[AMBIENT]

Il Grop di ricercje di geografie de Universitât furlane al è daûr a a svilupâ un progjet su “I PAesaggi del RIschio e del DEgrado nella regione Friuli-Venezia Giulia” (“Paride”). Par colaborâ si pues compilâ un cuistionari a disposizion su la rêt des rêts. In specialitât e je domandade la colaborazion des personis ch’a colaborin tes associazions dal setôr ambientâl e ch’a àn une sensibilitât speciâl su la cuistion de degradazion dai paisaçs. La direzion dal cuistionari “on line” e je: https://enketo.ona.io/single/::H4rfcSiq.

[DIASPORE]

Il Coordenament pal biel acet di Glemone, ch’al lavore par favorî l’integrazion dai dispatriâts ch’a vivin tal teritori, domenie ai 5 di Avost, al invide la Comunitât di Glemone al “Pranzo senza confini”. A misdì, li dal Centri parochiâl di “Salcons” si daran dongje ducj chei ch’a son prenotâts. «E sarà un’ocasion – a disin i orgsanizadôrs – par publicâ, mediant dal at di mangjâ in companie, i valôrs dal biel acet e dal dialic interculturâl».

[MOSTRIS]

Fintremai ai 12 di Avost, li di Mulin Cocconi di Ospedâl di Glemone, si pues visitâ la mostre “Se io potessi…”, une conte cun tescj in poesie di Antonella Iaschi e fotografiis di Villiam Covasso. Oraris: di martars fin domenie, 10 alle 18. L’iniziative e je curade dal “Ecomuseu da lis aghis” dal Mandament di Glemone.

[INFORMAZION]

Intant de Fieste di San Laurinç di chest an al saltarà fûr il numar 25 dal “Giornalino di Clavais”. Ducj i numars de schirie, curade de clape culturâl “Clavajas”, si pues leiju ancje su la rêt des rêts.

[CINE]

Il cine ch’al conte la storie dai furlans ch’a àn fat la ferade “Transiberiane”, “I dimenticati della Transiberiana” di Christiane Rorato (www.christiane.rorato.fr), al ven proietât domenie ai 5 di Avost, a San Tomâs di Majan, li dal “Hospitale”. Il dopomisdì culturâl cu l’autore al tacarà a 17, inmaneât dai “Amici dell’Hospitale”, cul jutori dal Cumon.

[SALÛT]

Domenie ai 5 di Avost, e torne a Zuviel di Ravasclêt la fieste cence bevandis alcolichis “Fiesta indifarent”. Daspò de messe, cjantade a 10.30, si podarà cjerçâ gustâs cjargnei di ogni fate, compagnantju cui scirops e cu lis bibitis sielzudis di “Slow food Carnia e Tarvisiano”. La Comunitât e je prudelade te organizazion dal Club dai alcoliscj di Lauc e de Associazion cjargnele dai Clubs, de Glesie e dal Cumon. A 14.30, teatri cun Madame Clelia” e po intrateniments musicâi e solidaris.

[AMBIENT]

Si pues firmâ ancje su la rêt des rêts la “Cjarte dal lât”, ch’e domande la rinaturalizazion dal plui grant lât naturâl de Patrie, par une valorizazion vere, tal cjamp ambientâl, turistic e in chel de pescje, come ch’al à vût stât prime de invasion idroeletriche.

[MUSICHE]

Miercus ai 8 di Avost, la dì ch’al varès finît 51 agn, la Comunitât di Scluse e ricuarde il poet Pierluigi Cappello, muart tal mês di Otubar di an passât. A 20.30, li dal Centri scuelastic “Manlio Amadori”, e sarà proponude une serade cun leturis, contis e musichis. Stefano Montello e Cristina Mauro a presentaran l’inedit “Questa libertà” e chês altris cjantis scritis di Cappello pai “Flk” (“Letare” e “Se il nero”).

[ECONOMIE]

L’agenzie des Nazions unidis “Fao” e à publicât il scandai su la “Condizion des forestis dal mont 2018”. La publicazion, sometude su la rêt des rêts, e profondìs il leam fra gestion forestâl sustignibil e Obietîfs pal svilup sustignibil (“Sdgs”) de “Agjende 2030” pal svilup sustignibil (massime i obietîfs 15 e 12).

[MOSTRIS]

La mostre “Friûl 1955”, ch’e propon lis fotos da agns dal Cincuante dal “Gruppo Friulano per una Nuova Fotografia” (Aldo Beltrame, Carlo Bevilacqua, Gianni Borghesan, Giuliano Borghesan, Toni Del Tin, Fulvio Roiter e Italo Zannier) e je imbastide a Barcis, li de “Scuola d’Ambiente”. E restarà vierte fintremai ai 2 di Setembar, ducj i dîs de setemane, 10.30-12.30 / 15-18, par cure de clape “Pro Barcis” e dal Cumon, cul jutori di “Craf”.