[SOCIETÂT]

Servizi sociâl e “Area Materno Infantile” de Aziende pai servizis sanitaris dal Friûl Disore, te suage dal impen par promovi il biel acet dai fruts ancje mediant dal “Affido familiare”, a organizin une convigne a Tumieç cu la clape “Famiglie per l’Accoglienza” di Udin. A 18 di miercus ai 5 di Decembar, li di palaç Frisacco, e cjacararà Angela Arcicasa e po al sarà proietât il videu “La mia casa è la tua casa”.

[MUSICHE]

La “Missa Ducalis” di Jacopo Tomadini (www.friul.net/dizionario_biografico.php) e vegnarà proponude de Provincie di Udin in 3 doms de Patrie. La prime esecuzion e je stabilide li de catedrâl di Udin, miercus ai 5 di Decembar a 20.45. Chei altris doi apontaments a colaran te stesse ore, joibe ai 6 di Decembar, a Spilimberc e, vinars ai 7, li dal dom di Glemone.

[CINE]

Ai 31 di Genâr a saran juste 50 agn de prime proiezion, a Udin, dal cine di fra’ David Maria Turoldo e di Vito Pandolfi “Gli ultimi” (1963), dedicât a la vite contadine dal Friûl dai agns dal Trente. Di chê strade, joibe ai 6 di Decembar, si presente te capitâl furlane un “dvd” dopli curât di “Cineteca del Friuli”, “Centro Espressioni Cinematografiche” e “Cinemazero” cul film ristaurât te version originâl e cun altris materiâi documentaris. Par chel, e ven inmaneade une serade a 20, li dal cine “Visionario”. Tal “booklet”, ancje i coments di Giuseppe Ungaretti, di Pier Paolo Pasolini e di Andrea Zanzotto.

[DIASPORE]

Il Fogolâr di Turin si prepare pes fìestis di Nadâl cuntun dopomisdì, intitulât “Canti di Natale”, te sô biblioteche di Corso Francia 275 b. Joibe ai 6 di Decembar, a 16 si podarà viodi ancje une part dal cine di Christiane Rorato “La rosade dal timp. I cjantôrs di Çurçuvint” e si podarà rimirâ i libris di musiche. I furlans di Turin a tornaran a dâsi dongje domenie ai 16 di Decembar pe Messe di Nadâl cjantade par furlan, a 9.45, di pre’ Ermis Segatti.

[AMBIENT]

Il “Circolo Speleologico e Idrologico Friulano” e il “Museo Friulano di Storia Naturale”, joibe ai 6 di Decembar, a presentin i scandais fats te zone di Tischlbong/Tamau. Da lis ricercjis a cjacararan, a 18 li de sale Ajace dal municipi di Udin, Franco Cucchi, Andrea Mocchiutti e Giuseppe Muscio.

[CULTURE]

La Glesie di Udin, vinars ai 7 di Decembar, e presente i aventaris des oparis d’art e dai archîfs parochiâi. L’archivazion e la preparazion dai 2 “dvd” ch’a proferissin la vore a son stadis curadis dal Ufici pai bens culturâi e dal Institût di storie de Glesie furlane “Pio Paschini”.

[ART]

Vinars ai 7 di Decembar, e je programade a Tumieç la serade “Michelangelo - Memoria, intelletto, volontà”. L’animadôr de convigne, a 18 li di palaç Frisacco, al sarà Pasquale Gianfagna.

[MUSICHE]

Te suage de rassegne “Nativitas”, vinars ai 7 di Decembar, “Piccolo coro” e “Polifonica friulana Jacopo Tomadini” a presentin il conciert “Venite, venite”, compagnâts dal organist Marco Rossi. La serade e tacarà a 21, li dal santuari di Madone di Rose, a San Vît dal Tiliment.

[MOSTRIS]

Li dal cjiscjel di Colorêt, vinars ai 7 di Decembar, si scree la rassegne d’art e di poesie “L’idea e la forma - Gli manca solo la parola”. Daspò de scree, a 18, la mostre e restarà imbastide di 15 a 19 tes zornadis dai 9, dai 15, dai 16, dai 22, dai 23, dai 29 e dai 30 di Decembar, e po ai 5 e ai 6 di Genâr.

[AMBIENT]

Al è finît come ch’al jere començât, 2 agn indaûr, il “Procès partecipatîf” proponût de Regjon par prontâ il Plan di gestion des areis “Natura 2000” su lis Alps cjargnelis: la cuistion vere e decisive no je stade disbratade nancje intant de convigne dai 7 di Decembar, fate a Tumieç par discori su “Rete Natura 2000 e sviluppo del territorio montano quali opportunità”. Nissun nol sa, difat, a di cui che i tocjarà la gestion; tant a dî che la ministrazion regjonâl e smire di tignîse par se, controlant i finanziaments europeans ch’a podaressin rivâ dongje. Paraltri la politiche no somee afat tocjade dal problem, stant che a Tumieç no si è presentât l’assessôr regjonâl competent Claudio Violino e nancje i sindics dai Cumons tocjâts de rêt naturalistiche europeane (For di Voltri, Rigulât, Ravasclêt, Paluce, Liussûl, Paulâr e Pontebe).