[CONVIGNIS]

Dai 25 ai 27 di Mai, al torne a San Denêl il “Festival de Constituzion”. Chest an, mediant di convignis, di spetacui e di mostris, al frontarà il contignût dal articul 9: «La Republiche e difint il paisaç”.

[INFORMAZION]

L’Institût internazionâl di Stocolme pes ricercjis su la pâs “Sipri” al à publicât il scandai su lis lis spesis militârs globâls pal 2017. Il studi al è presentât ancje dal Centri pai derits umans di Padue (http://unipd-centrodirittiumani.it/it/news/SIPRI-pubblicati-i-dati-sulle-spese-militari-globali-per-il-2017/4631).

[CONCORS]

Lis oparis ch’a intindin di concori pal premi internazionâl di poesie e di prose “Giulietta e Romeo Savorgnan”, inmaneât de “Accademia Città di Udine”, a varan di rivâ par pueste (strade Anton Lazzaro Moro 56) dentri dai 20 di Mai. In forme anonime, si podarà presentâ poesiis par furlan, par talian e in ogni lenghe foreste e contis curtis par talian.

[CONCORS]

Il concors leterari “Caterina Percoto”, inmaneât dal Cumon di Manzan, al premiarà saçs zornalistics o contis curtis, scrits di autôrs grancj, e tescj su lis 5 mil batudis di calcoladôr, scrits di students fra 10 e 18 agns. Lis oparis, tant par furlan che par talian, a varan di jessi inspiradis dal bocon de conte de Percude “Bastare a se stessi”, ch’al dîs: «qualunque sia il rango e la fortuna che ci è dato possedere a questo mondo: qualunque siano i favori di cui ha voluto colmarci il destino, la più grande di tutte le ricchezze è quella di potere in ogni tempo, in ogni luogo e in ogni età bastare a se stessi». Il premi al scjât ai 25 di Mai.

[POLITICHE]

La Cort constituzionâl, a la barbe des modis, e continue a doprâ la liniute tal non de Regjon Friûl-V. J. te istesse maniere che le vevin doprade i constituents dal 1948, marcant l’union di teritoris disferents tune instituzion uniche. Il zornalist Claudio Carlisi al invide a lâi daûr a di chel spieli parcè che «i Costituenti eletti nel 1946 erano più colti, intelligenti e preparati di quelli successivi che hanno poi fatto confusione» e parcè che, tal articul 131 de Constituzion taliane, la liniute e reste cul istès significât ancje par Emilia-Romagna e Trentino-Alto Adige.

[LIBRIS]

Joibe ai 17 di Mai, a 18 li di Cjase Cavazzini di Udin, il Museu d’Art moderne e contemporanie al presentarà il volum “Alfons Mucha. L’artista e il suo tempo” di Jiří Mucha. Vania Gransinigh e cjacararà de vore cu la tradutore Tiziana Menotti e cul architet Giorgio Ganis.

[CONVIGNIS]

Marie-Noelle Snider, invidade de Biblioteche “Giuseppe Zigaina” di Çarvignan, vinars ai 18 di Mai, e cjacare li de “Cjase de musiche” sui “Soldâts furlans e trentins in Russie a la fin de Prime vuere mondiâl” e su la lôr “odisee”. La convigne e tache a 18.

[TEATRI]

Il “Duo Mamè” e Tapani Mononen, vinars ai 18 di Mai, a presenti il spetacul “Aspettando Varesta”, a 20.30 li dal auditorium di Paulêt. Inspirade di “Aspettando Godot” di Samuel Beckett, la rapresentazion e misture teatri classic, art de claunerìe e art dal circ. Si esibissaran: Marcello Fares, Marianna Fontanelli e Tapani Mononen.

[MOSTRIS]

Sabide ai 19 e domenie ai 20 di Mai, e torne la “Fieste dai Museus” europeans. Il Ministeri talian pai Bens culturâi al à proponût come titul de manifestazion “Musei iperconnessi: nuovi approcci, nuovi pubblici”. Il Museu archeologic di Cividât al smire di deventâ protagonist de fieste, proponint sabide ai 19 di Mai une gnot dedicade a “Invasioni barbariche e invasioni digitali tra narrazione e connessione”, di 20 a 23, cuntun spetacul proponût de “Associazione di Rievocazione longobarda La Fara”. Domenie ai 20 di Mai, la propueste “Scopriamo il nostro museo” e sarà destinade, di 8.30 a 19.30, ai fruts.

[SCUELE]

Fintremai ai 25 di Mai, li di palaç Antonini, abitance storiche de Universitât furlane, si podarà visitâ la mostre “Nascita di un ateneo. Dal terremoto una tenda per il futuro”. Di chê strade, si smire di ricuardâ il XL dal Ateneu, nassût in gracie dal “Comitât pe Universitât furlane” dal professôr Tarcisio Petracco (www.friul.net/dizionario_biografico/index.php).