[CORS]

Dai 8 ai 20 di Jugn, al sarà inmaneât in Cjargne un cors internazionâl di “Permaculture”. Al è daûr a organizâlu la clape “Lila” di Tumieç e al sarà proponût a Denemonç. Mediant de “Permaculture”, si progete ecosistems ch’a rispietin i sistems naturâi. Par informazions: 348 7444267.

[MOSTRIS]

Martars ai 3 di Jugn, il cjanteautôr Rocco Burtone al scree la sô mostre di piture. Si podarà visitâle li de “Cjase di Catine” a Vilalte di Feagne, daspò de scree a 19. E à colaborât pal alestiment la clape culturâl “Civi&sport”.

[CULTURE]

“Eticamente” 2014 al fronte la cuistion “Il Lavoro che c’è, che non c’è più e ci potrebbe essere!”, dai 4 ai 7 di Jugn, a Tei. La clape culturâl “Etica-mente” e proponarà convignis, spetacui, riunions e mostris. Il program complet si cjatilu su la rêt des rêts.

[LIBRIS]

La “Bancje etiche” di Pordenon e di Udin e presente il libri cu lis strichis di Davide Pascutti “Pop economix. Il grande show della finanza che ha innescato la crisi”. L’apontament al tache a 18, joibe ai 5 di Jugn, li de Libreria moderna udinese”, te strade Cavour. Al presente Dario Silvio Francescutto.

[SALÛT]

Par celebrâ i 25 agn di vite de Associazion taliane dai Clubs alcologics teritoriâi, vinars ai 6 di Jugn, la grande famee dai Clubs si da dongje a San Denêl, dulà che si fasarà la convigne “A 25 anni dalla fondazione dell’Aicat: l’Approccio Ecologico Sociale di Vladimir Hudolin nella costruzione della comunità solidale”. Lis voris a tacaran a 10, li de Biblioteche Guarneriane, e a laran indevant ancje dopomisdì (a 14.30), cuant che si frontarà la cuistion “Dall’alcol all’uomo: i Cat come semi di cambiamento e contaminazione culturale nella costruzione della comunità solidale”.

[SOCIETÂT]

Cemût ano di jessi i rapuarts contratuâi fra Ministrazion publiche e Tierç setôr? Cuâi sono i dovês juridics e fiscâi des organizazion “non profit”? Si fronte chescj problems, vinars ai 6 di Jugn, intant de convigne “Rapporti contrattuali con la pubblica amministrazione e adempimenti giuridici e fiscali nel terzo settore”, programade a Palme, li dal “Meeting Point San Marco” a 9. Al organize il Centri servizis volontariât regjonâl. La convigne e sarà transmetude in direte “streaming” te sezion “Ciesse web-tv” dal lûc internet dal “Csv”.

[ECONOMIE]

Dai 6 ai 8 di Jugn, sul Plan dal Cansei, tal Cumon di Farra d’Alpago, e ven proponude la rassegne “Bosco e Territorio Nord-Est”. Fra i protagoniscj, ancje l’esperience furlane di Samuele Giacometti, l’inzignîr ch’al à fat sù a Sostâs, in Cjargne, la cjase “Sadilegno”. Vinars ai 6 di Jugn, al presentarà a 11.30 il “Modello di Rete di Imprese 12-to- Many” (www.12tomany.net).

[AMBIENT]

Te suage de manifestazion “Ambientarti”, inmaneade dal Cumon di Cormòns, vinars ai 6 di Jugn, il circul “Greengang” al organize une convigne su “Vivi con stile - I consigli pratici per una vita a basso impatto ambientale”. A 21, al intervegnarà Andrea Poggio. Di chê strade, si presentarà ancje il “spot” de campagne provinciâl “Facciamolo con amore”, intitulât “Io Rifiuto”.

[ECONOMIE]

Vinars ai 6 di Jugn, si presente a Tumieç il proget “Pipol - Garanzia Giovani Fvg”. Sul imprest di politiche ative pal lavôr, a cjacararan il sindic di Tumieç, Francesco Brollo, e l’assessore regjonâl par lavôr, formazion, instruzion, oportunitâts avuâls, politichis pe zoventût e ricercje, Loredana Panariti. Apontament a 18, li dal “Workcoffe” de cooperative “Cramars” (te galarie de Cooperative).

[ECONOMIE]

Di chê strade des manifestazions dal Coordenament des clapis culturâls e dal volontariât sociâl di Glemone “I colori del vento”, vinars ai 6 di Jugn, “Legambiente” e propon un confront su “Sant’Agnese: l’agricoltura di ieri, oggi e domani”. A 20.30 li de glesie di San Micjêl.