[ECONOMIE]

Martars ai 3 di Fevrâr, al cole il secont apontament de schirie “Parliamo di... Economia Solidale”, par cure des “Acli”. A 20.30, tai uficis di borc Aquilee 22 di Udin. Il confront su “L’agricoltura multifunzionale e le nuove figure professionali” al sarà animât di Sandra Scaini, dotore in Sciencis naturâls; Federico Forgiarini, de aziende multifunzionâl “Le Fornaci del Zarnic”; Massimo Marino, diretôr dal “Progetto Polo Formativo Agroalimentare Fvg” e di “Cefap” (“Centro per l’educazione e la formazione agricola permanente”).

[ECONOMIE]

Si clame “wwoofing” la propueste pe Vierte dal proget “Progetto Pecora Nera” di Raviei. Devis Bonanni al garantissarà pan e tet pai volontaris ch’a lavoraran tai orts e tai cjamps de aziende agricule. I acuardis a saran stabilîts volte par volte, par pueste eletroniche, e lis voris a tacaran tal mês di Març par lâ indevant fin tal Istât. «Non siamo un’azienda agricola con ettari di terra a coltura intensiva – a sclarissin Devis e Monica, ch’a gestissin il proget – ma una piccola e solida realtà di autoproduzione. Nei dintorni abbiamo molti buoni vicini con i quali stanno nascendo collaborazioni agricole e sociali».

[SOCIETÂT]

Il scandai sul Tierç setôr dal Friûl e di Triest, curât di Paolo Tomasin e di Mario Marcolin pal Forum regjonâl (ch’al coordene cooperativis sociâls, organizazions di volontariât, clapis di promozion sociâl, organizazions no governativis e fondazions), si pues scrutinâlu su la rêt da lis rêts. Al è publicât su lis paginis “Facebook” dal “Forum” talian (https://www.facebook.com/pages/Forum-Nazionale-Terzo-Settore/169711579745068 ?ref=hl - www.forumterzosettore.it/2015/01/28/fts-friuli-venezia-giulia-dossier-statistico-2014-sul-terzo-settore-in-friuli-venezia-giulia/) e al po jessi discjamât tal lûc internet dal “Csv” (http://ciesseinforma.csvfvg.it/wp-content/uploads/2015/01/Dossier-Statistico-2014-Terzo-Settore-nel-Friuli-Venezia-Giulia.pdf). “Ciesseinforma” al propon ancje une presentazion cun fotos (http://ciesseinforma.csvfvg.it/presentazione-del-dossier-statistico-2014-sul-terzo-settore-friuli-venezia-giulia-una-realta-molteplice-e-diffusa/).

[CONVIGNIS]

La zornaliste-fotografe Linda Dorigo, cul so coleghe Andrea Milluzzi, joibe ai 5 di Fevrâr, e presente il scandai “Rifugio, un viaggio tra presente e passato alla ricerca dei Cristiani d’Oriente”. La convigne e je programade a Tumieç, a 18.30 li de Comunitât montane. Si discorarà di stât islamic dal Iraq e de Sirie e da lis persecuzions dai cristians di Soreli jevât.

[AMBIENT]

Intant des “Zornadis internazionâls di studi sul paisaç”, programadis a Trevîs dai 12 ai 13 di Fevrâr par un confront su “Paesaggio e conflitto. Esperienze e luoghi di frontiera”, si cjacararà ancje de cuistion furlane. L’architet Moreno Baccichet, innomenât par jessi l’animadôr dal proget “Scarpe&Cervello”, al frontarà l’argument “Lungo la soglia goriziana. Archeologie del confine”, intant dal dibatiment su “Terre vicine” (vinars, a 14.30). Fra i reladôrs, ancje Ugo Mattei, ch’al fevelarà su “Paesaggio, beni comuni, conflitto” (joibe a 18). La convigne e sarà transmetude “in streaming”.

[TEATRI]

Vinars ai 6 di Fevrâr, “Banca etica” e propon il spetacul teatrâl su la crise dal capitalisim. “Pop Economix live show” (http://youtu.be/bAOMk6ecJfw) al sarà rapresentât a 20.30, li dal teatri “San Giorgio” di Udin di Alberto Pagliarino.

[CONVIGNIS]

Pre’ Ermis Segatti dal Fogolâr furlan di Turin, vinars ai 6 di Fevrâr, al cjacararà li de sede de clape (tal cors Francia 275b) su “Cristianesimo e Islam convivenza possibile? (senza sottintesi)”. La riunion e tacarà a 21.

[TEATRI]

Pal secont apontament des “Candoniadi 2014-2015”, la clape culturâl “Luigi Candoni” e propon un monolic teatrâl. Vinars ai 6 di Fevrâr, a 20.30 li dal teatri di Dimplan di Darte, al sarà rapresentât il spetacul “Arturo lo Chef. Un cuoco di Villa Santa Maria” di Stefano Angelucci Marino (inspirât di John Fante).

[CINE]

La rassegne di cine african “Gli occhi dell’Africa” e rive a San Danêl, cun doi apontaments li dal Museu dal teritori. Sabide ai 7 di Fevrâr, a 21, al sarà proietât il film “Daratt - La stagione del perdono” e po e sarà screade la mostre fotografiche “Africa. Sguardi”. Ai 14 di Fevrâr, si larà indevant cuntune selezion di mediometraçs: “C’est dimanche! (È domenica)”, “L’acqua che non c’è” e “The long way down (La lunga discesa)”. La mostre e restarà vierte fintremai ai 22 di Fevrâr (vinars e sabide, 9.30-12.30; domenie, 14.30-18. A organizin “Officine d’autore” “Vivi il Museo”.

[CONVIGNIS]

Sabide ai 7 di Fevrâr, li dal Museu archeologic di Cividât, si presente a 17 il volum “Necropoli longobarde in Italia. Indirizzi della ricerca e nuovi dati”, curât di Elisa Possenti. L’opare e propon i ats de convigne internazionâl dal 2011, inmaneade sul cjiscjel di Trent.