[ECONOMIE]

La clape “Civiltà contadina” e à metût sù un grop locâl, batiât “Friuli centrale”, par tignî adun i passionâts di biodiviersitât ch’a intindin di operâ pal recupar e pe difusion des samencis antighis de Patrie. Par informazions, si pues contatât Marino Visintini (0432 402934 - 389 8066350).

[CINE]

Sabide ai 6 di Mai, a 20.30 li de Cjase de Zoventût di San Stiefin, “el tomât” e la “Societât operaie” di Buje a presentin il documentari “Buje - Friûl 1976: tracce di memoria”, un produzion “RajaFilms” e “BelkaMedia”. Podopo, i “Balarins di Buje” a presentaran il spetacul “Friûl Resurît” par memoreâ 50 agn di ativitât.

[POLITICHE]

A son 32 lis propietâts publichis che il stât al smire di vendi in Friûl e a Triest. Si pues cjatâlis li dal lûc internet “Opendemanio”, dulà ch’a son batiadis «iniziative di rigenerazione e riuso». La pluipart dai Bens a son a Palme (20). Su la cuistion, a son intervignûts in Consei regjonâl i conseîrs Alessandro Colautti e Roberto Revelant, sburtant par che la Regjon i domandi al stât di «sospendere la vendita degli immobili messi sul mercato affinché diventino parte di una trattativa complessiva». Pai doi sorestants, si varès d’imbastî «una società (interamente regionale o con la partecipazione degli enti locali) che acquisisca i beni demaniali che lo Stato intende trasferire e faccia uno studio per un recupero economico che preveda anche la successiva vendita di tali beni o un loro utilizzo nell’ambito di un piano predefinito».

[MOSTRIS]

Dai 31 di Març ai 15 di Genâr dal 2018, sul cjiscjel di Udin, si podarà visitâ la mostre “L’offensiva di carta”, ch’e presente la vuere dal Cuindis, contade mediant da lis peraulis e da lis inmagjinis d’in chê volte, partint de colezion “Luxardo” par rivâ a lis strichis dal dì di vuê. L’esposizion e je stade inmaneade di Giovanna Durì, Luca Giuliani, Anna Villari, Sara Codutti e Fernando Orlandi. Oraris: 10.30-17, vie pal Unvier; 10.30-19, vie pal Istât (gjavât ducj i lunis).

[CINE]

Martars ai 9 di Mai, la rassegne “Biomovies”, par cure di Museu furlan di storie naturâl e “Cec”, e presente il cine “Before the flood” di Fisher Stevens, a 20.30 li dal Cine “Visionario” di Udin. Joibe ai 11 di Mai, l’iniziative e proponarà ancje une schirie di videus sul paisaç, prontâts dal “Malignani” di Udin e dal Liceu “Paschini” di Tumieç.

[LIBRIS]

La “Clape culturâl aquilee” e proferìs la sô produzion ancje su la rêt des rêts. La direzion informatiche dal editôr udinês e je: sites.google.com/site/ccaquilee.

[TEATRI]

Al tire adilunc fintremai ai 27 di Mai, la XLVI edizion dal “Palio teatrale studentesco Città di Udine / Ciro Nigris”, inmaneât a Udin dal “Teatro Club Udine”. Te edizion di chest an, a son ingaiâts 28 grops teatrâi cun 700 students atôrs, ch’a animaran 14 seradis, li dal “Teatro Palamostre”.

[CINE]

Prin a Glemone e po a Tumieç, si podarà tornâ a viodi l’ultin cine di Christiane Rorato, ch’al conte lis liendis e lis strusciis dai furlans ch’a àn fat la Transiberiane, in Siberie. Il film al vegnarà proietât miercus ai 17 di Mai, a 21 li dal “Cine Sociâl” di Glemone, presentât di Carlo Gaberscek; e vinars ai 19 di Mai, a 20.30, li dal “Cine David” di Tumieç. Di chê strade si podarà complimentâsi in persone cu la regjiste francese di divignince furlane ch’e à vût il jutori di Romano Rodaro di Buje par ideâ e realizâ la sô vore.

[CULTURE]

Joibe ai 11 di Mai, lis convignis de Soreintindince a proponin un confront a Udin sul proget di alternance fra scuele e lavôr “Porte e portali” (https://www.facebook.com/SABAP.FVG/). A 17, li dai uficis di strade Zanon 22, a intevegnaran Elisabetta Iob, Cristina Caparesi, Elisabetta Francescutti e Morena Maresia.

[ECONOMIE]

Il Circul de legre diminuzion “Livence.Tiliment”, joibe ai 11 di Mai, al invide ducj li dal municipi di Puart, a 20.30, par une convigne su “Biodiversità e agricoltura biologica”. Di reladôrs a fasaran Cristina Micheloni, presidente di “Aiab” de Furlanie, e Daniele Piccinin, president dal Biodistret Venit.