[NAZIONS]

Dai 2 ai 6 di Lui, a Pordenon si pues cognossi l’Afriche dai Tuareg e di altris culturis. La clape “Via Montereale” e propon la manifestazion “Raccontare il deserto. Tinawen tenere”, li dal vieri covent di San Francesc.

[MUSICHE]

Il proget musicâl “Carro di Tespi”, ancje chest Istât, al puartarà l’opare su lis placis de Patrie. Il spetacul di chest an al è “Attila”, ambientât di Giuseppe Verdi in Aquilee. Il cartelon al proponarà chescj apontaments: Udin, ai 2 e ai 4 di Lui; Glemone, ai 9 di Lui; Tisane, ai 11 di Lui; Puart, ai 13 di Lui; Tumieç, ai 17 di Lui; Aquilee, dai 20 ai 22 di Lui; Cjaurlis, ai 6 di Avost (dutis lis seradis a tacaran a 21.15). La “tournée” e passarà ancje i confins regjonâi, tocjant Zare, te Crauazie (ai 25 di Lui); Clanfurt (ai 27 di Lui); Montecchio Maggiore (ai 3 di Avost); e Iesolo (ai 8 di Avost).

[LIBRIS]

La “Bottega errante” e lis Bibliotechis “Sebico”, martars ai 2 di Lui, a presentin il spetacul “Storie di uomini e di fiumi viaggiatori e viandanti lungo le sponde”. Protagoniscj de leture sceniche, li dal lagut “Le Telisse” di Barbean di Spilimberc, a saran Maurizio Mattiuzza, Mauro Daltin, Claudio Moretti (vôs), Renzo Stefanutti (musiche) e Simone Ciprian (tecniche). Biel tacant di 21, a saran proponudis bocons di oparis di Luciano Morandini, Amedeo Giacomini, Claudio Magris, Raymond Carver, Roberto Piumini, Erri De Luca, Paolo Rumiz, Elio Bartolini, Mark Twain, Konrad Lorenz, Stefano Benni.

[LIBRIS]

Vinars ai 5 di Lui, si presente a Tumieç l’opare “Giovani combattenti per la libertà. Renato Del Din, Ferdinando Tacoli, Giancarlo Marzona” di Fabio Verardo (“Gaspari”, 2013). Cul autôr, a 18.30 li de Biblioteche, e sarà presinte Paola Del Din. Il libri al presente la vite e lis azions dai 3 partesans de Osôf.

[NAZIONS]

Cuntune convigne su “Safari Jamboree 2013 - L’africa non è più la periferia della storia”, e tire adilunc la manifestazion su l’Afriche inmaneade a Udin de “Associazione Safari Word” cun “Fondazione Vicky Ebude” e “Time For Africa”. Apontament a 16.30 di vinars ai 5 di Lui, li dal parc “Ardito Desio”.

[CULTURE]

Ai 6 di Lui, al cole l’innovâl dal maçalizi di Çurçuvint, cuant che 5 alpins cjargnei a forin «decimâts» dai carbinîrs talians par insubordinazion. Di chê strade, li dal bosc di Museis, si fasarà une convigne par resonâ su “Fede e dolore”. Protagoniscj, a 20.30, pre’ Pierluigi Di Piazza e il primari dal ospedâl di Tumieç Vito Di Piazza. Massimo Somaglino, Riccardo Maranzana e Carlo Tolazzi a vierzaran la serade rapresentant bocons des oparis “I turcs tal Friul” di Pieri Pauli Pasolini” e “Cercivento” di Carlo Tolazzi.

[CONCORS]

E je començade la XXIII edizion dal Premi leterari pe narative furlane e pe poesie taliane “Le Pigne”, inmaneât dal Cumon di Scluse. Lis oparis ineditis a varan di rivâ li dal ufici protocol dentri dai 30 di Setembar. Par informazions: 0433 52030.

[ECONOMIE]

Cormòns al è il IV Cumon furlan ch’al à votât la deliberazion a pro de Economie solidarie, proponude dal “Forum regjonâl dai Bens comuns e da l’Economie solidarie”. Chei altris Cumons, a son Gurize, Romans di Gurize e Tramonç Disot. Il “Forum” al à prontât ancje un dissen di leç regjonâl ch’al vegnarà proponût in consei regjonâl cul jutori dai conseîrs plui cussients e impegnâts in chest camp.

[MOSTRIS]

Insin ai 24 di Lui, li dal Museu concuardiês di Puart, e restarà imbastide la mostre “libri di versi 5”, par cure di Silvia Lepore e di Sandro Pellarin. Oraris: 9-19; visitis guidadis, sabide e domenie, a 11 e a 17; laboratoris, domenie ai 21 di Lui, a 10 (par informazions: 349 3808384). A àn colaborât passe 40 artiscj fra visîfs e poets.

[MOSTRIS]

Vie pal Istât, si podarà visitâ la vile dal pugiladôr Primo Carnera (www.friul.net/dizionario_biografico.php), a Secuâls. E restarà vierte ogni sabide, fra 15 e 19, e domenie, 10-12 / 15-19. La vile e je une des celulis ecomuseâls dal Ecomuseu des Dolomitis furlanis “Lis Aganis” (www.ecomuseolisaganis.it/).