[ECONOMIE]

Ancje a Udin si resone su lis consecuencis dal “Ttip”, il compatât internazionâl ch’al smire di liberalizâ i trafics economics fra Europe e Stâts Unîts. A 20.30 di vinars ai 2 di Otubar, li de sale “Ajace” dal municipi, e cjacararà Elena Mazzoni, presidente de campagne “Stop Ttip Italie” (stop-ttip.org/it). Di chê strade, si podarà firmâ la petizion ch’e domande di blocâ il compatât.

[CULTURE]

Vinars ai 2 di Otubar, si presente a Tombe di Merêt il fresc apenis regolât di Giulio Urbanis te glesie parochiâl. A 19 e sarà cjantade messe; po si fasarà la presentazion dai ristaurs (par cure di Valentina Scuccato) e dal mes iconografic des pituris (Francesca Tonini); a 20.30, li de canoniche, si presentarà il libri “Villa Tumbae - Il restaur dal afresc di Gjulio Urbanis ta glesie di San Michêl”, cun intervents dal plevan Giovanni Boz, de presidente de clape “La Grame” Elisabetta Basso, dal sindic Massimo Moretuzzo, dal president de Bancje di credit cooperatîf Luca Occhialini e de conservadore dal Museu diocesan di Art sacrade Dania Nobile.

[CINE]

Dai 3 ai 11 di Otubar, a tornin a Pordenon lis “Zornadis dal cine mut”, par cure di “La Cineteche dal Friûl” e di “Cinemazero”. Diretôr de manifestazion al è David Robinson. L’acjadiment speciâl e sarà la proiezion di “Les Misérables” di Henri Frescourt (1925-26), miercus.

[MUSICHE]

Ai 3 di Otubar, al è programât a Udin, li dal teatri “Giovanni da Udine”, il “Festival della Canzone friulana”. Si jentre a gratis, ma daûr prenotazion.

[AMBIENT]

“«Laudato Sii»: la terra violata e i poveri; dalla suggestione delle parole a quella delle immagini”: e sarà intitulade cussì la convigne, inmaneade martars ai 6 di Otubar, a Udin li dal Cine “Visionario”, a 18. A organizin “Legambiente”, “MoVi”, “Centro per le Arti Visive” e “Visionario”. A 21 al sarà proietât il cap d’opare di Hayao Miyazaki “Nausicaä della Valle del vento”.

[SALÛT]

Pal “Cro” di Davian, l’ospedâl regjonâl ch’al cure i malâts di tumôr, a son stâts tirâts dongje passe 20 milions di tapons (20 milions, 488 mil e 462). In gracie di cheste forme di ricolte disferenceade de scovacis, si difint la nature, ma sore il dut si fâs solidaritât positive. Mediant dai bêçs vuadagnâts vendint i tapons, il “Cro” al pae borsis di studi par infermîrs di ricercje. Altris milions di tapons a vegnin regalâts a la “Via di Natale”, ch’e opere a pro dai parincj dai malâts.

[CONVIGNIS]

La clape “Mari Tiere”, parie cul Coordenament biodiviersitât, e organize une convigne par profondî la cuistion: “Ogm tra mito e realtà”. Ai 9 di Otubar, a 20.30 li dal Centri polifunzionâl di Mels di Colorêt, al cjacararà Gianni Tamino de Universitât di Padue.

[TEATRI]

Vie pal mês di Otubar, dai 10 ai 31, si fasarà a Tumieç, li dal teatri “Luîs Candoni”, la V rassegne di teatri amatoriâl par furlan “Cuatri ridadis”. Ducj i spetacui a tacaran a 21. A saran rapresentadis lis oparis: “In vegle”, “Usgnot si rît e vonde: comedies in famee”, “Sespis” e “Chicchiricchì. Un matrimoni, un funerâl e l’Arc di San Marc”.

[SCUELE]

Vinars ai 16 di Otubar, la Scuele di politiche e di etiche sociâl de Glesie furlane di Udin e scree il secont an di vite cuntun dibatiment public su la justizie sociâl e economiche. A 18, li dal Centri culturâl “Paulin di Acuilee” tal borc di Trep, a Udin, a cjacararan il vescul Andrea Bruno Mazzocato, il president de “Fondazione per la Sussidiarietà” Giorgio Vittadini e il sotpresident di “Libera” Davide Pati.

[MOSTRIS]

Fintremai ai 14 di Decembar, li de clape “Seghizzi” di Gurize (tal cors Verdi, numar 85), si podarà visitâ la mostre “Impressioni”, dedicade a la piture e a la musiche di Cecilia Seghizzi (www.friul.net/dizionario_biografico/index.php). Oraris: lunis e vinars, 10.30-14.30; miercus, 14.30-18.30; domenie, 10.30-18.30.