[POLITICHE]

Cuntune grande mobilitazion popolâr, al è partît l’iter dal referendum ch’al smire di abrogâ la leç regjonâl 5 dai 15 di Avrîl “Organizzazione delle funzioni relative al servizio idrico integrato e al servizio di gestione integrata dei rifiuti urbani”. L’iniziative politiche e je stade presentade di sindics e comitâts ai 4 di Lui, li de Regjon, a Udin.

[POLITICHE]

Il Comitât pe vite dal Friûl rurâl al propon une gnove ocasion si confront e di dibatiment su lis risorsis idrichis de Basse. La convigne “Aghis” e tacarà a 20.15 di vinars ai 8 di Lui, li dal Centri civic di Porpêt. A saran proponûts intervents di Aldevis Tibaldi (Comitato per la vita del Friuli rurale), di Daniele Milocco (“per Terzo”), di Alberto Piazza e di Tiziano Casari (“Acqua&Acqua”). Al fasarà lis conclusions l’architet Roberto Pirzio-Biroli de Donau Universitet.

[LIBRIS]

La clape “Gruppo ’89”, vinars ai 8 di Lui, e organize la presentazion dal libri “Taizé - la speranza condivisa”. Si podarà dialogâ e preâ cul autôr Claudio Monge a 20.45 a San Zuan di Manzan, te strade Ronchi 12.

[MOSTRIS]

Li dal Museu geologic de Cjargne di Dimpeç, fintremai ai 30 di Novembar, si podarà visitâ la mostre “Michele Gortani e il terremoto del 1928 in Carnia”. Oraris: 9.30-12.30 / 15-18 (ducj i dîs gjavât lunis). Tai mês di Otubar e di Novembar, daûr prenotazion (0433 487779).

[MOSTRIS]

Fintremai ai 31 di Decembar, li de Cjase dal Botêr di Povolâr di Comeliàns, e restarà imbastide la mostre di fotografiis ineditis su la prime vuere mondiâl “Comegliàns cent’anni 1915-1918”. Oraris dal mês di Lui: sabide, domenie e dîs di fieste, 10-12 / 17-19; oraris dal mês di Avost: di martars fin vinars, 17-19 e sabide, domenie e dîs di fieste, 10-12 / 17-19.

[ECONOMIE]

Vinars ai 8 di Lui, si presente a Udin il secont scandai sul “Tierç setôr” dal Friûl e di Triest. La publicazion e je stade curade dai sociolics Paolo Tomasin e Mario Marcolin pal “Forum regjonâl dal Tierç setôr”. La convigne e tacarà a 18, li dal palaç de Regjon.

[CONVIGNIS]

Sabide ai 9 di Lui, la clape “il cidul” e invide a Torse pa la convigne cun Giuseppe Nogarino “All’ombra della Centrale”. La presentazion e tacarà a 17, te strade Fornaci 95. Si finissarà cu lis musichis di Mauro Riccardo.

[MOSTRIS]

Vie pai mês di Lui e di Avost, il Museu dal teritori di Dogne al vierzarà ogni sabide e domenie (9-12 / 15-17). Di chê strade, si podarà visitâ ancje il Centri di educazion ambientâl e la Latarie de vile dal Cjanâl dal Fier (cultura@com-dogna.regione.fvg.it). Il servizi culturâl al è garantît de clape culturâl “Ocra” di Datimis.

[MUSICHE]

Ai 11 di Lui, si scree li de catidrâl di Aquilee la rassegne dai “Concierts te basiliche” dal 2016, par cure de Societât pe conservazion de Basiliche di Aquilee. A saran proponûts 7 apontaments in Aquilee (ai 11, 24 e 30 di Lui; ai 5, 12 e 26 di Avost; ai 3 di Setembar) e altris doi li de basiliche di sant’Eufemie a Grau (ai 18 di Lui e ai 8 di Avost). Ducj i concierts a tacaran a 20.45.

[ECONOMIE]

Domenie ai 10 di Lui, il Comitât pe gestion dai Bens coletîfs di San Marc di Merêt cu la Pro loco “Paîs di San Marc” al à inmaneât la “Festa del Raccolto”. Tai cjamps de Comunitât, al è stât seselât il forment coletîf. Protagoniscj dal licôf a son stâts i fruts dal paîs. Di chê strade, a si son dâts dongje a San Marc ancje lis aziendis e i sindics dai Cumons ch’a àn inviât il proget di economie solidâl “Pan e farine dal Friûl di Mieç”.