[ECONOMIE]

L’aleance pal svilup sustignibil “Asvis”, joibe ai 4 di Otubar, e proferìs il scandai anuâl “L’Italia e gli Obiettivi di Sviluppo Sostenibile”. La presentazion e je stabilide li dai Grops parlamentârs de Cjamare dai Deputâts, a 10 di buinore. La convigne e sarà transmetude in direte su la rêt des rêts.

[MOSTRIS]

Di chê strade de convigne “Una casa è una casa: l’architettura contemporanea per la qualità del territorio montano”, fate a Midun ai 21 di Setembar, a son stadis imbastidis lis mostris “Dall’architettura spontanea agli interni friulani!”, cu lis fotografiis di Italo Zannier, e “Rassegna di Architetti Arco Alpino”. La prime esposizion si podarà visitâle ancjemò ai 14 di Otubar (10-19), li di palaç Colossis. La seconda e tornarà a viergi ai 6 e ai 7 di Otubar, li dal ripâr “Valinis”.

[CONVIGNIS]

Marco De Paolis e Paolo Pezzino a rivin a Udin, joibe ai 4 di Otubar, par presentâ il libri “La difficile giustizia / I processi per crimini di guerra tedeschi in Italia 1943-2013”. La convigne, inmaneade de clape “Partigiani Osoppo Friuli”, e tacarà a 17.30 li de “Fondazione Friuli” te strade Manin 15 di Udin, cul jutori dal Institût furlan pe storie dal moviment di liberazion.

[CONVIGNIS]

Matteo Ermacora di Glemone, dotôr di ricercje in Storie sociâl europeane, e Paolo Pozzato di Bassan, diretôr dal Institût storic de Resistence e de Ete contemporanie di Vicenze, vinars ai 5 di Otubar, a cjacararan a Tumieç su “La Rotta di Caporetto lungo le strade e nei paesi del Friuli e della Carnia”. La convigne, inmaneade de clape di studis e di ricercjis storichis e archeologichis “Carnia Cultura”, e tacarà a 18 li dal municipi.

[LIBRIS]

Vinars ai 5 di Otubar, li dal Museu de “Arte fabbrile e delle Coltellerie” di Manià, si presente a 18 il libri “L’Agana del Colvera”, ch’al slungje la golaine editoriâl “Salamandre” dal Ecomuseu dal Friûl ocidentâl “Lis Aganis”.

[POLITICHE]

Pacifiscj e ambientaliscj a denuncin l’ocupazion dal comprensori de mont Bivare, parsore Sauris/Zahre, par colpe di gnovis esercitazions militârs, ch’a inderedaran lis ativitâts agriculis e turistichis e la viabilitât dai Cumons di Sauris, di For Disot e di For Disore. «I efiets negatîfs causionâts de sclavitût militâr su la Bivare – al à declarât il responsabil pe montagne di “Legambiente”, Marco Lepre – a varessin di fâ rifleti ducj chei che, magari cussì no ancje tal Consei regjonâl, a son persuadûts ch’al coventi tornâ a inviâ il servizi militâr obligatori».

[CORS]

Sabide ai 13 di Otubar, il Circul “Mdf” Livence-Tiliment, cul jutori de clape “Pratichiamo il futuro” al organize un cors di “Compostaggio domestico”, cun Andrea Pavan. Lis lezions a laran indevant di 14.30 a 18.30, li dal Centri educatîf “Pratichiamo il Futuro” di strade Udin 35, a Setim di Cint (inscrizion obligatorie).

[SALÛT]

La clape regjonâl dai Clubs dai alcoliscj in tratament “Arcat” (whatsapp 334 6627138) e propon, a Roncjis, dai 5 ai 10 di Novembar, un Cors di sensibilizazion sul mût ecologjic e sociâl di frontâ i problems leâts cul alcul “Metodologjie Hudolin”. Si varà di dâsi in note dentri dai 31 di Otubar.

[CONVIGNIS]

Une convigne di monsignôr Luigi Bressan su “Religioni in Cina ed evangelizzazione. Il viaggio del beato Odorico da Pordenone”, ai 11 di Otubar, e à screât l’anade gnove de “Scuele catoliche di culture”. I “Percors” dai mês di Otubar e di Novembar a tacaran a 18, li dal Centri culturâl “Paulin di Acuilee” tal Borc di Trep di Udin, cul jutori dal “Moviment eclesiâl d’impegn culturâl” (udine.meic@gmail.com).

[MOSTRIS]

Domenie ai 14 di Otubar, e cole la “Zornade des fameis tai Museus”. Il program, cu lis iniziativis inmaneadis te Patrie, al è a disposizion su la rêt des rêts. In specialitât, al sarà atîf cun propuestis par ducj il Museu archeologic di Cividât, in convigne cul Museu cristian.