[SALÛT]

Ai 2 di Avrîl, e cole la “Zornade mondiâl de cussience sul Autisim”, inmaneade des Nazions unidis. Unevore di monuments, comprendût il municipi pordenonês, a saran inluminâts di blu, par prudelâ la campagne mondiâl “Light it up blue”. La “Fondazione Bambini e Autismo” di Pordenon, ch’e je daûr a fiestezâ il XX, e propon il lunari complet di dutis lis iniziativis programdis in Friûl, suntune pagjine Facebook di pueste.

[TEATRI]

Miercus ai 4 di Avrîl, li dal teatri “Zan Zorç” di Udin, il “Css” al presente il spetacul “Fuori fuoco”, gjavât dal romanç di Chiara Carminati, “Premio Strega 2016 ragazzi”. La rapresentazion e tacarà a 20, cun Leo Virgili, Roberto Amadeo e Paolo Paron.

[DIASPORE]

Joibe ai 5 di Avrîl, si presente a Çuian il scandai civic “Accoglienza dei migranti richiedenti protezione internazionale in Friuli-V. G., intant de convigne “Accoglienza migranti / Chi, come, con quali risorse”. A 15, li dal Centri “Pre’ Ernesto Balducci”, a intervegnaran Paolo Tomasin e Gianni Cavallini di “Rete Numeri Pari - Libera”, Gianfranco Schiavone di “Consorzio italiano di solidarietà”, Paolo Zenarolla di “Caritas Udin”, Gian Luigi Bettoli di “Legacoopsociali” e Luca Fontana di “Federsolidarietà”. A saran ancje proietâts i videus di Paolo Comuzzi e di Andrea Trangoni su “Nuovi Cittadini” e il film “Dirittti” di Daniele Fabbro.

[CINE]

La proiezion dal cine “Food ReLOVution”, presint il regissêr Thomas Torelli, al è il motîf dal apontament programât di “Banca etica” e dal “Visionario” di Udin, vinars ai 6 di Avrîl. La serade “Tutto ciò che mangiamo ha una conseguenza”, cu la colaborazion dal “Gas furlan”, e tacarà a 20.30 li dal cine di strade Asquini 33.

[NAZIONS]

Ancje la Patrie si mobilite, alfin, par pandi solidaritât cul popul catalan. Sabide ai 7 di Avrîl, al sarà inmaneât un “flash mob” par difindi la libertât e i derits democratics de Catalugne, di 11 fin misdì, te place San Jacum di Udin. I partecipants si vistissaran cun alc di zâl e a puartaran cun se lis banderis dal Friûl e de Catalugne.

[SOCIETÂT]

Miercus ai 11 di Avrîl, li dal Puart di Mafalcon, “Carico Sospeso” (https://www.facebook.com/profile.php?id=100009254355967) al torne a memoreâ Franco Cicciarella. A une dopo misdì, li de targhe comemorative, al sarà ricuardât il XIII innovâl de sô muart, par colpe di un incident sul lavôr. Clamant dongje coleghis, amîs e int de famee, “Carico Sospeso” nol dismentee che, dal inizi dal an, in Italie a son za muarts sul lavôr 159 di lôr, «fat ch’al mostre trop lontane ch’e je ancjemò l’ete de sigurece sul puest di vore».

[CORS]

Vinars ai 13 e sabide ai 14 di Avrîl, il Circul “Mdf Livenza-Tagliamento”, al propon un altri dai siei cors “UniSF” par imparâ la legre diminuzion. Li dal Oratori “Pio X” di Puart (strade Liguria 46), Pasquale Pizzichetti al proponarà la “Ricolte de aghe de ploe” (vinars, 20.45-22; sabide, cun ativitâts pratichis, 15-17). Si scuen dâsi in note par pueste eletroniche.

[MOSTRIS]

Fintremai ai 31 di Mai, il Museu dal Dom di Udin al propon la mostre “Hic Passio. Klaus Karl Mehrkens nel Battistero di Udine”. La mostre e je dedicade a ducj i gjenitôrs ch’a àn pierdût un fi. Oraris: lunis-sabide, 10-12 / 16-18; domenie, 16-18.

[CULTURE]

Raffaele Antonio Caltabiano, Alessandra Marin e Sergio Pratali Maffei, joibe ai 12 di Avrîl, a tegnin sù a Udin une des convignis de schirie “Incontriamoci in Soprintendenza”. A 17 li di palaç Clabassi (strade Zanon 22), a cjacararan su “Conservazione, valorizzazione e rigenerazione del patrimonio industriale. Studi e progetti per l’Amideria Chiozza a Ruda”. Di chê strade, e restarà imbastide fintremai ai 7 di Mai une mostre cui progets dai students de Facultât di Architeture de Universitât furlane.

[GLESIE FURLANE]

La clape culturâl evangjeliche “Guido Gandolfo” e propon la convigne “Testamento spirituale di Martin Luter King a 50 anni dal suo martirio”. Vinars ai 13 di Avrîl, la cuistion e sarà frontade a 18, li de Fondazion “Friûl” di strade Manin 15, dal pastôr valdês Marco Fornerone.