[MOSTRIS]

Di chê strade dal “Festival da la Constituzion”, dai 2 ai 27 di Jugn, li dal “Museu dal teritori” di San Denêl, si podarà visitâ la mostre fotografiche “Eguaglianza”, cu lis oparis dai fotografs dal Circul fotografic “E. Battigelli”. Oraris: sabide, 9.30-12.30 / 14.30-18; domenie, 10-12.30 / 14.30-18.

[POLITICHE]

Dai 3 ai 5 di Jugn, il “Festival da la Constituzion” al organize a San Denêl convignis, dibatiments, mostris e spetacui di ogni fate, par confrontâsi sul principi di ugualiance. Il prin a intervignî al sarà Giuseppe Tesauro, ai 3 di Jugn a 18, par discori di “Eguaglianza e tutela sovranazionale dei diritti”. Aida Talliente, a 21.30, e proponarà il spetacul “Sospiro d’anima (la storia di Rosa)”. Sabide ai 4 di Jugn, i fruts di San Denêl, di Majan e di Forgjarie a rifletaran su “Bambini diversi, diritti uguali”, a 10. A chê istesse ore, confront fra students des superiôrs su “Uguali oltre ogni barriera” e “Siamo davvero tutti uguali?”. A 11, intervent di Gian Paolo Dolso su “Il principio di eguaglianza nell’ordinamento costituzionale” e a 11.30 di Paolo Caretti su “La tutela dei diritti sociali in tempi di crisi economica”.

[POLITICHE]

Vinars ai 3 di Jugn, il moviment politic “Patrie Furlane” al organize la convigne su “Autonomie e riforma costituzionale tra storia e presente. Il nuovo statuto di autonomia del Trentino. La proposta del Partito territoriale friulano”. A 19, li dai uficis di Basandiele (strade Vittorio Emanuele III numar 3), a intervegnaran Viviana Brugnara, studiose da l’autonomie, Lorenzo Baratter, conseîr regjonâl dal Trentino–Südtirol, e Federico Simeoni, conseîr provinciâl di Udin.

[CINE]

Il film di Giulio Squarci su lis lotis cjargnelis pe difese da l’aghe “I custodi dell’acqua / La Carnia si ribella” al sarà proietât a Buenos Aires, ai 3 di Jugn, di chê strade dal festival internazionâl dal cine ambientâl “Finca” (http://imd.org.ar/finca/#).

[SALÛT]

Si cjacare di donazion e di straplants di argagns e di tiessûts, vinars ai 3 di Jugn, a Cjasegnove di Tumieç. La sezion “Ado” tumiecine e à invidât il coordenadôr dal Crt de Aziende sanitarie Loris D’Orlando e il president regjonâl di “Ado” Giorgio Antico par frontâ la cuistion cuntune schirie di testemonis, a 20.30 li de Latarie, di chê strade de fieste di Sant Antoni.

[CONVIGNIS]

Lis convignis dal “Festival da la Constituzion” di San Denêl a tirin adilunc, sabide ai 4 di Jugn, cui intervents di Anna Puccio e di Raffaella Ida Rumiati su “Donne e uomini: le quote di genere nei Cda”, a 16.30, e di Lorenzo Becchetti su “Le radici della diseguaglianza economica nella globalizzazione: le soluzioni possibili”, a 18.30.

[MUSICHE]

Al rive tal paîs di Zorç Ferigo – a Comeliàns – il spetacul “Di jerbas e di suns, musica e parole per una Spoon River carnica”, proponût pal prin viaç vie pal 2012, cuanch’al saltà fûr la gnove edizion dai “album” dal “Povolâr Ensemble”. Il conciert al tacarà a 21, te place San Nicolò, sabide ai 4 di Jugn. Prin, a 18 li dal teatri “L’Alpina”, si fasarà l’anteprime dal videu di Paolo Comuzzi su la Cjargne di Ferigo (www.friul.net/dizionario_biografico/index.php).

[ECONOMIE]

E sarà batiade “Il G.a.s. mi plâs” la mostre-marcjât inmaneade a Cjasielis di Mortean, domenie ai 5 di Jugn, par cognossi i Grops pes compris solidariis e i produtôrs regjonâi dal cumierç just e solidari. I chioscs a vierzaran te zone di “Festintenda” a 10 e a restaran vierts fin 19, par cure di “ilCantîr”, il grop “il Gas mi plâs” e la clape “una goccia”.

[POLITICHE]

Intant dal “Festival da l’Economie” di Trent, domenie ai 5 di Jugn, si confrontisi su “Lis autonomiis ch’a judin a cresci”. La riflession su la «dialetiche fra autonomie teritoriâl, stât nazionâl e procès d’integrazion comunitarie» e sarà ticiade di Sergio Fabbrini, diretôr de “Luiss School of Government”, di Josep Borrell Fontelles, ch’al fo president dal Parlament europeu, e di Steven Forti, storic de “Universidade Nova de Lisboa”. Il dibatiment al tache a 10 li dal palaç de Provincie, a Trent.

[GLESIE FURLANE]

Sabide ai 4 di Jugn, al à tornât a viergi il “Cammino delle Pievi”. I piligrins a son partîts a pît di “Cjase Emaus” di Dimponç, guidâts dal vescul di Udin Andrea Bruno Mazzocato che, po, al à cjantât messe li de plêf di San Florean. Il percors intîr al tocje 10 Plêfs cjargnelis e al permet un’esperience di spirtualitât, di culture e di imersion te nature alpine.