[CONVIGNIS]

“In fuga dalla guerra. I profughi della I guerra mondiale in Emilia Romagna. La realtà piacentina”: al è il titul de convigne programade, vinars ai 3 di Mai, li de Biblioteche di Pradaman, a 18. Ta chê serade a saran presentadis liendis furlanis, fra Pradaman e Piacenze.

[ECONOMIE]

La “Buteghe dal Mont” di Codroip-Spilimberc-Tumieç-Udin, sabide ai 4 di Mai, e convoche la samblee ordenarie dai siei socis, che si daran dongje a 18 in Borc di Trep 10, a Udin.

[SOCIETÂT]

A 15.30 di sabide ai 4 di Mai, par cure di “Aned” (la clape dai ex depuartâts tai cjamps naziscj), e vegnarà cjantade une messe in memorie di ducj i muarts ch’a àn patît lis persecuzions nazifassistis. Daspò de liturgje, chei di “Aned” a puartaran un omaç li dal monument tal viâl de Vitorie. A 17.30, po, a fasaran la samblee anuâl de clape, li dal ambient “Heaven” (tal borc di Praclûs).

[POLITICHE]

In Friûl, la ricolte des firmis necessariis pe propueste di leç d’iniziative popolâr sul ricognossiment dai Bens comuns (www.benicomunisovrani.it) e je curade dal “Forum dei Beni Comuni ed Economia Solidale”, che si è notât tal “Comitato Popolare Difesa Beni Pubblici e Comuni Stefano Rodotà”. Lis resons dal proget politic a son presentadis dal jurist Ugo Mattei de Universitât di Turin tun videu che si pues cjalâ ancje tal lûc internet dal “Forum” furlan.

[AMBIENT]

Students e clapis ambientalistis a son daûr a organizâ il secont siopar pe clime, su lis olmis di Greta Thunberg. Al sarà fat a Udin, vinars ai 24 di Mai. Cui ch’al vûl colaborâ te organizazion oben restâ informât al pues scrutinâ il profîl “Facebook” https://www.facebook.com/events/1963760843732629/ oben il lûc internet dal Forum regjonâl da l’Economie solidarie.

[CULTURE]

La clape dai “Toscani in Friuli-V. G.” e fiesteze 15 agns di vite cun 3 apontaments. Lunis ai 6 di Mai, conciert di musiche classiche li dal cjiscjel di Vilalte, a 20.30. Martars ai 7 di Mai, convigne su Machiavelli e Guicciardini, a 18 li di palaç Toppo Wassermann, a Udin, tal Borc di Glemone 92. Lunis ai 13 di Mai, convigne su Tosco Nonini, a 18 li de “Filologjiche”, tal palaç Mantica di strade Manin.

[MOSTRIS]

La mostre “Futurismo@Postfuturismo”, imbastide a Puart li de galarie “Ai Molini”, e profondìs l’art e i leams artistics di Luigi Russolo (1885-1947) cul “Futurismo”. Fintremai ai 30 di Jugn, si podarà rimirâ oparis di Boccioni, di Balla, di Severini e di Sironi e dai autôrs regjonâi dal “Secont Futurisim” (Crali, Johannis, FuturCiotti). Oraris: di joibe fin domenie, 10-12.30 / 15.30-18.30.

[INFORMAZION]

Une riflession positive su la tragjedie dal taramot dal 1976 e su l’imprese comunitarie de riconstruzion e pues jessi fate seguint la riflession di Igor Londero, proponude intal saç “Il caso del terremoto in Friuli”, liberementri proponût te sezion “L’Italia e le sue Regioni (2015)” dal lûc internet de Enciclopedie “Treccani”. Il prin paragraf dal studi al propon chest titul: “Il caso del terremoto in Friuli (1976): «Lôr a jan dut, e non a roseâ la crodie»”.

[INFORMAZION]

A la direzion https://cesarebonifazi.carto.com/viz/77affa10-f8e3-11e5-89b1-0e674067d321/embed_map si pues scrutinâ la mape dai dams causionâts dal taramot dal 1976 – muarts e distruzions matereâls – e cui numars de riconstruzion – cjasis tornadis a fâ sù e cjasis regoladis in forme cuintrisismiche.

[CONVIGNIS]

L’Institût furlan pe storie dal moviment di liberazion al presente a Udin il numar tematic su la “Vuere frede” de riviste “Acta Histriae”. Joibe ai 9 di Mai, si daran dongje a 18, li de librarie “Friuli” di strade dai Rizzani 1/3, il curadôr dal numar Gorazd Bajc, la redatore Urška Lampe (ch’e à frontât la cuistion des depuartazions in Jugoslavie) e il ricercjadôr Federico Tenca Montini (ch’al cjacararà sul “Teritori libar di Triest” dal 1952 al 1953).