[POLITICHE]

Il Cumon di Sauris/Zahre, vinars ai 2 di Setembar, al invide a la convigne ch’e frontarà la cuistion “Fortezza Fvg - Il poligono del Monte Bivera e il futuro delle servitù militari”. E tacarà a 18.30 li dal Centri etnografic di Sauris Disore, cui intervents di Moreno Baccichet di “Legambiente” e dal deputât Giorgio Zanin de Comission Difese de Cjamare.

[GLESIE FURLANE]

L’ultin apontament dai “Concierts te basiliche”, inmaneâts de Societât pe conservazion de Basiliche di Aquilee, al sarà une leture sceniche in musiche direzude di Claudio De Maglio. Sabide ai 3 di Setembar, Rita Maffei e Massimo Sonaglino (atôrs), Ferdinando Mussutto e Gabriele Rampogna (musiciscj) e Luca Zampar e Anna Savanelli (balarins) a presentaran, li de basiliche patriarcjâl, “Dio è misericordia. La buona notizia di Luca”.

[CORS]

Tal mês di Otubar, e començarà la gnove edizion dal cors “Semi di Giustizia” par insegnants, educatôrs, genitôrs e passionâts di mudaments climatics, di justizie ambientâl e di migrants ambientâi. Par dâsi in note, si varà di prontâ il modul ufiert dal “link” https://goo.gl/forms/TUo6TtZFPUaaOMya2, dentri dai 15 di Otubar.

[MOSTRIS]

L’Universitât dal Friûl, instituide dal articul 26 de prime leç pe riconstruzion 546/1977 e dal decret 102 dal 1978, e ricuarde il XL innovâl dal taramot cu la mostre “Nascita di un ateneo. Dal terremoto una tenda per il futuro”. Tal curtîl dal palaç Florio di strade Palladio, a Udin, l’esposizion e sarà imbastide intune tinde, come chês dulà ch’a forin tiradis sù lis firmis pe propueste di leç d’iniziative popolâr, coordenade dal Comitât pe Universitât furlane dal professôr Tarcisio Petracco (www.friul.net/dizionario_biografico/index.php). La scree de mostre e je stabilide martars ai 13 di Setembar, a 17. Li di palaç Antonini (te strade Petracco), al sarà proietât il documentari “Sulla pelle della terra”, ch’al propon une leture dal taramot e de riconstruzion cui voi de societât furlane e cu lis vôs dai protagoniscj de rinassince. Si podarà visitâ l’esposizion fintremai ai 15 di Setembar, innovâl dal secont taramot dal 1976 e dal abandon provisori dai paîs taramotâts. Oraris: 8-19.

[CINE]

Dai 14 di Setembar ai 2 di Novembar, a Tumieç e torne la rassegne di cine d’atualitât “Immagini e storie della società”. Lis proiezions a colaran di miercus, a 20.30 li de viere Comunitât montane (te strade Carnia Libera 1944). I films dal mês di Setembar a saran: “Il caso Spotlight”, “Perfetti sconosciuti” e “Room”.

[CULTURE]

Par memoreâ il XL innovâl dal taramot dai 15 di Setembar dal 1976, la clape “Elio cav. Cortolezzis” e organize a Trep, li de galarie d’art moderne “Enrico De Cillia”, une serade culturâl. A 20.30 di joibe ai 15 di Setembar, al sarà presentât il libri “Lo spartiacque di una notte di Maggio” di Luca Coradduzza. A 21, al sarà proietât il documentari “Quando la terra chiama” di Massimo Garlatti-Costa, ch’al conte cemût che i emigrants a àn vivût la tragedie de sô Patrie.

[POLITICHE]

Fra i plui «strampalati collegi elettorali dell’Italicum» (al ven a stâi il contestât sistem eletorâl fat bon in cheste legisladure pes “Politichis” talianis), seont il zornalist udinês Claudio Carlisi, al va calcolât dal sigûr chel di Triest. Al è dissegnât in mût di zontâ cun Triest ancje Lignan, lontan 98 chilometris de citât juliane, e parie dute la Basse. Cemût mai? Carlisi al denunzie, cence pêl in bocje: «Tutto questo per consentire a Trieste di ottenere tre o quattro deputati in più a danno del Friuli».

[DIASPORE]

Ancje la clape dai “Amici di Venzone” e colabore pe convigne “Friuli ’76 – Il ruolo del Fogolâr Furlan di Roma tra istituzioni culturali e Regione Friuli-V. G. e l’appello al cuore generoso di Roma”, programât sabide ai 17 di Setembar, li dal municipi di Vençon a 17. Di chê strade, a saran presentâts il documentari dal Fogolâr sul socors dai taramotâts dal 1976 e il volum di Luciano Simonitto “Venzone e il duomo – Scrigno superbo di cultura medievale e di rinascita”.

[TEATRI]

Il spetacul teatrâl “Dì speranza”, produsût de Glesie udinese cul “Css Teatro stabile di innovazione” par memoreâ il XL innovâl dal taramot, daspò di vê esordît a Udin, al ven replicât a Tumieç, li dal dom a 21, sabide ai 17 di Setembar; e po a Glemone, sabide ai 24 di Setembar.

[TEATRI]

Par cure dal “Ecomuseo delle Acque” e dal “Teatro della Sabbia” di Pordenon, domenie ai 18 di Setembar, al sarà proponût un altri apontament teatrâl tal centri di Glemone. Li dal zardin fra il “Laboratorio del terremoto” e strade San Giovanni, a 17.30, Caterina Comingio e Vincenzo Muriano a presentin il spetacul “Lo sguardo e lo scatto: la camera chiara di Roland Barthes”.