[CULTURE]

Te gnot dai 29 di Decembar, al è muart a Gjiviane, là ch’al jere nassût e là ch’al jere tornât a sto daspò dai agn da l’emigrazion in Gjermanie e jù pe Furlanie, Pieri di Vau, Pierino Pinzan. Classe 1925, za tai agn da l’emigrazion al veve inviât un’ativitât culturâl ferbint, fondant a Colonie il “Coro Friuli” e po “Il Grop corâl Gjiviano”, tornât chenti. Autonomist positîf, al jere deventât colaboradôr di “Int furlane”. Autôr di studis e di ricercjis di storie locâl, al à publicât “Gjiviano. Contos e riguarts”, “Barzaletis in dutis lis cuincis”, “Las glisios de Parochio di Rigulât” e altris libruts inmò. Lis sôs esecuiis a son stadis cjantadis a Gjiviane, ai 31 di Decembar.

[MOSTRIS]

Li dal Museu dai faris di Manià, e restarà imbastide fintremai ai 27 di Genâr la mostre fotografiche “Le 4 stagioni della Valcellina”, par cure dal circul fotografic “L’immagine”. Oraris: lunis, joibe, vinars, sabide e domenie tai oraris 9.30-12.30 15.30-18.30; martars e miercus, 9.30-12.30.

[SCUELE]

La Societât cooperative sociâl “Volta” e la clape “San Luigi Scrosoppi” a organizin il premi scuelastic di filosofie e di science moderne e contemporanie “Luigi Scrosoppi”. A podaran concori i students des scuelis secondariis dal Friûl e di Triest cun lavôrs monografics su la cuistion: “A cinquant’anni dal ‘68. Requiem per una stagione di cambiamento?”. I tescj a varan di jessi presentâts dentri dai 19 di Genâr, li de secretarie de scuele. La premiazion e je stabilide vinars ai 25 di Genâr, a 10.30 li dal Istitût “Volta” di viâl Ongjarie 22, a Udin.

[AMBIENT]

Cuale ise la cundizion dal teritori talian? Cuâi sono i procès naturâi e antropogenics che plui a transformin teritori e paisaç? Une rispueste a chestis cuistions le propon il scandai “Territorio. Processi e trasformazioni in Italia”, curât di “Ispra”, l’Institût superiôr pe protezion dal ambient.Tai ultins 5 agn, e spiche l’incressite dal vert “salvadi” (+4,7%), che i da la volte al teritori curât par secui de agricolture (-4%).

[MOSTRIS]

Si podarà visitâle fintremai ai 24 di Fevrâr la mostre fotografiche “Viaggio tra paesaggi e ritratti” di Martina Zaninello. Le à imbastide l’Ecomuseu des aghis dal Glemonat, li dal Mulin Cocconi di Ospedâl piçul di Glemone. Zaninello e colabore cul “Gruppo Fotografico Gemonese” e e proferìs lis sôs oparis ancje te pagine Facebook “Martina e la Fotografia”. Oraris: sabide e domenie, 10-13 / 16-19.

[CONCORS]

Si varà timp fintremai ai 31 di Lui par presentâ scrits e materiâi multimediâi pal premi “Andreina e Luigi Ciceri”. Tai lavôrs, si varà di profondî «aspiets de culture e dal teritori dal Friûl», mediant saçs libars, tesis di laureade magjistrâl e di dotorât oben documentaris, filmâts e struments interatîfs. Il model par domandâi la amission al concors si pues burîlu fûr tal lûc internet de “Filologjiche”, ch’e organize il concors.

[AMBIENT]

Vinars ai 4 di Genâr, i Comitâts “Libere acque della Val Pesarina” e “Salviamo la Fuina” a organizin une serade su la protezion des aghis in mont e cuintri dal sfrutament idroeletric privât. La convigne, cun Franceschino Barazzutti, Giacomina Pellizzari e Elisa Cozzarini, ch’e presentarà il libri “Radici liquide”, viaç-scandai dilunc i ultins rius alpins scapui, e tacarà a 20.30, li dal auditorium comunâl di Pieria di Prât.

[ECONOMIE]

E je tacade l’organizazion de edizion 2019 dal “Festival dal Svilup sustignibil”, ch’al larà indevant par dute Italie, dai 21 di Mai ai 6 di Jugn, dilunc 17 zornadis, une par ognidun dai obietîfs mondiâl de “Agjende 2030” pal svilup sustignibil de Organizazion des Nazions Unidis.

[LIBRIS]

Il program di educazion a la leture «LeggiAMO» al propon dôs zornadis di formazion par professôrs des scuelis secondariis, bibliotecaris e operadôrs culturâi. A son viertis lis inscrizions pal percors di leture creative di Enrico Galiano “Leggere: una voce del verbo amare” e lis leturis «per adoleggenti e per adulti competenti», “Scappati di Mano”, curadis di Antonio Ferrara. Il prin apontament al sarà proponût li de Biblioteche di Glemone, miercus ai 30 di Genâr (16-18). La seconde convigne e je inmaneade sul cjiscjel di Udin (“Casa della Contadinanza”), vinars ai 15 di Fevrâr (15-17). Si scuen dâsi in note daurman cul modul di pueste.

[SOCIETÂT]

Dentri dai 2 di Avost, lis organizazions dal Tierç setôr a varan di doprâ la sô autonomie statutarie par adatâsi ai principis de leç gnove e dal “Codiç dal Tierç setôr” (D.lgs. dai 3 di Lui dal 2017, n. 117). Par favorî cheste operazion, ai 27 di Decembar, e je saltade fûr la circulâr n. 20 “Codice del terzo settore. Adeguamenti statutari”, che si pues leile a la direzion: www.lavoro.gov.it/documenti-e-norme/normative/Documents/2018/Circolare-ministeriale-n-20-del-27122018.pdf.