[MOSTRIS]

E reste imbastide fintremai ai 4 di Mai, li di palaç Orgnani-Martina di Vençon, la mostre internazionâl di inlustrazions pe frutarie “Le immagini della fantasia”. La XIII edizion e je dedicade, in specialitât, a lis flabis de Russie. Oraris: sabide e domenie, 10-12.30 / 15.30-19; di lunis fin vinars, 10-12.30.

[LIBRIS]

Miercus ai 2 di Avrîl, la “Casa per l’Europa” di Glemone e presente il libri “Impariamo l’Europa” di Renato Damiani. La convigne e tacarà a 18, li dal municipi. Al presentarà e al cjacararà cul autôr Angelo Floramo.

[SALÛT]

“Progettoautismo”, joibe ai 3 di Avrîl, al organize une convigne par discori su “Sessualità e autismo: prospettive educative e bisogni speciali”. Lis voris a tacaran a 9, li dal municipi di Tavagnà, cui intervents di Simone Zorzi, di Giovanni Miselli, di Fabrizio Giorgeschi e di Carlo Zoratti.

[GLESIE FURLANE]

Te suage dal “An de Sperance”, la Glesie udinese e propon “Tre seradis di musiche e di spirt” dedicadis a la prejere dai Gjespui. I apontaments a colaran joibe ai 3, vinars ai 4 e sabide ai 5 di Avrîl, a 20.30 li de catedrâl di Udin. A saran proponudis composizions di Claudio Monteverdi (“Vespro della Beata Vergine”); di William Byrd (“Vespro anglicano”); e di Sergej Rachmaninov (“Grandi Vespri per la Veglia dell’intera notte”).

[CONVIGNIS]

Joibe ai 3 di Avrîl, il sotpresident dal Institût di storie sociâl e religjose di Gurize, Ferruccio Tassin, al cjacare li dal municipi di Rude, a 20, su “La grande guerra, aspetti della «liberazione» nella Contea di Gorizia e Gradisca”. Si fevelarà, in specialitât, di internaments, di nazionalisim e di sfas dal spirt di coabitazion. La convigne e jentre te schirie di apontaments “Storia della nostra gente 1914-1918”.

[CULTURE]

A saran i Cumons pordenonês di Cjavàs, di Fane e di Midun a inmaneâ, chest an, lis ceremoniis e lis iniziativis regjonâls pe “Fieste de Patrie dal Friûl”, dai 3 ai 6 di Avrîl. Il lunari dai apontaments si cjatilu su la rêt des rêts.

[LIBRIS]

Tal numar 106 de riviste “Studi goriziani”, e je publicade la tese di Massimiliano Verdini, discutude li de Universitât svuizare di Friburc, “J sacris Salms. Edizione del Salterio goriziano con comparazioni linguistiche e letterarie reto-friulane”. Il volum al ven presentât joibe ai 3 di Avrîl, a Gurize li dal municipi a 18. A organizin Biblioteche statâl e Institût ladin furlan.

[CINE]

I produtôrs dal documentari “Un paese di primule e caserme”, dedicât al abandon des sclavitûts militârs ch’a àn impestât par agns e agnorums la Patrie, ur domandin jutori a ducj chei ch’a vuelin prudelâ il proget. Cemût fâ e ce fins ch’al à l’iniziative al è sclarît tal lûc internet di pueste. Vie pai agns dal Sessante, in Friûl, 100 chilometris cuadrâts – tant a dî il 1,3% dal teritori regjonâl – a jerin scjafoiâts des sclavitûts militârs. Intant, altris 4 mil chilometris cuadrâts – miege regjon – a pativins consecuencis negativis di chê “invasion”.

[MOSTRIS]

Dai 4 di Avrîl ai 4 di Mai, li de glesie udinese di Sant Antoni, te place dal Patriarcjât, si podarà rimirâ la mostre “Arrigo Buttazzoni - l’arte come sogno e vita”, imbastide de Provincie di Udin. Le presentarà, a 18 di vinars ai 4, Giancarlo Pauletto. Arrigo Buttazzoni (San Denêl, 1947-Muruç, 2012) al à stât pitôr, grafic e dissegnadôr competent e preseât (www.friul.net/dizionario_biografico.php). Oraris: 10-12.30 / 16.30-19.

[CONVIGNIS]

Il ricercjadôr Valter Zucchiatti, vinars ai 4 di Avrîl, al siere la schirie di convignis sul anfiteatri morenic, cuntune lezion su “L’uomo delle Morene da nomade cacciatore-raccoglitore ad agricoltore stanziale e costruttore di villaggi”. A 20.45, li dal municipi di Feagne.