[CINE]

Il cine “Visionario” di Udin, vinars ai 2 di Novembar, al presente musichis, peraulis e inmagjinis su la vuere dal 1915. La serade “Note dal fronte!” e tacarà a 20.45 cu la “Zerorchestra”, la vôs di Sandro Buzzatti e proiezions par cure de “Cineteche dal Friûl” sul Cjars, suGurize e su la rivade dai Merecans in Friûl.

[CONVIGNIS]

Vinars ai 2 di Novembar, e tache la schirie di convignis “Ritratti e testimonianze dell’Italia civile”, inmaneade dal Institût furlan pe storie dal moviment di liberazion. A 17.30 li di palaç Antonini, te strade Petracco numar 8 di Udin, Patrizia Gabrielli de Universitât di Siene e fevelarà su “Angelina Merlin: la «dinamica paziente»”.

[AMBIENT]

Ai 2 di Novembar, a son rivâts a Triest, traviersant la Furlanie, i piligrins pe clime, partîts di Rome ai 4 di Otubar e direts a Katowice, in Polonie, dulà che vie pal mês di Decembar e je programade “Cop24”, la conference mondiâl sui mudaments climatics. La manifestazion (popolarizade par Facebook e Instagram a la direzion #InCamminoxilClima@FOCSIV) e je inmaneade de federazion di clapis di volontariât “Focsiv”.

[ECONOMIE]

Par dut il mês di Novembar e par dute l’Italie, i socis di “Banca Etica” a son impegnâts a popolarizâ i valôrs e i risultâts de finance etiche. Il mês di sensibilizazion al varà tal cûr la “Zornade mondiâl de finance etiche”, joibe ai 8 di Novembar.

[LIBRIS]

L’Institût furlan pe storie dal moviment di liberazion, sabide ai 3 di Novembar, al presente a Udin il libri di Patrizia Gabrielli “La guerra è l’unico pensiero che ci domina tutti. Bambine, bambini, adolescenti nella Grande guerra” (“Rubbettino”, 2018). A 18, li de Librarie “Friuli” di strade dai Rizzani, e dialogarà cu l’autore Paolo Ferrari de Universitât furlane.

[SPORT]

Al è programât, sabide ai 3 di Novembar li dal palaç dal sport di Spilmberc, il XII Torneu di “Volley ball sul biroç”. Lis garis a començaran a 10. La premiazion e je stabilide a 17, par cure di “Associazione Centro Progetto Spilimbergo” e “Paravolley free volley gold”.

[LIBRIS]

Li de Latarie di Liariis, sabide ai 3 di Novembar, si presente il libri “Note su Giambattista De Caneva”. La convigne, curade di Paolo De Caneva, e tacarà a 17.

[INFORMAZION]

Tal mês dedicât in dut il mont a la finance etiche, “Tv2000” e scree la gnove seson dal program “Benedetta economia”. Cun Carmelo Barbagallo (“Uil”), Carlin Petrini (“Slow Food”) e cul psicanalist Massimo Recalcati, la transmission e tacarà a 19 di domenie ai 4 di Novembar. Condutôrs a saran l’economist ideatôr di “Benedetta economia”, Luigino Bruni, e Eugenia Scotti.

[TEATRI]

Domenie ai 4 di Novembar, Bruna Braidotti e presente il gnûf spetacul “Si vis pacem, mettete dei fiori nei vostri cannoni”. Il debut al è stabilît a 16.45, li dal Centri civic delle Villotte, a San Cuarin. Il spetacul, promovût, de “Compagnia di Arti e Mestieri”, al onore Bertha Von Suttner, premi Nobel pe pâs 1905 e autore dal romanç “Giù le armi”.

[CONVIGNIS]

Lunis ai 5 di Novembar, la schirie di convignis “Ritratti e testimonianze dell’Italia civile”, inmaneade di “Ifsml” a Udin, e riflet sul slas di Piero Calamandrei. Dimitri Girotto de Universitât furlane al proponarà une relazion intitulade “Piero Calamandrei e il suo contributo alla rinascita della Costituzione italiana”. Apontament a 17.30, li di palaç di Toppo Wassermann di Borc Glemone.