[POLITICHE]

“E Trieste si prende tutti gli uffici”: il zornalist Claudio Carlisi al à intitulât cussì il so ultin intervent dulà ch’al continue a denunciâ i dams che l’unitât cun Triest i causione al Friûl. Il puest «più decentrato (cioè scomodo da raggiungere) della regione» al à bielzà i uficis di 1. Procure generâl, 2. Cort d’apel, 3. Procure minorîl, 4. Tribunâl pa mularie sot pupîl, 5. Tribunâl di sorveliance, 6. Tribunâl ministratîf, 4. Procure regjonâl de Cort dai conts, 5. Cort dai conts sezion jurisdizionâl, 6. Sezion di control, 7. Comission tributarie, 8. Avocature di stât, 9. Comissari pai Ûs civics, ma pal procuradôr de Republiche di Triest, Carlo Mastelloni, si varès di puartâ a Triest ancje “Ros”, “Nas”, “Noe” e “Nucleo patrimonio artistico” dai Carbinîrs. «Dopo questa dichiarazione – al à scrit Carlisi – mi aspettavo una protesta generale di deputati, senatori, consiglieri friulani, o quanto meno udinesi, articoli sui giornali locali. Nulla di tutto ciò».

[MUSICHE]

Vinars ai 5 di Zenâr, la clape culturâl “Makakos” e organize a Prât, in Cjargne, il spetacul cun Marco Anzovino “Libro in musica”. L’artist al intervegnarà a 18, li dal auditorium comunâl, par presentâ il libri e il disc “Le ragazze al terzo piano”. Cun lui, e cjantarà Veronica Bitto.

[ECONOMIE]

La buteghe solidâl di Udin, “Pan&Gaban”, e je logade te strade Marangoni, al numar 99. Si pues visitâle martars (10-12), joibe (15-18) e sabide (9.30-12). Par ducj, 3 possibilitâts: regalâ, sielgi alc e deventâ volontaris.

[ECONOMIE]

Fra i progets finanziâts sul spirâ dal 2017 de Agenzie taliane de cooperazion internazionâl, al è jentrât ancje chel che il Centri udinês “Cevi” al curarà par 3 agn in Bolivie. Il proget “Pachamama: Protagonismo delle donne rurali per l’affermazione della sovranità alimentare in Bolivia” al vegnarà svilupât tes valadis de regjon di Cochabamba, ingaiant sore il dut lis feminis par ch’a deventin protagonistis tai spazis dulà che si definìs lis politichis de sigurece alimentâr e par ch’al sedi ricognossût il lôr derit a l’aghe, a la tiere e a un’alimentazion come cu va.

[MOSTRIS]

E restarà vierte fintremai ai 4 di Fevrâr la mostre fotografiche di Elio Ciol (www.friul.net/dizionario_biografico/index.php) “I Putti del Pordenone”. E je imbastide li de galarie “Due piani” di Pordenon, al numar 4 de strade Ospedale Vecchio. Si trate di une schirie di fotografiis ineditis ch’a ritratin particulârs des oparis dal pitôr Giovanni Antonio de’ Sacchis (www.friul.net/dizionario_biografico/index.php). Oraris: martars-sabide, 15.30-19.

[CINE]

Lunis ai 8 di Genâr, si presente a Udin “The New Wild - Vita nelle terre abbandonate” di Christopher Thomson. L’anteprime, curade dal regissêr in persone, e tacarà a 20.30 li dal cine “Visionario” (www.visionario.movie), te suage de rassegne “Sguardi sul Friuli”. Thomson, nassût a Londre, al vîf di 7 agn a Dordole, te Val Aupe.

[ECONOMIE]

Il Circul pe legre diminuzion de Livence e dal Tiliment (www.facebook.com/groups/mdflivenzatagliamento/ - www.decrescitafelice.it) al torne a dâsi dongje, ai 10 di Genâr. La riunion e tacarà a 18.30, li di “Plus+” di Sumaghe di Puart (viâl Treviso 74).

[MOSTRIS]

A Rezija/Resie, e restarà vierte fintremai ai 28 di Genâr la rassegne dal “Lunari fat in Cjargne e no dome”. L’esposizion e je imbastide li dal Centri culturâl “Rozajanska kultürska hïša” (al numar 1 di vie Varcota, fra Bila/San Zorç e Ravanca/Prât), par cure di “Il Gjornêl” di Dimponç e circul “Rozajanski dum”. Ogni sabide e domenie, orari: 10-13 / 14-16.

[MOSTRIS]

La mostre gnove imbastide li dal centri “Lou Pourtoun” di Sant Antoni di Oustano/Ostana su «Il mondo rurale tra ’800 e ’900» e presente ancje oparis di Giuseppe Zigaina e di Armando Pizzinato (www.friul.net/dizionario_biografico/index.php). E restarà vierte tal paisut su lis Alps ocitanis fintremai ai 2 di Avrîl (ogni domenie, 11-16).

[CONCORS]

Ducj chei di Paulêt, s’a àn finît 18 agns, a puedin cjapâ part al concors inmaneât dai “Beni Marsure”, cul fin di realizâ il “logo” pe ministrazion ch’e ten cont de propietât coletive da la Comunitât. Lis propuestis a varan di jessi prontis pai 31 di Març.