[SCUELE]

Al torne a partî il percors di educazion a la legalitât “Bisogno d’esserci”, destinât a la frutarie e a la zoventût dal mandament di Glemone. Lunis ai 2 di Decembar, al rivarà a Dartigne, Giovanni Impastato par contâ la storie e lis lotis di so fradi Peppino, il fondatôr di “Radio Aut”, sassinât de Mafie dal 1978. La sô testemoneance e sarà proponude li dal teatri “Monsignôr Gelindo Lavaroni” di Dartigne, a 20.15. Vie pes matinadis dai 2 e dai 3 di Decembar, Giovanni Impastato al incuintrarà i students di Glemone, li dal institût “D’Aronco”.

[CINE]

Il film di Andrea Segre “La prima neve”, ch’al conte la storie di un inmigrât african rivât su lis monts dai Mochens, al rive tai cines furlans di “CircuitoCinema”. Proiezions a Cormòns (Teatri comunâl) lunis ai 2 di Decembar; a San Denêl (Cine “Splendor”) martars ai 3 di Decembar; a Spilimberc (Cine “Miotto”) miercus ai 4 di Decembar; a Cjasarse (Teatri “Pasolini”) ai 6 di Decembar; e a Glemone (Cine “Sociale”) sabide ai 7 e domenie ai 8 di Decembar. Dutis lis proiezions a tachin a 21 (a Glemone, ancje a 19).

[CULTURE]

“Ladins dal Friûl”, tal numar dal mês di Decembar, cul articul “Mandi a Federico Tavan: poete cuintri” al onore «Il poete “eretic” dal Cjanâl da la Celine», muart ai 7 di Novembar. «“No poete ecessîf, Tavan, ma ecentric; sui ôrs, ma tal limit, e plui divergjent che diviers”, cussì juste apont lu veve definît Mario Turello par fânus capî che al jere une fra lis vôs plui altis e veris de poesie in lenghe furlane». Tavan al jere nassût in Andreis ai 5 di Novembar dal 1949. «Intai “Quaderni” dal Menocchio al à publicât: “Màcheri” (1984), “Lètera” (1984), “Cjant dai dalz” (1985), “La nâf spaziâl” (1985), “J’ sielc peràvalis” (1991). “Da màrches a madònes” (1994 / Biblioteca dell’immagine). “Amalârs 2001 KV”, “Cràceles cròceles” inmò cul Circul Culturâl Menocchio 1997- 2003».

[LIBRIS]

Ubaldo Muzzatti al à tirât dongje intun libri lis sôs esperiencis e lis sôs riflessions ingrumadis girant ator pal mont. L’opare e je intitulade: “La valigia di pelle – In viaggio al tempo della globalizzazione: osservazioni, incontri e confronti di un lavoratore italiano all’estero”. Par cjalâ e par comprâ il libri si pues visitâ il lûc internet: http://ilmiolibro.kataweb.it/schedalibro.asp?id=1038355.

[MOSTRIS]

La “Galleria Morettin Studio Arte” di Bordolee di Udin (via Aquileia 54), fintremai ai 28 di Decembar, e presente la mostre “Il colore nell’arte”, cu lis oparis de artiste Rosanna Morettin. Oraris, vinars e sabide, 10-12 / 17-19. Par apontaments: 340 6340195.

[SALÛT]

Di chê strade de “Zornade Onu dai derits pes personis cun disabilitât”, martars ai 3 di Decembar, si fasarà a Gurize la convigne su “Disabilità motoria. I nostri diritti, i nostri problemi”. E començarà a 10, li de Provincie (cors Italia 55).

[ECONOMIE]

Ducj i socis de clape “Etica-mente” di Tei si dan dongje, martars ai 3 di Decembar, par programâ la XII edizion de sô manifestazion anuâl e par votâ il president gnûf de socie. La riunion e tacarà a 20.45 li de sede di Tei.

[NAZIONS]

Il dissident rus Andrey Mironov, zornalist e presonîr politic, al cjacare a Triest, martars ai 3 di Decembar. Al à stât invidât di “Amnesty International”, “Gr 121” di Triest, in preparazion dal innovâl de “Declarazion universâl dai derits dal om”. Apontament a 17 li de Regjon (te place Oberdan 5), dulà che si resonarà su “La Russia di Putin”.

[AMBIENT]

La presidente de Regjon, Debora Serracchiani, e varès di promovi in consei regjonâl «una legge speciale per il ritorno alle originarie condizioni naturalistiche del più grande lago del Friuli V. G., quello di Cavazzo (o dei Tre Comuni)». Chest invît si pues firmâlu su la rêt des rêt, a la direzion: www.change.org/petitions/debora-serracchiani-presidente-della-regione-friuli-venezia-giulia-promuova-in-consiglio-regionale-una-legge-speciale-per-il-ritorno-alle-originarie-condizioni-naturalistiche-del-pi%C3%B9-grande-lago-del-friuli-v-g-quello-di-cavazzo-o-dei-tre-comuni-2. L’iniziative, inviade di Remo Brunetti, e je popolarizade ancje dal “blog” di Dalès “Alesso e dintorni”.

[ECONOMIE]

Il Cumon di Majan al propon une schirie di convignis par frontâ la cuistion dal lavôr, massime cu la zoventût. Ai 5 e ai 7 di Decembar, si resonarà sul lavôr tradizionâl e sun chel digitâl. Joibe a 20 li dal municipi, il titul al sarà “Ditedi - Giovani, imprese e futuro digitale”. Sabide ai 7, il confront al larà indevant di 9.30 a 13, li dal Ciscjel di Colorêt, par cognossi “Le reti d’impresa: un’opportunità da cogliere”.