[POLITICHE]

Intun piçul e legri videu, il Laboratori de sussidiaritât “Labsus” al presente cemût che in Italie si à inventât i «Compatâts di colaborazion», par permetiur ai citadins di impegnâsi, cu lis ministrazions publichis, tal recupar e te valorizazion dai Bens comuns. Mediant de sussidiaritât, ricognossude tal articul 118 de Constituzion, l’interès generâl al devente pratiche cuotidiane, in formis flessibils, viertis e inclusivis.

[MOSTRIS]

A Trep, in Cjargne, li de Pinacoteche “De Cillia”, e restarà imbastide insin ai 30 di Jugn la mostre “Vita di Gina Marpillero nel Novecento friulano”, par cure de biblioteche comunâl di San Zorç di Noiâr. Oraris: sabide, 16-18; domenie, 15-18. Vie pe setemane, si scuen prenotâsi par telefon (0433 777023).

[LIBRIS]

Martars ai 5 di Jugn, la Glesie furlane di Udin e presente l’opare “L’Epistolario di Pio Paschini (1898-1962)”, doi volums di mil e 200 paginis, stampâts di “Forum”, par cure di Michela Giorgiutti, te golaine dal Institût “Pio Paschini” “Fonti per la storia della Chiesa in Friuli. Serie moderna e contemporanea”. La presentazion e tacarà a 18, li dal Centri culturâl “Paulin di Acuilee”, in borc di Trep, a Udin. A intervegnaran: Bernard Ardura, president dal Comitât pontifici di Sciencis storichis; Andrea Zannini, diretôr dal Dipartiment di Studis Umanistics e dal Patrimoni culturâl de Universitât furlane; e Gianpaolo Romanato, storic de Universitât di Padue. L’atôr Fabiano Fantini al learà cualchi bocon di letare dal storic tumiecin (www.friul.net/dizionario_biografico/index.php).

[CONVIGNIS]

“Fai” Udine e sezion regjonâl dal Institût dai cjiscjei, cul jutori de Soreintindince, a organizin la convigne “Il sistema fortificato nel paesaggio fra memoria, restauro e contemporaneità”. Apontament a 16.30 di joibe ai 7 di Jugn, a Udin. Li de abitance de Soreintindince, te strade Zanon, a intervegnaran: Chiara Bettuzzi, Federico Bulfone Gransinigh e Stefania Casucci.

[CINE]

“I custodi dell’acqua” al torne te Americhe Latine. Al è stât invidât dal “Festival Internacional de Cinema e Vídeo Ambiental” (“Fica”), programât a Goiàs, in Brasîl. La proiezion dal documentari ch’al conte la lote cjargnele par difindi la gestion coletive de aghe (www.icustodidellacqua.it) e je stabilide par sabide ai 9 di Jugn, li dal “Cineteatro São Joaquim”, a 17.30 e a 20.45.

[ECONOMIE]

Vinars ai 8 di Jugn, sul fuart di Osôf, l’Ecomuseu des aghis dal mandament di Glemone al invide a une convigne cu la “Associazione Friulana Olivicoltori” (“Afrol”). A 20.30, li dal ambient “La Fortezza”, si presentarà il vueli “Evo”. Tal mandament di Glemone, si prodûs ogni an 10 mil litris di vueli di ulive e la clape “Afrol” e calcole ch’a son stâts implantâts fra 10 mil e 12 mil ulîfs.

[SALÛT]

L’Europe e à sielzût Lignan par inmaneâ la XVII edizion dai Zûcs europeans par int ch’e à vût un straplant di cûr o di palmon, «Ehltc». I campionâts, cun atletiscj di ogni etât e cun garis svareadis, a son programâts dai 11 ai 16 di Jugn, li dal «Villaggio BellItalia» (ex «GeTur») e tai contors. I zûcs a saran screâts cuntune sfilade, lunis ai 11 di Jugn a 17.

[MUSICHE]

Al torne il “CantaFestival de la Bisiacarìa”, il concors musicâl de Comunitât bisiache dal Friûl, rivât a la XV edizion. Lis cjantis pal concors, scritis par bisiac e ineditis, a varan di rivâ li de Pro loco di Mafalcon dentri dai 10 di Avost. Si pues concori tes sezions “Melodiis tradizionâls” e “Melodiis dal dì di vuê”.

[ECONOMIE]

Ancjemò une volte, il lûc internet “Pianeta Psr”, curât dal Ministeri pes politichis agriculis, di “Ismea” e di “Crea”, al tamese il stât di aplicazion dal “Plan di svilup rurâl” tes Regjons talianis. La situazion dal Friûl-V. J. si conferme dramatiche. In cont di spese dai finanziaments europeus, il scandai “Disimpegno e riserva di performance: la corsa dei PSR italiani riparte nel primo trimestre 2018”, al denuncie: «Sul versante opposto le percentuali più basse in Italia vengono registrate purtroppo dai PSR della Liguria e Friuli Venezia Giulia con il 5% e il 6% di attuazione finanziaria». La Regjon e figure fra chês ch’a riscjin di plui il «disimpegno automatico», al ven a stâi l’oblic di tornâ indaûr bêçs se no si rivarà a spindi une percentuâl stabilide sui finanziaments imprometûts. Friûl e Vignesie Julie a fasin une figurate ancje te percentuâl di atuazion finanziarie a pet dal «target intermedio prefissato», ferme al 30%, e dal «target finanziario della riserva», sot dal 20%. L’articul complet di Luigi Ottaviani al pues jessi let su la rêt des rêts.

[AMBIENT]

Miercus ai 13 di Jugn, “Legambiente”, “Mountain Wilderness”, “Wwf”, “Cai” e “Asca” a sclarissaran cemût mai ch’a domandin di no permeti ni la “Motocavalcata delle Alpi Carniche” ni altris manifestazions par motârs di chê fate. Lis resons par une «frecuentazion responsabil» des monts a saran proferidis a 11, li dai uficis di “Legambiente” di viâl Leopardi, a Udin, intant di une conference stampe. La XII edizion de “Motocavalcata” e podarà jessi inmaneade dome se la “Uti cjargnele” e permetarà di no ubidîi a la la leç regjonâl 15/1991.