[POLITICHE]

E tire adilunc la campagne eletorâl pal referendum che, domenie ai 17 di Avrîl, al decidarà se tai mârs talians si varà di continuâ a gjavâ petroli, menaçant l’ambient naturâl e danezant il turisim. I promotôrs dal “Sì” – ch’al podarà vinci dome s’al sarà otignût il “quorum” dal 50% dai eletôrs – a pandin su la rêt des rêts lis sôs motivazions, condividudis dal mont ambientalist e di une part di ministrazions regjonâls.

[CINE]

Ancje tal Friûl ocidentâl, si confrontisi su la gestion comunitarie da lis aghis e sul servizi idric cul jutori dal film di Giulio Squarci “I custodi dell’acqua / La Carnia si ribella”. L’opare e vegnarà proietade a Sacîl domenie ai 10 di Avrîl a 17.30, par ducj; e lunis ai 11 di Avrîl a 11, pes scuelis. Ducj i doi i apontaments a son programâts li dal Cine Ruffo, par cure dal Cumon di Sacîl e de “Associazione naturalisti Sacile”.

[SOCIETÂT]

La Fondazion da lis Comunitâts dal Friûl concuardiês sot Vignesie “Santo Stefano” e à prontât il regolament 25/2016 par finanziâ progets e iniziativis dedicâts a la promozion sociâl, culturâl, ambientâl e sportive. Par vê acès ai finanziaments si scuen presentâ, dentri dai 13 di Mai, lis domandis. I modui si pues domandâju a la secretarie de Fondazion.

[LIBRIS]

Il Museu archeologic di Cividât, domenie ai 10 di Avrîl, al organize la presentazion dal volum “Olga Klevdarjova. Un racconto storico” di Paolo Petricig. La convigne, cun Tommaso Chiarandini e Michele Obit, e tacarà a 18, te suage de rassegne “LibrialMan: Vivere per leggere - Leggere per vivere”.

[POLITICHE]

Tal lûc internet www.nonsolocarnia.info, al è publicât il scandai di “Cittadinanzattiva” su l’aghe, ch’al à par titul “Ancora sull’acqua pubblica”.

[AMBIENT]

Martars ai 12 di Avrîl, e je programade a Pordenon, li dal vieri covent di San Francesc, la convigne “Stop trivelle!”. A 20.30, a cjacararan su lis resons dal referendum dai 17 di Avrîl e su la cuistion energetiche l’inzignîr Cristiano Gillardi di “Legambiente” e il biolic marin Carlo Franzosini dal “Wwf”. Il Comitât promotôr dal referendum al à prontât un lûc internet dulà ch’al è possibil lei, discjamâ e popolarizâ l’apel par lâ a votâ l’abrogazion dal com 17 dal articul 6 dal decret legislatîf 152/2006.

[CINE]

Universitât pe tierce etât e “Visionario” a organizin la proiezion dal cine “Cowspiracy” par resonâ su mudaments climatics, alimentazion e mûts di vivi sustignibii. L’opare e sarà presentade miercus ai 13 di Avrîl, a 20.30 li dal cine udinês di strade Asquini. Il confront al tirarà adilunc sabide ai 16 di Avrîl a 10.30, cuntun dibatiment fra Alessandro Peressotti dal Dipartiment di Agrarie de Universitât furlane, Gabriele Porrati president di “Cambiamo.org” e Dario Bossi de clape “Isde Associazione internazionale di Medici per l’Ambiente” su “Alimentazione e stili di vita per cambiare il Cambiamento Climatico” (li de de “Ute” tal viâl Ungheria 18, a Udin).

[CINE]

Miercus ai 13 di Avrîl, e tire adilunc la rassegne “Cinema e Montagna” di Pinçan. Li de sale “Somsi” (te strade 20 Settembre), a 20.15, si proietarà “Attraverso le Carniche” dal regissêr Giampaolo Penco. L’ultin apontament al colarà ai 20 di Avrîl cul cine “Damnation”, presentât di Giuliano Gelci de clape “Monte Analogo”.

[CORS]

Li di “Casa Sist” di place Valle di Valnunciel, sabide ai 16 e domenie ai 17 di Avrîl, “Pordenone in Transizione” al organize un “Laboratori di comunicazion noviolente”.

[MUSICHE]

Vinars ai 15 di Avrîl, l’“Associazione musicale tricesimana” e onore il so paisan Alan Brusini, il scritôr e poet dal 1923 muart plui di un an indaûr (www.friul.net/dizionario_biografico/index.php), cul spetacul “Là ch'al sdrindùle un cjariesâr”. Sot da la direzion di Massimo Somaglino, si esibissaran a 20.45, li dal teatri “Garzoni” di Tresesin, la corâl “Vôs de mont” e la sopran Maria Giovanna Michelini. A saran proponudis cjantis ineditis di Paolo Chiarandini e di Marco Maiero sun tescj di Brusini. E presentarà l’artist Antonella Sbuelz.