[SALÛT]

Ai 2 di Avrîl, e cole la “Zornade mondiâl sul autisim”, par tirâ l’atenzion suntune emergjence simpri plui grivie ch’e domande considerazion e risorsis, stant che un frut ogni 88, in zornade di vuê, al risulte colpît di chest mâl. In Furlanie, lis celebrazions a son inmaneadis di “Progettoautismofvg”. A 19.30, li de Cjase de contadinance sul cjiscjel di Udin, la fondazion e presentarà i siei progets e “Abc Videomodeling”.

[CONCORS]

E je tornade a partî la gnove edizion dal concors leterari “Poti Evrope. Svet, vpet med sanje in resnicnost / Stradis d’Europe. Un mont tra sium e realtat”, che il Cumon di Romans i dediche al inteletuâl e scritôr Celso Macor (www.friul.net/dizionario_biografico.php). A son stabilidis 3 sezions: narative adults, poesie adults, narative e poesie students. Lis oparis a varan di jessi consegnadis dentri dai 28 di Jugn.

[TEATRI]

La companie “Baraban”, miercus ai 3 di Avrîl, e propon il spetacul “Padre Turoldo: fede e poesia”. La rapresentazion e tacarà a 20.45 li dal “Teatri Bon” di Culugne.

[MUSICHE]

La Biblioteche Guarneriane di San Denel e fâs fieste pal innovâl de Patrie cuntune convigne-conciert, a 20.30 di miercus ai 3 di Avrîl. Il titul de serade al sarà: “Il cjant des pergamenis. La musiche dal Patriarcjât di Aquilee te Passio dai Sants Ermacure e Fortunât, dentri dal Breviarium Aquileiense de Biblioteche Guarneriane”.

[CULTURE]

Si clame “Aghe. Percorsi di approfondimento delle tradizioni popolari” la propueste di “Museu atîf” programade miercus ai 3 di Avrîl a Udin, li dal Museu etnografic dal Friûl, a 17.30 in borc di Greçan. L’iniziative e sarà imbastide de clape culturâl “Furclap” e dal “Comitato Parenti Ospiti I.g.a.”.

[CONVIGNIS]

Miercus ai 3 di Avrîl, il circul culturâl “Valussi” di Udin al invide il storic Cesare Scalon a presentâ une lezion su “Patrie dal Friûl e cussience di un’identitât: di Paolo Diacono a Pacifico Valussi”. La convigne e tacarà a 16, li dal centri culturâl “Paulin di Aquilee” in borc di Trep.

[CINE]

La rassegne cinematografiche de Vierte “Sguardi diversi” e tire adilunc a Tumieç cu la proiezion dal cine “Ti do i miei occhi” di Icíar Bollaír. Al sarà programât a 20.30 di miercus ai 3 di Avrîl, li dal Museu “Gortani”.

[MOSTRIS]

La Pro Loco di Colorêt di Prât, miercus ai 3 di Avrîl, e scree la mostre fotografiche “Terra dipinta di storie” di Albano Quaiattini di Pasian di Prât (1930-2011). E restarà imbastide insin ai 21 di Avrîl, tal prin plan dai ambients di strade Asilo 9. Apontament a 18 pe presentazion. Oraris: sabide e domenie, 10-12.30 / 16-18.30.

[POLITICHE]

Il Cumon di Cint e il Fogolâr furlan dal Friûl concuardiês “Antonio Panciera”, miercus ai 3 di Avrîl, la dì dal innovâl de Patrie (1077-2013), a presentin il volum “L’Europa delle Regioni territorio di cerniera o di confine? Opportunità e problematiche per il Portogruarese”. La convigne, cui intervents di Renato Querini, Gianluca Falcomer, Marzio Strassoldo e Guglielmo Cevolin, e tacarà a 20.30 li de Biblioteche. A saran presints i autôrs Erika Cristante, Marco Milan, Marzio Strassoldo e Lauro Nicodemo.

[CORS]

L’Institût comprensîf di Puart e il Circul Livence-Tiliment dal “Moviment Legre Diminuzion”, miercus ai 3 di Avrîl, a organizin la convigne “A scuola nell’orto”. A 20.30 li de scuele “Gianni Rodari”, si fevelarà di “Permacultura”, su “Il perché e il come di un ortosinergico a scuola” e su “L’orto solidale”. A intervegnaran Stefano Soldati, Matteo Civiero e Valentino Zanon. Te prime serade si fasarà la teorie; tun secont apontament, programât sabide ai 27 di Avrîl, si tacarà la pratiche a 9 di buinore.