[CULTURE]

Dutun cun Galway, chest an, ancje la citât cravuate di Rijeka/Fiume e sarà “Capitâl europeane de culture”. L’iniziative, nassude dal 1985, e smire di valorizâ la varietât e la ricjece de culture europeane, miorant il profîl internazionâl des sôs citâts.

[CONCORS]

La Biblioteche di Manià e organize la XVII edizion dal concors leterari “Lama e trama giovani”. Lis contis sui prodots dal artesanât di Manià («Quando la lama è protagonista della trama») a varan di rivâ dentri dai 29 di Fevrâr. La premiazion e sarà fate ai 17 di Avrîl.

[AMBIENT]

Martars ai 4 di Fevrâr, e cole la samblee anuâl di “Terraè”. La riunion e je stabilide a 21, li de Bancje di credit cooperatîf pordenonês, a Pordenon te strade Mazzini numar 47. Chei ch’a intindin di associâsi in chê sere a son invidâts a prenotâ la tessare par pueste eletroniche.

[CINE]

Martars ai 4 di Fevrâr, al rive a Codroip il cine “Predis, la nazione negata” di Massimo Garlatti-Costa. La proiezion dal film, ch’al presente il regjonalisim furlan seont pre’ Josef Marchet, pre’ Francesc Placerean e pre’ Antoni Beline (www.friul.net/dizionario_biografico/index.php), e je stabilide a 21, li dal Teatri “Benois De Cecco”. L’opare e sarà presentade ancje a San Denêl, li dal “Cinema Splendor”, martars ai 11 di Fevrâr, a 21.

[GLESIE FURLANE]

Martars ai 4 di Fevrâr, la Foranie di Puart e scree la schirie di convignis “Scoltant il Vangeli di Matieu”. Lis riflessions a saran animadis di pre’ Orioldo Marson, li de “Sala delle Capriate” te strade dal ’Seminari 25, a 20.30. La prime cuistion e sarà: “Gesù è il Mosè ultimo e definitivo” (Mt 5,20).

[ECONOMIE]

Cristian Timeus, Carlo Gortan, Devis Gortan, Michele Timeus e Luca Timeus a son i Frazioniscj sielzûts par ministrâ i Bens coletîfs de Comunitât di Davaste. La Frazion di Davâr e à votât par rinovâ il Comitât ch’al lavorarà par 4 agns. President al è stât confermât Cristian Timeus.

[AMBIENT]

Tal lûc www.dati.friuliveneziagiulia.it/Ambiente/Censimento-dei-siti-inquinati/bfhq-znvn, si pues scrutinâ il “Censiment dai sîts incuinâts” dal Friûl e de provincie di Triest. La documentazion, inzornade fint ai 10 di Genâr dal 2020, e je curade de Direzion regjonâl Ambient e Energjie.

[MOSTRIS]

E restarà vierte fintremai ai 8 di Març la mostre “Pietre d’inciampo a Udine”, ch’e presente il “monument dal bas” e “slargjât”, in memorie dai depuartâts europeus, inviât dal artist todesc Günter Demnig e rivât ancje in Friûl, cun spiei a Cormòns, Dobardò, Gurize, Pordenon, Roncjis di Monfalcon e Udin. L’esposizion, par cure di Anna Colombi e di Silvia Bianco, e je vierte vinars, 15-18; sabide e domenie, 10-12 / 15-18.

[LIBRIS]

I “Dialics in Biblioteche” de “Joppi” di Udin, miercus ai 5 di Fevrâr, a presentin il libri “Scrivere l’orrore. Letterature e Shoah”, par cure di Angela Fabris e di Romano Vecchiet, ch’a dialogaran cul storic Valerio Marchi. La convigne e tacarà a 18, li de sale “Corgnali”. Il volum al presente contribuzions di Anna Baldini, di Angela Fabris, di Pier Vincenzo Mengaldo, di Giuliano Migliori, di Luigi Reitani e di Romano Vecchiet.

[CONVIGNIS]

Di chê strade de gnove edizion dal saç “Il formaggio e i vermi”, la Fondazion “Museo Storico del Trentino” e à invidât a Trent l’autôr Carlo Ginzburg. Cun lui, joibe ai 6 di Fevrâr a 17.30 li de “Fondazione Bruno Kessler”, si discorarà su “Il coscmo di uno storico del XXI secolo”. A dialogaran cun Ginzburg Cora Presezzi (Universitât “La Sapienza” di Rome), Lucio Biasiori (Universitât di Padue) e Massimo Rospocher (“Fbk-Isig). La convigne e proponarà la traduzion simultanie te lenghe taliane “Lis”.