[SCUELE]

E restarà vierte fintremai ai 28 di Otubar la mostre “Un tempo… sui banchi di scuola”, screade il I di Setembar, a Udin, li dal Museu etnografic dal Friûl di Borc di Greçan. Oraris: martars-domenie, 10.30-19. A son esponûts documents, inmaginis e ogjets des Scuelis elementârs di Udin dal 1866 al 1939.

[MOSTRIS]

Ecomuseu “Val Resia” e Parochie a son daûr a imbastî une mostre su lis fiestis religjosis de Rozajanska Dolina/Val di Resie. Ducj chei ch’a intindin di colaborâ a son invidâts a mandâ par pueste eletroniche lis sôs fotografiis. Cui che nol cumbine cussì al podarà fâsi judâ li dal ufici “Ragioneria” dal Cumon.

[CORS]

Ai 4 di Setembar, li di “Vile Dora”, a San Zorç di Noiâr, si podarà cjapâ part a un cors di formazion, curât di “Abi” (Associazion bibliotechis), par ducj i operadôrs ch’a àn chê di inviâ dai grops di leture. La partecipazion e je a gratis pai associâts e e costarà 90 euros par chei altris. Il cors al tache a 9.30.

[MOSTRIS]

Fintremai ai 16 di Setembar, li dal Museu de prime vuere mondiâl di Gurize, si podarà visitâ la mostre “Gli alberi di San Martino del Carso”, par cure di “ERPaC Musei Provinciali Gorizia”. L’“Arbul di Dobardò” al jere calcolât come une relicuie dai soldâts ongjarês ch’a àn scombatût sul Cjars; chel che i soldâts talians a clamavin l’“Albero isolato” al à inspirât la poesie “San Martino del Carso” di Giuseppe Ungaretti. Oraris: martars-domenie, 9-19.

[TEATRI]

Martars ai 4 di Setembar, il “Css” di Udin al presente al public la seson “Teatro Contatto 37”. Apontament a 18, li dal teatri “Palamostre”. A intervegnaran: Alberto Bevilacqua, Rita Maffei, Fabrizia Maggi e Luisa Schiratti de direzion artistiche dal teatri stabil regjonâl di inovazion.

[ECONOMIE]

Il “Consorzio agro-silvo-pastorale delle Valli e delle Dolomiti friulane”, nassût vie pal mês di Fevrâr dal 2017 par svilupâ un proget inovatîf di economie solidâl, sabide ai 8 di Setembar, al scree la strade che de Forcje di Rest e puarte fin sù in Casere Rest, dulà ch’al à passonât vie pal Istât il mac di pioris dal Consort. La ceremonie e cole a 10 e la fieste e larà indevant fin 13.30. In zornade di vuê, il Consort al congreghe 25 aziendis agricolis e forestâls de Val Celine e dal Cjanâl dal Argìn. Al colaborare cul Ambit disretuâl 6.4 e cul Distret sanitari cun azions d’inclusion sociâl e lavorative, cul fin di svilupâ un “welfare” di Comunitât gnûf tes monts dal Friûl ocidentâl.

[CONVIGNIS]

Sabide ai 8 di Setembar, il zornalist catalan Carles Vallejo, Marco Puppini e Matteo Tomasoni a saran i protagoniscj de convigne “Riflessioni su idee, principi, esperienze umane e politiche” su la vuere civîl di Spagne (1936-1939). In specialitât, si ricuardarà Ido Osvaldo Faleschini, muart za fa 80 agn su la Sierra Caballs.

[TEATRI]

Domenie ai 9 di Setembar, li di Vile Dora di San Zorç di Noiar, al ven rapresentât a 21 il spetacul “Scemi di guerra”, par cure de companie “Arti&Mestieri”. Il teatri al fevele de tragjedie dai manicomis de prime vuere mondiâl tal Friûl e tal Venit.

[ECONOMIE]

Domenie ai 9 di Setembar, al torne li da “La Frasca” di Cjamp (in face dal Centri ricreatîf), il “Marcjât contadin”, par cure dal “Ecomuseu des aghis” e dal Circul culturâl ricreatîf. L’apontament cu lis aziendis agriculis dal Glemonat al larà indevant la prime domenie di ogni mês, di 9 a 13.

[TEATRI]

Sabide ai 8, la dì de fieste de Madone di Setembar, si scree la rassegne “i Teatri dell’Anima”. A 19.30 li des grotis di Pradis di Clausêt, la companie “Teatri de Gli Incamminati - deSidera Teatro” e presente “Magnificat” di Alda Merini. A 18, si podarà ancje visitâ lis grotis.