[POLITICHE]

A tirin adilunc lis convignis dulà che la Regjon e smire di confrontâsi sul proget di Plan di protezion da lis aghis. Daspò dai apontaments di Udin e di Gurize, si fasarà altris 3 riunions a Tumieç (li de Comunitât montane, a 16.30 di martars ai 5 di Mai); a San Vît dal Tiliment (li dal teatri “Arrigoni”, a 18 di martars ai 12 di Mai) e a Palme (li dal teatri “Modena”, a 17.30 di martars ai 19 di Mai). Di chê strade, a saran frontadis, par ordin, lis cuistions: ûs idroeletric; ûs itic, agricul e industriâl; ûs dai poçs e tratament des aghis sporcjadis dal om.

[SOCIETÂT]

La federazion des clapis dal volontariât “MoVi”, martars ai 5 di Mai, e fâs la sô samblee regionâl a Udin, li di “Agesci” (strade Cormôr Alto 28), a 20.30. Di chê strade, a saran presentâts ancje i gnûfs cuaders “Strade nuove”.

[SALÛT]

Il “Gas furlan”, un dai grops pes compris solidâls ch’al opere te Patrie, al propon une convigne su erboristiche e cosmetiche naturâl. L’apontament “Erba madre” al sarà animât di Giovanni Bagatin di Tregnago (Verone), miercus ai 6 di Mai a 18, li dal “Spazio aperto” di Pasian di Prât (strade Roma 15 - https://www.facebook.com/events/1113547131994254/).

[LIBRIS]

Miercus ai 6 di Mai, si presente la gnove edizion dal libri “Parchi e giardini storici del Friuli-V. G. un patrimonio che si svela”, publicât dal Institût regionâl pal patrimoni culturâl. La presentazion e je stabilide a 18, li dal Museu cjargnel des arts popolâs. A cjacararan Rita Auriemma e Franca Merluzzi dal Institût pal patrimoni culturâl e la restauradore Luciana Simonetti.

[CONVIGNIS]

Il judis Piercamillo Davigo al torne in Friûl par cjacarâ su la riforme de justizie. Al fasarà di reladôr, invidât dal Centri Balducci di Çuian di Puçui, joibe ai 7 di Mai, a 20.30.

[CULTURE]

Sabide ai 9 di Mai, a 20.30 li dai uficis gurizans de “Societât filologjiche furlane” (strade Bellini 3 di Gurize), la clape “Furlans dal Gurizan” e presente il proget “Toponomastiche furlane di Gurize”, par cure di Franco Finco.

[ECONOMIE]

Vinars ai 8 di Mai, li de “Comunità Nove” dal parc di San Svualt di Udin, si presente il proget di cooperazion sociâl “Nuova cooperazione organizzata”, nassût par recuperâ i bens puartâts vie a la Camore e destinâts al ben de comunitât, a la promozion umane e a l’integrazion sociâl (www.ncocommercio.com/it/content/4-chi-siamo). La convigne e tacarà a 18.30, cui intervents di Simmaco Perillo, president de cooperative sociâl “Al di là dei sogni”, e di Paola Perretta de cooperative “Al di là dei Sogni” (www.coopaldiladeisogni.it/index.php?option=com_content&view=article&id=1&Itemid=116).

[CONVIGNIS]

La Glesie di Concuardie, parie cu la Parochie dal Tor di Pordenon, e je daûr a valorizâ la figure e la reditât di monsignôr Giuseppe Lozer, muart a Pordenon tal 1974, dopo di vê operât a Tor e a Puart come educatôr, animadôr sociâl e pastorâl. Ta chê suage, e jentre ancje la convigne programade li de Biblioteche antighe dal Coleç “Marconi” di Puart, sabide ai 9 di Mai a 10.30. Intervents di pre’ Orioldo Marson (“Don Giuseppe Lozer prete anti-interventista e anti-militarista”), di Imelde Rosa Pellegrini (“L’azione sociale di Lozer nel Portogruarese”), di Fabio Metz (“Educazione e cultura in don Giuseppe Lozer”) e di Flavio Mariuzzo, autôr dal volum “Cattolicesimo democratico e Modernismo tra Livenza e Tagliamento, mons. Lozer (1880-1974)”.

[DIASPORE]

Sadide ai 9 di Mai, si fasarà a Vidulis di Dignan il “1° incontro dei rimpatriati friulani… «libars di scugnî tornâ»”. Al sarà inmaneât de “Fondazione Vidulis” e dal “Ente Friuli nel Mondo”. A 11, al tacarà il confront su atenzion e visibilitât dai emigrants tornâts te Patrie.

[INFORMAZION]

La Ministrazion frazionâl di Pesariis, propietât coletive di derit public ch’e ministre i Bens de Comunitât cjargnele, e à rinovât il lûc internet www.pesariis.it, dulà ch’e presente i siei tesaurs artistics e culturâi, il percors dai orlois monumentâi e lis ativitâts pe valorizazion de propietât coletive (boscs, struturis turistichis, ripârs alpins, buteghis).