[CINE]

Il cine dal “Circolo delle Idee” “Muovere il silenzio”, scrit cul “Dsm” di Pordenon, cu la cooperative sociâl “Fai” e cun “Itaca” (www.youtube.com/watch?v=foTwjttHOaI), al ven indaûr proietât, vinars ai 3 di Novembar. Apontament a Sacîl, li dal teatri “Zancanaro”, a 20.45.

[ECONOMIE]

Par dut il mês di Novembar, i associâts di Bancje etiche a organizin manifestazions di ogni fate par contâ la Finance etiche. Tal lût internet de Bancje, si podarà burî fûr ancje i apontaments furlans.

[ECONOMIE]

Cristina Micheloni, l’esperte di produzions vegetâls ch’e je ancje presidente di “Aiab-Aprobio” Friûl, e je stade clamade tal grop tecnic de Comission Ue “Egtop” (Expert Group for Technical Advice on Organic Production). Micheloni e opere ancje cun “Cereal Docks Organic”, in cualitât di componente dal consei di ministrazion.

[CONVIGNIS]

La clape culturâl “Clavajas”, sabide ai 4 di Novembar, e ricuarde a 20.30 Luigi Raimondi Cominesi (1922-2017), li di Vile Ines, a Clavaiis di Davâr.

[AMBIENT]

Al cole in chescj dîs il prin innovâl dal Compatât di Parîs par fermâ i mudaments climatics. Di chê strade, il “Kyoto Club”, vinars ai 3 di Novembar, al invide a rifleti su lis oportunitâts pal svilup sustignibil da l’Italie e de Union europeane. Dai 6 ai 17 di Novembar, po, e je programade a Bonn la XXIII convigne “Cop” des Nazions unidis. Lis voris a saran direzudis des Isulis Fiji, par marcâ i pericui ch’a menacin massimementri i Paîs plui puars e i Paîs ad ôr dai mârs.

[MUSICHE]

Gustavo Zanin, l’innomenât produtôr di orghins di Codroip (www.friul.net/dizionario_biografico/index.php), miercus ai 8 di Novembar, al sarà il protagonist des convignis “Visioni dal territorio”, par cure dai Museus provinciâi di Gurize. A 18, tal Borc dal cjiscjel, al fevelarà di “Mitologia fantasia e storia della musica”.

[LIBRIS]

Martars ai 7 di Novembar, si presente a Udin, cun Amadou Kane, il libri “Il Sogno Fasullo”. L’apontament, inmaneât dal “Cevi”, al tacarà a 18.30 li dal “Oratori dal Crist”, te strade Montebello 3. Te opare, Kane al conte cun Giulio Garau il so viaç par rivâ in Friûl.

[SCUELE]

Dai 6 ai 8 di Novembar, a Cividât li dal Convit “Pauli Diacun”, si fasarà il “YounG7 Regional Edition”, cui puartevôs des scuelis superiôrs dal Nort da l’Italie. In Friûl a son rivâts un 140 students cun 30 professôrs, par confrontâsi su Gestion de mobilitât umane, Prevenzion dal terorisim, “Empowerment” economic des feminis, Energie e mudaments climatics, Avignî dal lavôr e dai sistems di “welfare”.

[INFORMAZION]

Trop spindie l’Italie par comprâ armis e mantignî l’esercit? Tros euros intun an? Intune dì? intun’ore? La rispueste si pues burîle fûr intun videu, publicât tal lûc internet www.milex.org. La clape “Osservatorio Mil€x” e à curât il scandai, elaborant cifaris e informazions uficiâls dai plui impuartants centris di ricercje mondiâi su lis spesis militârs. Un spieli: la “Mission” taliane tal Afganistan e je costade 7,5 miliarts.

[CULTURE]

La clape “I Blaudins”, vinars ai 10 di Novembar, e organize une comemorazion dal imperadôr Carli I. A 18.30, li dal municipi di Vilès, a cjacararan Ferruccio Tassin (“L’imperatore Carlo I nella Contea di Gorizia dopo Caporetto”), pre’ Valter Milocco (“Carlo I d’Asburgo”) e Moreno Weffort (“La cappella votiva dedicata allo scampato pericolo dell’Imperatore Carlo I: ricerca e ricostruzione”). Sabide ai 11 di Novembar, e sarà screade une capele dedicade al imperadôr asburgic. A 9.30 apontament li de abitance di strade Roma 6; a 10 messe grande cul secretari de “Pia Unione di Preghiera-Gebtsliga” di Viene, pre’ Marian Gruber; a 11 prucission viers la capele e benedizion. Di chê strade, si podarà visitâ il sît de vieri capele originâl, ad ôr de Tor.