[MOSTRIS]

A restin pôcs dîs, insin ai 8 di Genâr, par visitâ la mostre “Fotografia in Friuli 1915-1940 Guerra & Pace”, imbastide dal institût di promozion e di animazion culturâl “Irpac”, li di vile Manin di Passarian. L’esposizion e je vierte di martars fin vinars, 15-18; sabide e domenie, 10-19.

[LIBRIS]

La Clape culturâl Acuilee, par sierâ il 2016, e à butât fûr un altri titul: il centesim-cuint di cuanch’e à screât il so servizi culturâl. Cheste volte, Guan Nazzi (www.friul.net/dizionario_biografico/index.php) al à voltât la composizion di 18 strofiis “The raven” – “Il corvat” – cul originâl anglês di face. La cuvierte dal librut le à prontade Mario Baschirotto.

[CONVIGNIS]

Di chê strade dal “Presepio dei Cramârs / Die Krämerkrippe” (imbastît fintremai ai 8 di Genâr li de glesie dal Spirtussant di Ravasclêt), la Pro loco de Valcjalde e propon une conversazion cun Tullio Ceconi, autôr dal libri “Migrazioni e migranti dell’Alta Val Degano”, su “I Fonditori di campane dell’Alta Val di Gorto nell’Europa centrorientale”. La convigne, vinars ai 6 di Genâr, e tacarà a 17, li dal “Bar Sport”, te suage dal proget culturâl su lis migrazions “…E gno von ’l era Cramâr / Meine Vorfahren waren Krämer”.

[LIBRIS]

Vinars ai 6 di Genâr, si presente a 11, li dal municipi di Davian, il libri fotografic “Professione pastore”, ch’al conte la storie dal pastôr Valentino Frison “Luciano”, che di passe 45 agn al puarte lis sôs pioris di Marsuris fin sù te Val Visdende, parsore Plodn/Sapade, traviersant i cjanâi dal Argìn, di Preon, di Guart e di San Canzian. Di chê strade, si podarà confrontâsi cul autôr dal volum, Fulvio Tassan Mazzocco.

[CORS]

Sabide ai 14 di Genâr, al tache il cors par geârs, inmaneât dal “Ecomuseu des aghis” dal mandament di Glemone, cul jutori dal Cumon di Osôf. Al sarà proponût a Osôf di Antonino Lepore e lis lezions a colaran i ultins dîs de setemane dai mês di Genâr e di Fevrâr. Si scuen dâsi in note e colaborâ cuntune contribuzion.

[MOSTRIS]

Par cure de “Rêt regjonâl des fototechis e dai archîfs fotografics” (che in Friûl e cjape dentri il “Craf” di Spilimberc, il centri studi “Nediža”, il Consorzi culturâl dal Mandament di Mafalcon, l’Ent regjonâl pal patrimoni culturâl di Vile Manin, la Fototeche dai Museus civics di Udin e la Fototeche teritoriâl “CarniaFotografia”), fintremai ai 26 di Fevrâr, li dal Museu “Sartorio” di Triest (Largo Papa Giovanni XXIII), si podarà visitâ la mostre “Bel Vedere - percorsi nella fotografia di paesaggio”. Oraris: martars, miercus e joibe, 10-13; vinars e sabide, 14-17; domenie, 10-17.

[SOCIETÂT]

La vite, la salût e l’integritât fisiche no dipindin ni de nazionalitât ni di criteris di legalitât leâts cu la residence, ma a son derits dal om, garantîts par ducj de Constituzion e, in specialitât, dal articul 2. Al à scugnût marcâlu, cuntun intervent public, il garant regjonâl pai derits de persone, Walter Citti, tal indoman dai fats di Pordenon, dulà che un trop di inmigrâts a àn scugnût durmî a la bielestele, pal fat che il Cumon al riten che il biel acet al à di jessi garantît dome pai emigrants “regolârs”. Doi di lôr, te colme dal frêt, a son finîts tal ospedâl cun «patologie polmonari e da raffreddamento».

[CINE]

Il “Centri espressions cinematografichis” di Udin al à sierât il 2016 fasint i conts. Vie pal an stât, a son rivâts li dal cine “Visionario” e tes salis dal cine “Centrâl” 350 mil spetadôrs, cuntune increscite dal 7% a pet dal 2015. Lis peliculis proietadis a son stadis 350. E à lavorât un grun ancje la “Mediateche”. Fra cors, laboratoris e lezions a son stâts inmaneâts 112 apontaments.

[ECONOMIE]

Vinars ai 13 di Genâr, a tornin a tacâ i apontaments de schirie “Oltre il Bianco e il Nero / Le vie del gusto equo e solidale”, par cure de “Buteghe dal Mont” di Glemone. A 20.30, li de glesie di San Micjêl, serade su “Tè nero, verde, rosso: tutti i colori del mondo nei tè equi e solidali... Come riconoscerne le caratteristiche e utilizzarli in tutte le occasioni, per cena o prima di dormire!”.

[ECONOMIE]

Joibe ai 12 di Genâr, la seconde comission dal Consei regjonâl si da dongje a 14, a Triest, par scoltâ la presentazion de propueste di leç 152 “Norme per la valorizzazione e la promozione dell’economia solidale”. Intant de istesse riunion, si discorarà ancje di agricolture sociâl e sul presit dal lat. Il “Forum per i Beni comuni e l’Economia solidale del Friuli-V. G.” (www.forumbenicomunifvg.org/) al spiete dal 2013 une leç par valorizâ e par promovi l’economie solidâl e, di chel an, e à publicât la sô propueste, sul stamp di ce ch’a vevin bielzà fat in Trentin e in Emilie (www.trentinoarcobaleno.it/normative-sulleconomia-solidale-in-italia/).