gnovis daûr di cheste prioritât: a. Cumons, b. Ents publics, c. Cooperativis, d. Imprenditôrs che s’impegnin a doprâ l’energjie in ativitâts imprenditoriâls locâls; 7. multis saladis, comprendût il ritîr de concession, ai concessionaris ch’a derivin plui aghe di chê concedude; 8 verifiche di dutis lis captazions par garantî il deflùs ecologjic stabilît de leç; 9. ristruturazion dal Assessorât regjonâl al Ambient, cun rotazion dal personâl; 10. abolizion dai incentîfs al setôr idroeletric. Chescj principis a son stâts tornâts a ripeti di ducj i Comitâts e des Comunitâts che, ai 5 di Lui, a àn manifestât ad ôr de Fele, protestant cuintri dal progjet di sfrutament privât imbastît di “Idroelettrica Fella Srl” di Vençon e cuintri de inerzie dai uficis regjonâi e dai Cumons dal Cjanâl dal Fier.

[CINE]

De “Zornade mondiâl dal Dispatriât”, la Cooperative “Nuovi Vicini” di Pordenon e propon in linie il proget “Home - Verso casa”. Il videu che le presente al è stât realizât cul jutori dai Cumons di Pordenon, di Sacîl e di San Vît dal Tiliment.

[NAZIONS]

I Yanomami dal Brasîl ur domandin solidaritât a dutis lis nazions dal mont par fermâ l’invasion de sô tiere. L’ultime iniziative inviade par otignî chest fin e je la campagne internazionâl “#ForaGarimpoForaCovid”, prudelade di “Survival International”. Tune petizion, si domande al guvier brasilian l’espulsion di 20 mil ciridôrs d’aur, ch’a son daûr a fiscâ lis tieris yanomami e a slargjâ la pandemie di “Coronavirus”.

[DIASPORE]

“Assemblea No Cpr No Frontiere” e continue la sô opare di denuncie dai fats di disumanitât ch’a son daûr a lâ indevant, cence rimiedi, li dal “Centro di permanenza per il rimpatrio” di Gradiscje Imperiâl. Passade l’emergjence “Covid-19”, a restin i siopars de fan, i fats di autolesionisim, i riviei. «Loro mi hanno cambiato la vita e la testa. Ti fanno andare fuori di testa. Rovinano la gente, ti fanno cose brutte [...]. Vedo alla telecamera mia madre e piange, la mia compagna e piange, tutti stanno male per me. […] Vedo solo brutto ormai, faccio una cosa brutta, sono stufo, non ce l’ho più la forza»: e je la testemoneance di un dai “presonîrs”, tirade dongje di “Assemblea No Cpr”. Si trate di un zovin cuntune frute di 4 mês che nol à mai podût viodi e che par domandâ la liberazion al à començât il siopar de fan.

[ECONOMIE]

Al 6 di Lui, al à vierzût ancje a Pordenon il “Sportello Energia”. Il servizi, curât di “Ape Fvg”, al ufrissarà a gratis, ogni lunis, consulence sui finanziaments a pro de eficience energjetiche. L’ufici al è logât li dal Cumon, te strade Bertossi 9, e si podarà prenotâsi telefonant al numar 353 41 04 289.

[AMBIENT]

Sabide ai 18 di Lui, il Circul pe legre diminuzion “Livence-Tiliment” al organize une zornade di dal “ecovillaggio” di Flambruç “Gaia Terra”. Il Centri pe sostignibilitât e pe creativitât al sarà presentât de fondadore, Debora Sbaiz. Si partissarà devant de Coop di Puart, a 10. Ma si varà di dâsi in note dentri dai 14 di Lui.

[AMBIENT]

Ancje la risultive dal Argìn e lis sôs pissandis a son candidadis par deventâ “Luoghi del Cuore” dal “Fondo ambientale italiano”. Par prudelâ il tesaur naturâl cjargnel, si scuen votâ su la rêt des rêts la propueste de Pro loco e dal Cumon di Preon, a la direzion www.fondoambiente.it/luoghi/sorgenti-e-cascate-dell-arzino?ldc.