[GLESIE FURLANE]

Lunis ai 3 di Jugn, li dal plui vieri santuari dal mont dedicât a Sant Antoni, a Glemone, e je programade la convigne “Su lis olmis dal Sant. La Strade di Sant Antoni fra Italie e Europe: cognossi il passât par progjetâ l’avignî”. Il confront al començarà a 10, par cure dal professôr Andrea Tilatti, ch’al intervegnarà cun pre’ Luciano Bertazzo e cui professôrs Antonio Rigon e Riccardo Cecovini.

[POLITICHE]

Domenie ai 9 di Jugn, la Samblee “No Cpr no frontiere” e organize un corteu cuintri dal “Centro di Permanenza per il Rimpatrio”, progetât a Gradiscje Imperiâl, cuintri dai confins e cuintri de violence dilunc la trate balcaniche des migrazions internazionâls. La manifestazion di proteste e je stabilide a 15. Il “Cpr” di Gradiscje, previodût dal decret Minniti-Orlando, al varès vût di viergi il I di Jugn, ma si continue a rimandâ. Pe Samblee, la sô realizazion e volarès dî screâ un «lager di stât», par infuartî il sistem di «violencis struturâls inmaneadis dai Paîs comunitaris su la trate balcaniche», cul jutori dai polizais de Cravuazie, de Serbie e de Ongjarie, innomenâts par trataments violents e disumans.

[ECONOMIE]

Te gjestion des aghis, i aspiets economics e juridics e i problems di responsabilitât a son cuistions intrigadis, sore il dut, in montagne. Par chel, la convigne programade a Trent ai 14 di Jugn dal Consei provinciâl e dal Dipartiment universitari di Economie e di “Management” e risulte tant atuâl che util. Il program al pues jessi let sul volantin www.usicivici.unitn.it/download/newsletter/20190607_2224AcquaAreeMontane.pdf, dulà ch’a spichin i intervents sul cantìn des concessions indroeletrichis e sul ricognossiment dai derits coletîfs su lis aghis.

[ECONOMIE]

Michela Vogrig, sotpresidente di “Legacoopsociali Fvg” e presidente dal Consorzi di cooperativis sociâls “Cosm” di Udin, e je stade votade te presidence taliane di “Legacoop”. Pal Friûl, dulà che la cooperazion sociâl e je nassude in gracie di Franco Basaglia, al è stât un ricognossiment agradît e une conferme, daspò dal servizi fat pe prime volte di Orietta Antonini, presidente de Cooperative “Itaca” di Pordenon, te presidence stade. «O crôt che in dì di vuê e sedi cressude la dibisugne di rinovâ e di infuartî, tes nestris sieltis imprenditoriâls e sociâls cuotidianis, lis fondis dal sistem cooperatîf, frontant ogni contradizion», e à declarât Vogrig daspò nomenade.

[POLITICHE]

A la barbe de leç statâl 168/2007 “Norme in materia di domini collettivi”, ch’e stabilìs il dovê constituzionâl dal ricognossiment e de valorizazion dai Bens coletîfs, in Friûl, al tire adilunc il disvinidriment di chest «Ben comun d’interès public e gjenerâl» e di chest patrimoni ambientâl e sociâl strasordenari. L’ultin spieli di cheste insensibilitât a son 5 delibaris votadis de Zonte regjonâl, ai 7 di Jugn, cu la permission dal Comissari pai Ûs civics. Lis autorizazions par vendi Ben coletîfs ai privâts o par mudaments di destinazion a tocjin i teritoris dai Cumons di For Disore (delibaris 921 e 922), di For di Voltri (919) e di Prissinins (920), dulà che lis Comunitâts a son ancjemò esclududis de gestion de sô propietât coletive, e de Frazion triestine di Bazovica/Basovizza sul Cjars (918), dulà ch’al esist un Comitât frazionâl ma cence che si puedi votâ par rinovâlu, di agns e agnorums, par colpe dal conflit fra Cumons e Jus e Srenje.

[AMBIENT]

Il grop “AlberiAmo”, sabide ai 22 di Jugn, al propon une visite guidade li dal sît di ricualificazion ambientâl Vallevecchia, fra Cjaurlis e Bibion, tal Friûl concuardiês. La presentazion dal proget, in colaborazion cun Francesco Fagotto, e tacarà a 15. Po si podarà girâ par boscs, zonis umidis, cisis, pinadis e lîts. Si scuen dâsi in note par pueste eletroniche, pai 35 puescj a disposizion. Chei di Puart a partissaran a 14.30, li dal parc de Coop di strade Boito 26.

[INFORMAZION]

Al durarà ancjemò cualchi setemane il scandai eletronic sui “Stili di vita sostenibili nelle Alpi”, par cure de Comission internazionâl pe protezion des Alps “Cipra”. La direzion di visitâ e je: https://kwiksurveys.com/s/WUhjlAN9. Il risultât al vegnarà publicât tal lûc internet www.cipra.org/vita-sostenibile. Il proget al smire di promovi compuartaments sustignibii e spiei par rispietâ l’ambient e la clime, sielgint come cu va ce che si mangje, con ce vistîsi e cemût lâ ator.

[ECONOMIE]

Il “Forum regjonâl dai Bens comuns e da l’Economie solidarie”, sabide ai 22 di Jugn, al propon a Tumieç la seconde edizion de “Zornade de Economie solidarie”, cun dibatiments, mostris, confronts e laboratoris sui prâts di Pra Cjiscjel, di 9.30 fin 17.30. Fra i protagoniscj, Francesca Forno de Universitât di Trent, il zornalist vinizian Paolo Cacciari e Lucia Piani de Universitât furlane. Dopomisdì, riunions animadis di “proDes Fvg” e de Aziende sanitarie n. 3 su l’economie sociâl e solidarie in mont.

[MUSICHE]

Il festival internazionâl “Musica Cortese”, vinars ai 21 di Jugn, al rive li dal Museu archeologic di Cividât, dulà ch’al presentarà a 18 il conciert “Beata Viscera”, par cure de “Schola Aquileiensis”; a 20 une visite te aree archeologiche des cjanivis; a 20.45, la lezion-conciert di Giacomo Baroffio “Alla ricerca del canto perduto. Da Milano a Benevento via Aquileia, Nonantola, Roma. Riflessioni sul canto «gregoriano»”.

[LIBRIS]

Sabide ai 22 di Jugn, la Federazion speleologiche gurizane e presente il volum “Streghe, Orchi e Krivapete. La grotta tra miti e leggende”, cui ats de convigne dal mês di Novembar dal 2016. Apontament a 17, li dai Museus provinciâi tal cjiscjel di Gurize.