[CORS]

A son viertis fintremai ai 14 di Març lis inscrizions pal cors su la partecipazion inmaneât de clape “In itinere” (www.in-itinere.org). A saran proponûts 3 ’seminaris ai 20 di Març, il I di Avrîl e ai 8 di Avrîl (17-19.30), par profondî lis cuistions: “Una partecipazione consapevole. Perché e quando attivare un percorso partecipativo”, “Una partecipazione appropriata. Informazione, ascolto, gestione di conflitti, decisione, partenariato” e “Una partecipazione lungimirante. Costruire una comunità che sa dialogare e decidere”. L’ultin confront al sarà dedicât a “La qualità delle scelte pubbliche. Esperienze partecipative in Friuli-V. G. e in Italia”.

[AMBIENT]

Domenie ai 2 di Març, par cure de “Confederazione Mobilità Dolce” (“Co.Mo.Do.”), si celebre la “Giornata italiana delle Ferrovie Dimenticate”.

[SCUELE]

Il moviment politic “Popolari per l’Italia” al programe une convigne su la cuistion: “Per un sistema scolastico integrato a misura europea - Scuole paritarie e libertà di scelta educativa”. Al tacarà a 15 di sabide I di Març, li dal auditorium “Don Bosco” di Pordenon (viâl Michelangelo Grigoletti 3).

[CONVIGNIS]

La clape “el Tomât” di Buje, domenie ai 2 di Març, e invide Mah Aissata Fofana par presentâ la sô storie e siei libris. Une convigne e tacarà a 18, li de ostarie di Parùs a Saramont. Mah Aissata Fofana e je nassude a Bamako (Mali). In zornade di vuê, e vîf a Reane e si è indotorate a Triest. Si ocupe di inmigrazion feminîl, fasint di interprite, di tradutore e di mediatore culturâl. Fra i siei libris, “La cucina in Africa”, “Il linguaggio dei capelli in Africa” ed “I Sette Baobab della Felicità e del Successo”. E à publicât ancje “Vocabolario bambara-italiano”.

[SOCIETÂT]

La Fondazion di comunitât “Santo Stefano” e à butât fûr il regolament dai finanziaments pal 2014. A saran inviestîts 80 mil euros a pro des comunitâts dal Friûl concuardiês sot Vignesie (tai Cumons di Cjaurlis, Cint, Concuardie, Danon, Fossalte, Gruâr, Puart, Pramaiôr, San Micjêl, San Stin e Tei). Lis domandis par progets di promozion sociâl, di cognossince e di protezion dal patrimoni ambientâl e culturâl e di formazion sportive de zoventût a varan di jessi presentadis dentri dai 30 di Mai. L’ufici de Fondazion (te strade Zappetti 21F di Puart) al è vierzût par sclariments di lunis fin vinars (10-12.30).

[GLESIE FURLANE]

Lunis ai 3 di Març, i muinis de Glesie udinese si dan dongje pe samblee anuâl. L’apontament al començarà a 8.45 li de glesie dal Carmini di Udin, in Bordolee (strade Aquilee). A intervegnaran il president Maurizio Liani e l’assistent pre’ Arrigo Zucchiatti. Po a 11.30, e sarà cjantade la messe, pressedude di pre’ Marcin Gazzetta. Si finissarà a une cul gustâ.

[CONVIGNIS]

Li dal “Museu etnografic Regole d’Ampezzo” di Cortina, lunis ai 3 di Març, e sarà inmaneade une convigne su “Le Regole d’Ampezzo e la loro storia”. Al cjacararà su l’antighe propietât coletive di Anpezo, il secretari des Regulis, Stefano Lorenzi. La presentazion e tacarà a 17.30.

[SCUELE]

L’Universitât furlane, martars ai 25 di Fevrâr, e à screât i laboratoris informatics gnûfs pai siei students li de abitance gurizane di “Santa Chiara”.

[ECONOMIE]

Ai 7 di Març, e comence la seconde schirie di apontaments dal Cors par promotôrs dai distrets da l’Economie solidarie. E je un’iniziative dal Forum regjonâl pai Bens comuns e l’economie solidarie ch’e larà indevant fintremai ai 18 di Mai, cun apontaments ai 7 di Març (18-21), ai 29 di Març (9-13); e ai 11 di Avrîl (18-21), li dal Centri “Balducci” di Çuian; ai 3 di Mai (9-13) a San Marc di Merêt; e ai 17 e ai 18 di Mai di 11, de sabide a 13.30 de domenie a Tramonç Disot.

[POLITICHE]

Il Comitât pe riunificazion ministrative di San Micjêl cul Friûl al à domandât al Ministeri talian dai afârs internis che il referendum popolâr al sedi votât ai 25 di Mai, di chê strade des votazions europeanis. La gnove e je stade popolarizade de “Unione Comuni Italiani per Cambiare Regione”.