[TEATRI]

Fabiano Fantini, Sebastiano Zorzi, Daniel Samba e Luigina Tusini a son i protagoniscj dal spetacul “Il sium di une Patrie” dedicât ai ultin dîs di pre’ Checo Placerean (www.friul.net/dizionario_biografico.php). Il spetacul al ven replicât sabide ai 2 di Març, li dal teatri “Plinio Clabassi” di Sedean.

[INFORMAZION]

Tal lûc internet dal grop “Historia” di Pordenon, si pues scoltâ la prime edizion dal “Reseau mondial des Droits collectifs du peuples”. La seconde edizion de convigne e je programade te Vierte e tal Istât dal 2013 a Brussel.

[MOSTRIS]

La Galarie “Studio d’arte Tarozzi” e torne a començâ la sô ativitât cu la mostre “Epifania”. E sarà screade sabide ai 2 di Març, a 18, te sale di strade Rovereto 3 a Pordenon.

[POLITICHE]

Tai bancs dal gnûf parlament talian al sentarà ancje un puartevôs de Diaspore furlane. Il miedi Mario Borghese dal circul “Alef” di Córdoba Capital al è stât votât dome deputât. Al à 32 agn e l’Alef di Argjentine al à saludât la sô elezion cun «mucha alegría y orgullo». «Forza Mario! – al à comentât il so circul – Italia y Argentina necesitan jóvenes como vos».

[MOSTRIS]

La clape culturâl “Porto dei Benandanti” e propon, li de sô abitance di Puart (plaçute Sant’Andrea 2), la mostre fotografiche “Dieci emozioni” par cure di Rap.G. E restarà vierte par dôs setemanis, vinars, sabide e domenie, fintremai ai 10 di Març, di 17 fin 19.

[SOCIETÂT]

Lunis ai 4 di Març, lis clapis amiis e associadis cu la federazion dal “MoVi” (Moviment di volontariât talian) si dan dongje a Udin pe samblee regjonâl. E tacarà a 19, li de Cjase Inmacolade (strade Chisimaio). Si resonarà sui ultins 4 agn di ativitât e sui impegns pal avignî e si fasarà ancje un confront cul “MoVi” de Calabrie.

[POLITICHE]

Ancje la vile cjadorine di Plêf/Pieve di Cadore e votarà un referendum pa mudâ i confins regjonâi e par domandâ di tornâ a jessi unît sot di une sole ministrazion regjonâl cul Friûl. La votazion e je stade stabilide dal guvier di Rome pai 21 e pai 22 di Avrîl. Cun dut il rest dal Cjadovri, Plêf al è restât unît cu la Patrie dal Friûl dal 1077 al 1846.

[LIBRIS]

Bibliotecaris, venditôrs di libris, insegnants e letôrs volontaris, lunis ai 4 di Març, si dan dongje a Udin pe zornade di formazion “+ leggi + cresci”. La convigne e tacarà a 15, li dal palaç de Regjon, te strade Sabbadini. In chê dì, al tache a Udin ancje il “Festival della Letteratura bambina”, inmaneât de sezion regjonâl de Associazion bibliotechis e de cooperative “Damatrà”.

[POLITICHE]

Fabio Ratto Trabucco, consulent juridic dai autonomiscj di ogni bande d’Italie impegnâts te revision dai confins ministratîfs, al à publicât il volum “L’accesso degli enti locali alla giustizia costituzionale a tutela dell’autonomia. I casi italiano e spagnolo a confronto”. Il studi al sosten che l’Italie no podarà mai altri deventâ une Republiche da lis autonomiis se nol sarà realizât il derit dal ricors jurisdizionâl devant de Cort constituzionâl par garantî il rispiet dai principis di autonomie locâl.

[ART]

Martars ai 5 di Març, al ven screât a Cas il proget di Stefano Cagol “La Fine del Confine / The End of The Border: the Start” (www.stefanocagol.com). L’artist al proietarà une sdrasse di lûs di 15 chilometris prin su la dighe dal Vajont e po su la Tofana di Rozes, a Cortine, dulà ch’al larà tal indoman a 18.30. Il proget al è prudelât dal Museu d’art moderne “Mario Rimoldi” (www.musei.regole.it) e al jentre te schirie di manifestazions “Dolomiti Contemporanee”. Stefano Cagol al començarà in Friûl un viaç cu la sô art luminose che lu puartarà fintremai a Kirkenes, sul circul polâr artic, dulà ch’al cjaparà part a la Trienâl di Barents.