[CINE]

Il documentari “I Custodi dell’Acqua”, ch’al conte lis lotis cjargnelis par difindi l’aghe e la sô gestion comunitarie, al à stât zaromai proietât 70 voltis, in Friûl e ator pal mont. Passât chest travuart, al rive ancje tes librariis, dulà che si podarà cjatâ il “dvd”, confezionât a man, un par un. Par cumò, al sarà a disposizion in 3 librariis e li dal cine “Visionario”, a Udin; e intune librarie a Tumieç.

[MOSTRIS]

Fintremai ai 25 di Fevrâr, li di Cjase Cavazzini di Udin, la Galarie d’art moderne e presente la mostre “Il fascino del reale. Dipinti tra Otto e Novecento dalle collezioni del museo”. Protagonist principâl da l’esposizion Giovanni Napoleone Pellis e la sô opare “Il viatico in montagna”, apenis regolât.

[MOSTRIS]

Lis “Pro loco” dal Friûl, ancje chest an, a son daûr a inmaneâ i siei Preseps. La grande rassegne e je coordenade de manifestazion “Giro Presepi”, ch’e à un lûc internet di pueste e une guide cun sîts e oraris pes visitis, che si pues ancje discjamâ su la rêt des rêts. (www.prolocoregionefvg.it/scarica-gratis-la-guida-giro-presepi-fvg-2/).

[LIBRIS]

La Filologiche furlane e presente il so “Strolic” pal 2016 a Clausêt, Monfalcon, Dargin e Cjasteons di Çopule. Joibe ai 7 di Decembar, al cole l’apontament di Clausêt, programât a 17.30 li dal municipi. La presentazion pe Bisiacarie e je stabilide vinars ai 8 di Decembar, a 17, li dal teatri dai Sants Nicolau e Pauli. L’apontament a Dargin al sarà sabide ai 9 di Decembar, a 17.30 li dal municipi. Si finissarà la schirie da lis presentazions la dì di Sante Luzie, ai 13, li de “Galarie Civiche d’Art Celso e Giovanni Costantini”, a 20.30.

[AMBIENT]

La centrâl eletriche di Monfalcon, fra chês che in Italie a van a cjarvon, e je la seconde plui viere. E funzione di 52 agns e il so impat al è strasordenari. Par chel, il Comitât “No Carbone” dal Gurizan al fâs apel par ch’e vegni sierade cence spietâ il 2025, cuanche daûr de Strategje energjetiche taliane, dutis lis centrâls a cjarvon a varan di jessi distudadis par rispietâ i impegns stabilîts dal Compatât di Parîs “Cop21”. Il Comitât ambientalist al domande l’impegn di dutis lis istituzions locâls, dal Comun a la Regjon, par impegnâ il gjestôr “A2A Energie Future”.

[SOCIETÂT]

A Merêt e a Tramonç, si fâs memorie di “Paola”, di “Battisti”, di “Sergio” e dai 10 fusilâts dal Cjanâl di Tramonç. La LXXII comemorazion e tacarà sabide ai 9 di Decembar, a 10.30 te place Jole De Cillia di Savalons. Domenie ai 10 di Decembar, la ceremonie e sarà fate a 10, li dal cimitieri di Tramonç Disot, e po si larà sù fin Palcoda.

[CULTURE]

Sabide ai 9 di Decembar, si presente in Aquilee, a 20.30 li de cjase Serravalle Stabile di strade San Zuan, il “Lunari 2018 / I paîs sot il tôr di Aquileia”. Lu àn curât Giorgio Milocco, Maurizio Puntin e Alessandro Pian, cun Maurizio Barut, ch’al è ancje l’editôr.

[CINE]

Dai 11 ai 29 di Decembar, fra Cervignan e Dobie, Gurize, Pordenon e Udin, si fasarà la X edizion dal “Piccolo festival animazione”. Di chê strade, al sarà a Udin Michaël Dudok de Witt, ch’al presentarà a 20.30 di martars ai 12 di Decembar, li dal “Visionario”, la sô vore “La tartaruga rossa”.

[GLESIE FURLANE]

Vie pal 1981, pre’ Gilberto Pressacco si è indotorât in teologie dogmatiche a Rome cuntune tese su “La teologia «dalla prassi di liberazione» di Hugo Assmann”. Chel lavôr al jentrarà tal ultin volum de “opera omnia” dal inteletuâl di Turide (1945-1997), ma al sarà ancje il motîf de convigne programade martars ai 12 di Decembar, a Çuian, li dal Centri pal biel acet a 20.30. A cjacararan Flavio Pressacco, Luca De Clara, pre’ Federico Grosso, pre’ Pierluigi Di Piazza e pre’ Pasquale Pressacco, te suage dal “Progjet Maqôr 2’017”.

[MOSTRIS]

Sul cjiscjel di Udin, fintremai ai 11 di Fevrâr, e restarà imbastide la mostre “Donne Madri Dee / Women Mothers Goddesses”, ch’e presente intun percors di 40 mil agn di evoluzion «lengaçs e metafuris universâls tal art preistoric». L’esposizion multisensoriâl e je vierte ducj i dîs de setemane (gjavât lunis), 10.30-17.