[ECONOMIE]

Joibe ai 7 di Març, e cole la samblee ordenarie dai socis de cooperative ch’e gestìs lis Buteghis dal cumierç just e solidari di Codroip, di Spilimberc, di Tumieç e di Udin. Si fasarà dôs riunions, la prime a 16 a Spilimberc, te plaçute 1° Maggio 5; la seconde li dal negozi dal borc di Trep 10/a, a Udin, par Codroip, Tumieç e Udin. La cuistion di frontâ e je chê di une abitance gnove pe buteghe di Udin.

[TEATRI]

L’atôr Christian Di Domenico al torne in Cjargne par presentâ doi spetacui. Joibe ai 7 di Març, ur proponarà ai students dal Centri studi il spetacui “U Parrinu”, ch’al conte la storie di pre’ Pino Puglisi, il plevan sicilian sassinât de mafie. A 20.30, par ducj, li dal Teatri “Luîs Candoni”, al sarà presentât “Mio fratello rincorre i dinosauri” su l’integrazion des disabilitâts. A colaborin te organizazion, “Csv” e “Cta”, te suage dal program anuâl di “Cjargnalive”.

[MOSTRIS]

Li de glesie di San Laurinç di San Vît dal Tiliment, “Craf” e Cumon a proponin la mostre “Femines / Le donne del latte: gesti e luoghi, tra presente e memoria” di Ulderica Da Pozzo. Oraris, fintremai ai 5 di Mai, sabide e domenie, 10.30-12.30 / 15.30-19.

[CULTURE]

“Il Ponte Gruppo di Lettura” di Davâr al fiesteze la “Fieste des feminis” cul percors poetic “Camminando con la poesia”, vinars ai 8 di Març, li dal Centri sociâl di Davâr, a 20.30. A lein: Danilo Antonipieri, Daniela Casanova, Chiara Di Piazza, Katia Craighero, Daniele Grassi, Letizia Lena, Michela Morocutti e Giovanna Nieddu; al sune Johnny Dario.

[POLITICHE]

La clape “Friuli/Europa”, vinars ai 8 di Març, e invide a rifleti sul avignî de Patrie, mediant dal dibatiment “A che gioco giochiamo? Se Trieste va verso la città metropolitana, cosa fa il Friuli? E cosa diventa la Regione Fvg?”. Il confront al tacarà a 17, li de Cjamare di Cumierç di Pordenon e di Udin, tai uficis udinês di place Venerio. Intervents di Renzo Pascolat, Giorgio Cavallo, Sergio Bolzonello, Mauro Bordin, Roberto Felcaro, Pietro Fontanini, Francesco Russo, Ferruccio Saro, Piero Mauro Zanin e Sandro Fabbro.

[INFORMAZION]

Vinars ai 8 di Març, si presente li de Biblioteche di Stolvize la “Mappa di Comunità” de vile roseane. La presentazion e tacarà a 17, par cure dal Ecomuseu de Val di Resie.

[MOSTRIS]

Di chê strade dal «Mês de educazion», inmaneât a Puart dal Coleç de Glesie di Concuardie «Guglielmo Marconi», dai 11 ai 23 di Març, li dal municipi si podarà visitâ la mostre “La Rosa Bianca”. L’esposizion e sarà vierte di lunis fin sabide, 9.30-12.30; lunis e miercus, 15-17.

[POLITICHE]

Ancje la Regjon e scuen fâ la part dal so dovê par scombati cuintri dai mudaments climatics. Al covente, duncje, che si stabilissin dai compuartaments positîfs, daûr di ce ch’al à za pandût il studi comissionât a “Arpa-Osmer Fvg” e publicât za fa un an. Un impegn precîs sun chest cont al è stât domandât a la Zonte regjonâl dal grop “Patto per l’Autonomia”, in Consei. In specialitât, Giampaolo Bidoli e Massimo Moretuzzo a proponin ch’al sedi fat bon un “Plan regjonâl di adatament ai mudaments climatics” e ch’a sedin stabilidis formis di coordenament cu lis iniziativis locâls decidudis tai “Plans d’azion pe energie sostenibil e pe clime” dal “Patto dei sindaci”.

[SOCIETÂT]

Martars ai 12 di Març, pre’ Luigi Ciotti al torne in Friûl, par fevelâ di une «legalità al servizio della dignità delle persone, dei diritti, della libertà, contro mafie e corruzione». Il president di “Libera” al intervegnarà a 17, li dal teatri “Palamostre” di Udin. L’apontament al è intitulât “Verso orizzonti di giustizia sociale”.

[ECONOMIE]

La clape pe promozion de Economie solidarie “ProDES” e je daûr a inmaneâ une visite li dal Consorzi des Dolomitis furlanis, te suage dal cors di formazion imbastît parie cul “Ial”, a Pordenon. L’apontament al è programât sabide ai 16 di Març, a 9.30, li de Biblioteche di Tramoncj Disore. Daspò dal gustâ comunitari, si podarà visitâ lis aziendis dal Consorzi. Si varà di prenotâsi dentri dai 14 di Març.