[SOCIETÂT]

Vincenzo Zoccano al è il president gnûf de Consulte regjonâl des associazions des personis pidimentadis. Al è stât votât par dâi la volte a Mario Brancati e al operarà dal 2013 al 2017. Al à 40 agn, al è sposât e al à doi fîs. Al è calcolât un dai plui grancj esperts di tecnologiis assistivis, di telecomunicazions e d’informatiche par personis pidimentadis. Al è vuarp e al è fra i autôrs dal “Libro bianco su accessibilità e mobilità urbana. Linee guida per gli Enti Locali” dal Ministeri dal lavôr e del welfare. Cun lui a colaboraran, tal coleç dai revisôrs dai conts, Mario Chiarandini, Elvio Sgrazzutti, Antonio Virgulin (efettîfs) e Pietro Falcon e Giuliano Edi Fuart (suplents).

[SOCIETÂT]

Ai 2 di Mai al cole l’innovâl dal maçalizi di Vasinis. Par chel, dopo de presentazion dal libri “Donne e ragazzi della Resistenza in Friuli” di Flavio Fabbroni e de leture sceniche rapresentade di Federica Vincenti e di Giorgio Cantoni, la ministrazion comunâl, joibe, e tire dongje la comunitât pe liturgje eucaristiche a 10.15, li dal centri sociâl, e par une comemorazion a 11.30, devant dal monument dai biâts martars dai 2 di Mai dal 1945. Al cjacararà il professôr de Universitât furlane Andrea Zannini.

[CORS]

Cu la scriture si pues ancje imparâ a cognossisi miôr e a pandi lis sôs potenzialitâts. Chest al sarà il fin dal laboratori ch’a proponaran la psicolighe e zornaliste Emanuela Masseria e l’educatore professionâl Alessandra Simonetti. Il cors al è inmaneât de clape “Vikara”. Lis lezions a colaran ai 9, ai 16 e ai 23 di Mai, a 20 li dal “K. C Bratuz” tal viâl 20 settembre di Gurize. Par informazions: 389 7907657.

[CINE]

Il Cine Sociâl di Glemone, joibe ai 2 di Mai, al propon il documentari “La rosa di Valentino”. La proiezion e començarà a 21 e, te sale, a saran sentâts ancje i protagoniscj dal cine, Eleonora e Valentino Fabiani, bogns di creâ a Dartigne un dai plui grancj zardins di garofui da l’Europe.

[CONVIGNIS]

Vinars ai 3 di Mai, il cors “Etica ed economia. Per un’economia intelligente, inclusiva e sostenibile” de Universitât furlane al propon une lezion su “La cultura del rispetto delle regole. Legalità e trasparenza contro la corruzione pubblica e la rendita privata”. A 14.30, li dal Dipartiment di siencis economichis (te strade Tomadini di Udin) al fevelarà Elio Borgonovi.

[AMBIENT]

Dai 3 ai 29 di Mai, a Pordenon, e torne cu la IV edizion “Terraè”, la rassegne su la sostenibilitât che, chest an, e varà par titul “Oltre il cemento”. Fra i siei colaboradôrs, la manifestazion e à “Wwf”, “Arpa”, “Compagnia degli Asinelli”, “AruotaLibera”, “Immaginario Scientifico”, “&co Energie Condivise”, “Modo” e “Legambiente”. Il program complet si cjatilu su la rêt des rêts.

[CONVIGNIS]

“Altri 50 anni di carbone? Ricadute su salute e territorio”: chel chi al è il titul de convigne inmaneade vinars ai 3 di Mai, a Monfalcon, dal Comitât gurizan “No Carbone”. A 20.30, li de sale “Circolo il Trullo” (strade Marco Polo 7) si discorarà, in specialitât, su l’aziende lombarde “A2A”, ch’e je parone de centrâl monfalconese e ch’e smire di rinovâle cuntun altri implant a cjarvon cu la istesse potence. A intervegnaran Matteo Gaddi (“Rivista Progetto Lavoro”) e Marijan Nabergoj, specialist di Pneumologie e di Medisine dal lavôr.

[GLESIE FURLANE]

Vinars ai 3 di Mai, e rive a Dolegnan la preiere itinerante inspirade da la Comunitât ecumeniche di Taizé (France). A 20.30, li de glesie, la serade e sarà animade de clape “Gruppo ’89”.

[LIBRIS]

A 15 di lunis ai 6 di Mai, cuntun invît speciâl pai fruts, si scree la Biblioteche dal Parc naturâl des Dolomitis furlanis. Il servizi culturâl al sarà ufiert a Cimolais. Dai 6 di Mai ai 27 di Jugn, al funzionarà cul orari: lunis-miercus, 14-17.

[MUSICHE]

La clape culturâl “Furclap”, martars ai 7 di Mai, e presente il proget “Art&Comunicazione”, a 21 li dal ambient udinês “Gnagne Sese”, te strade Marsala. Giovanni Floreani, Paolo Viezzi e Gianfranco Lugano a proponaran un conciert di “irish, balkan, traditional music”.