[SALÛT]

Di chê strade de IV Zornade da la psicologie tes curis paliativis, i “Psicologi in Cure palliative” a proponin la proiezion dal cine “The perfect circle”, Par podê viodilu ancje a Udin, si varà di prenotâsi li dal cine “Visionario” dentri dai 4 di Novembar.

[MOSTRIS]

E sarà screade sabide ai 5 di Novembar, a 17 li di palaç Elti di Glemone, la mostre fotografiche “Latterie sociali, latterie turnarie. Una tradizione che va scomparendo”. L’esposizion e je imbastide dal circul culturâl “L’Obiettivo”, cul jutori dal “Ecomuseo”. Oraris: martars-domenie, 9.30-12.30 / 14.30-18, fintremai ai 27 di Novembar.

[CORS]

L’Academie europeiste dal Friûl e di Triest e propon un cors par “Comprendere l’economia e la finanza”. Lis lezions, par ducj, a saran inmaneadis li di palaç Alvarez di Gurize (strade Diaz 5, III plan). I apontaments a tacaran lunis ai 7 di Novembar e po a laran indevant joibe ai 10, lunis ai 14, joibe ai 17 e lunis ai 21 di Novembar, di 19 a 21. La lezion dai 21 di Novembar e sarà proponude li de librarie “Leg” (cors Verdi 67).

[INFORMAZION]

A la direzion www.storiastoriepn.it/cooperative-mutue/ si pues burî fûr studis, gnovis, riflessions e fotos su lis formis e su lis storiis da l’autogestion economiche, da lis cooperativis a lis Cjasis dal popul, des societâts pal jutori mutuâl a lis bibliotechis e a lis cjasis popolârs.

[MOSTRIS]

L’artiste todescje Matthias Schlüter e presente lis sôs oparis a Triest. La sô mostre e je stade screade ai 5 di Novembar li dal Acuedot (viâl 20 Settembre). Schlüter e à il so “atelier” a Regensburg/Ratisbone. E à imbastît mostris a Belo Horizonte, a Berlin, a Munic, Amburc, Francfurt, Ingolstadt e Pilsen.

[LIBRIS]

Miercus ai 9 di Novembar, si presente a San Martin di Volveson il libri “I catapan di San Martino al Tagliamento (1305-1767)” di Elisa Pellin. La presentazion e tacarà a 20, li dal municipi. Il volum al è stât publicât dal “Istituto storico italiano per il Medio evo” di Rome e dal Institût “Pio Paschini” di Udin, te golaine “Fonti per la Storia della Chiesa in Friuli. Serie medievale”.

[GLESIE FURLANE]

Dai 10 di Novembar al I di Decembar, in 4 convignis, Scuele catoliche di culture e Moviment eclesiâl d’impegn culturâl, a proponin a Udin une riflession sul Ecumenisim, daspò 500 agn des Tesis di Martin Lutar. La schirie di apontaments, intitulade “Ecclesia semper reformanda”, a tacaran a 18, li dal Centri culturâl “Paulin di Acuilee”. Ai 10 di Novembar, pre’ Dino Pezzetta al presentarà “Lutero e la Riforma nel 500° anniversario”; ai 17, Michele Cassese al cjacararà su “La Riforma: contesto storico, messaggio e conseguenze”; ai 24, lezion dal pastôr Marco Fornerone su “Giustificazione per grazia o mediante la Chiesa? Salvezza, autorità e libertà nel solco della Riforma protestante”; ultime convigne il I di Decembar su “L’evoluzione dell’immagine cattolica di Lutero” cun pre’ Angelo Maffei.

[CULTURE]

Ai 8 di Novembar, al è muart il zornalist e scritôr Renzo Balzan “Edelweiss”. Al jere nassût a Felet ai 3 di Otubar dal 1943 e al à vivût e lavorât in Cjargne par dute la vite. Lis sôs esecuiis a saran celebradis ai 10 di Novembar, a 14.30 li de glesie di Felet. Nocate la malatie, fin tal ultin al à curât il periodic “Ladins dal Friûl”, palesant la sô passion pe Patrie ladine e pe sô unitât. Lis sôs contis e i siei articui a comparissin in ricueltis e antologiis (“Liendis de Cjargne e dai contôrs”, Vitis in Cjargne e misteris tal cûr”, “Usancis e cronichis de Patrie dal Friûl”, “Aghe di fontanon”...). Al à cjapât i premis “San Simon”, “Friûl” e “Nadâl furlan”; al à direzût “Gnovis paginis furlanis” e guidât cun passion e sintiment l’“Union scritôrs furlans”.

[SCUELE]

La clape “WomenInternational” e organize une serade par informâ su lis ativitâts ch’e je daûr a fâ in Indie (Tamil Nadu), par garantîur formazion scuelastiche e professionâl a frutis e puemis, cul jutori de Buteghe dal cumierç just e solidâl. Apontament a 20.30, vinars ai 11 di Novembar, tal negozi di borc di Trep 10, a Udin.

[CONVIGNIS]

Il protagonist des convignis “Una vita spesa per la legalità”, inmaneadis a San Denêl de clape pe Constituzion, vinars ai 11 di Novembar, al sarà il scritôr e zornalist Dino Pesole, invidât par presentâ il so libri “Il Salasso” e il “Dizionario della democrazia” di Carlo Azeglio Ciampi. La presentazion e tacarà a 20.45 li dal auditorium “Alla Fratta”.