[CULTURE]

Il vescul Tito Solari di Pesariis, il mestri Giovanni Canciani di Paulâr e la volontarie Marta Francescatto a son i 3 cjargnei che, sabide ai 2 di Avost, la Fraterne dal Spirtussant di San Pieri ur consegnarà il premi “Baston di San Pieri di Cjargne”, par marcâ il lôr impegn tai camps spirtuâl, artistic e umanitari. La ceremonie e tacarà a 17, li de plêf parsore Zui. Di chê strade, a saran proponûts un conciert di cjampanis e il cjant dal “Te Deum” cu lis corâls “Cossetti” di Tumieç e “Duomo” di Paluce.

[DIASPORE]

Sabide ai 2 di Avost, li dal municipi di Bordan, si presente il libri “Cuori nel pozzo - Belgio 1956 uomini in cambio di carbone” di Roberta Sorgato (“Marsilio editore”). La convigne, te suage de “Fieste dal emigrant”, e tacarà a 17.

[GLESIE FURLANE]

La LXVIII “Fiesta da la Madona da la nìaf” e je programade de “Pro loco da la Val dal Argìn” dal I ai 5 di Avost, su la Mont di Anduins. La fieste liturgiche cul avôt e tacarà a 9.30 sul segrât de glesie parochiâl di Anduins; la messe grande e sarà cjantade li de gleseute de Madone da la nêf, su la mont, a 11.

[CONVIGNIS]

Il Museu geologic cjargnel, sabide ai 2 di Avost, al organize une serade su lis Sciencis de tiere, a 20.45 li dal Centri pes visitis dal Geoparc di Tamau/Tischlbong.

[CONVIGNIS]

Lis convignis sul Museu paleocristian di Aquilee a tirin adilunc sabide ai 2 di Avost. A 17, Lorenza Bellé e Annalisa De Franzoni a frontaran la cuistion: “Museo Paleocristiano di Aquileia: scrigno custode di storie preziose”.

[CONVIGNIS]

Sabide ai 2 di Avosto, li de “Staipo da Canobio”, su la strade che di Culine e va sù sul ripâr “Tolazzi”, a 18 si presente il libri “50 escursioni estive ed invernali nei dintorni di Forni Avoltri” di Fabio Zoz e di Elesia Tenentini (“Andrea Moro editore”). I autôrs a presentaran lis escursions a pît e in bicidimont ator di Culine e a cjacararan su la gnove palestre pes rimpinadis e su la inminent “Staffetta dei tre Rifugi”. La serade e je inmaneade dal circul culturâl “E. Caneva”.

[LIBRIS]

Al cole chest an il CXXX innovâl di fondazion de Casse cooperative di prestit di Pravisdomini e di chê strade al è saltât fûr il libri di Giovanni Strasiotto “Storia di Pravisdomini” (“Edizioni Biblioteca dell’Immagine”). L’autôr al cjacararà su la storie dal paîs, discorint cun so fie Maria Cristina, domenie ai 3 di Avost, a 10.45 li de sale parochiâl. Al apontament a cjaparan part ancje il sindic Graziano Campaner, il plevan pre’ Ugo Samaritani, il president de Bancje pordenonese di credit cooperatîf, Pietro Roman, e il vicjari episcopâl pe culture e pal sociâl de Glesie di Concuardie, monsignôr Orioldo Marson.

[LIBRIS]

La clape culturâl “0432”, vinars ai 8 di Avost, e organize une leture animade li de biblioteche dal Museu geologic di Dimpeç, a 16. Si consee la prenotazion (0433 487779).

[MOSTRIS]

Claudio Mario Feruglio al propon la sô mostre “In Ascolto”, fintremai ai 24 di Avost li dal Museu d’art moderne “Ugo Carà” di Mugle. E sarà screade miercus ai 6 di Avost, a 19. Oraris: martars-vinars, 18-20; sabide, 10-12 / 18-20; domenie e dîs di fieste, 10-12.

[MOSTRIS]

E restarà vierte fintremai ai 31 di Avost, la mostre “Nel ventre della balena. Dal mosaico di Giona alla fiaba di Pinocchio”. E je stade imbastide li di palaç Meizlik di Aquilee dal “Gruppo Archeologico Aquileiese”. Oraris: martars-vinars, 15.30-18.30 / sabide, domenie e dîs di fieste, 10-12 / 15.30-18.30. Si jentre a gratis.