[CORS]

L’Institût furlan pe storie dal moviment di liberazion al prepare il LXXV innovâl de liberazion cun 10 intervents di storics, transmetûts par “Facebook” (pagine “Istituto Friulano per la Storia del Movimento di Liberazione”), tal cjanâl YouTube IFSML e te pagine #RaccontiamolaResistenza, te schirie “Raccontiamo la Resistenza in Friuli da casa a casa”. I videus a durin sù par jù 10-15 minûts. Apontaments a 16, ai 8, ai 9, ai 11, ai 13, ai 15, i 17, ai 19, ai 21, ai 23 e ai 25 di Avrîl.

[SCUELE]

La clape dai depuartâts tai lager naziscj, “Aned”, e la clape “Lapsus” a àn inmaneât un “cors online” su “Storie e memorie da lis depuartazions nazifassistis”. Si podarà seguîlu a gratis, mediant dal puartâl internet eduopen.org. Dutis lis lezions a durin sù par jù 10 oris e a son dividudis in 6 modui.

[ECONOMIE]

Ancje la “Bottega del Mondo” di Tumieç e à tornât a viergi. Fintremai ai 11 di Avrîl, si podarà comprâ i prodots dal cumierç just e solidari, ancje in Cjargne, di 9.30 a 12.30, te strade Porta di Sotto. Si podarà ancje telefonâ prin, par fâur parecjâ daurman la spese di Pasche ai volontaris de Buteghe (0433 466089).

[ECONOMIE]

Il “Forum per i Beni comuni e l’Economia solidale” dal Friûl e di Triest, che in gracie sô e je stade fate buine la leç regjonâl 4/2017 “Norme per la valorizzazione e la promozione dell’economia solidale”, al à publicât un document dulà ch’al propon lis sôs propuestis sun “Come uscire dal tunnel della crisi… senza sbagliare strada”. La strade juste, pal “Forum”, no son ni politichis neoautarchichis ni politichis neoliberistis, ni assistenzialisim public. L’economie e à di tornâ jessi un mieç e il no il fin e si scuen tornâ a abadâur ai limits dal teritori. Il “Forum” al propon d’inviâ, mediant dal sistem des Comunitâts teritoriâl ricognossût de leç 4, une transizion, inlidrisade sui valôrs da l’Economie civîl e da l’Economie solidarie.

[SALÛT]

Par saltâ fûr de crise sanitarie mondiâl dal dì di vuê, la “Bce” e à stabilît di spindi 750 miliarts di dolars. Tal mont, in chel fratimp, si tire adilunc a spindi miliarts su miliarts par prudelâ societâts e progets ch’a sfrutin cence padìn combustibil fossil e ch’a causionin disastris sproposetâts. La cuantitât dai invistiments e je dal dut disproporzionade. Seont il scandai “Banking on Climate Change 2020: Fossil Fuel Finance” (http://priceofoil.org/content/uploads/2020/03/Banking_on_Climate_Change_2020.pdf), dome vie pai 4 agn seguîts al Compatât di Parîs dal 2015, lis 35 Bancjis plui grandis dal mont a àn invistît in cjarvon, gâs e petroli 2 mil e 700 miliarts di dolars.

[AMBIENT]

Il lûc internet “Valori.it” al propon un Dizionari su la crise climatiche, par orientâ te comprension da la cuistion plui intrigose dal dì di vuê. «Cuanche si cjacare di clime – a sclarissin i redatôrs dal servizi informatîf indipendent – si dopre dispès concets cognossûts masse pôc: o vin sielzût par vualtris chei che no si pues propit no cognossi par capî parcè ch’al è di just preocupâsi».

[ECONOMIE]

La Cooperazion sociâl, par colpe di “Covid-19”, e pericule di lâ in sfas. Il chivalì al è stât tornât a pandi dal Comitât diretîf regjonâl di “Legacoopsociali Fvg”, ch’al à scrutinât la situazion, ai 16 di Avrîl. «La pluipart dai servizis sociâi e sanitaris, educatîfs e pal inseriment lavoratîf di personis pidimentadis a son sospindûts e passe metât dai operadôrs a son fers e paiâts dome in gracie dai amortizadôrs sociâi». Si trate di passe 6 mîl lavoradôrs, massime feminis. La situazion e je complicade – al declare il president Gian Luigi Bettoli – par colpe de inresponsabilitât di chei ents che si refudin di coprogetâ i servizis sospindûts, in mût di tornâ a ativâju, e che no onorin i impegns contratuâi.

[DIASPORE]

Il “Gruppo Immigrazione Salute Friuli-V. G. - S.I.M.M. Società Italiana di Medicina delle Migrazioni” al segnale il lûc internet www.ilgrandecolibri.com/coronavirus-spiegato-migranti-asilanti/, ch’al propon un grum d’informazions intune grande varietâts di lenghis, sul fin ridusi lis dificultâts di emigrants e di citadins forescj devant des informazions e des indicazions necessariis par frontâ l’emergjence sanitarie.

[CINE]

In gracie di “History Lab”, sabide ai 18 di Avrîl, si podarà viodi il documentari sul Lusinç “Il tempo del fiume” di Nadja Veluscek e di Anja Medved (2010). La pelicule e je stade sielzude cul jutori dal “Trento Film Festival”, te suage de rassegne “Visioni”, par cure de Fondazion “Museo storico del Trentino”. La proiezion e je stabilide a 20.30, cun replichis domenie a 10, a 15 e a 20. “History Lab” al è disponibil “in streaming” ancje tal lûc internet http://hl.museostorico.it.

[CINE]

“Visionario” di Udin, “Cinemazero” di Pordenon” e “La Cineteca del Friuli” di Glemone, cul jutori di “Tucker Film”, a àn inmaneât une “piattaforma online” par ufrî «propuestis di cualitât leadis cul teritori». La direzion dal servizi audiovisîf e je: www.adessocinema.it.