[AMBIENT]

Dentri dal 2013, il Consorsi di bonifiche “Ledra Tagliamento” al fasarà une centralute idroeletriche te strade Castelfidardo di Udin, valorizant l’aghe de roe. Di chê strade, e je partide la colaborazion cul Cumon di Udin par progetâ altris dôs centralutis, tes stradis Largo delle Grazie e Volontari della Libertà, se la Soreintindince pai bens artistics e garantissarà lis permissions necessariis. I progets a jentrin tal Plan energetic comunâl ch’al smire di ridusi i gâs sidrere dal 20% dentri dal 2020, cemût ch’a domandin i compatâts europeans.

[ECONOMIE]

La societât “Saf autoservizi” e à cjapât il premi talian “Smart Move” pai servizis di transpuart public locâl, seont il criteri de mobilitât sostenibil. Il premi al jentre tal proget internazionâl “Smart Move /Iru” finalizât pal miorament dal ambient e dai “standard” di sigurece stradâl. Il 90% dai bus citadins di “Saf” a van cul metan e passe 100 corieris des liniis extraurbanis a jentrin te clas “Eev”.

[ECONOMIE]

Lunis ai 2 di Lui, a Lucinîs di Gurize, a 20.30 li dal Centri civic, si resone su la legre diminuzion. La clape “Acqua Gorizia” e propon une convigne su “Verso la Conferenza Internazionale sulla Decrescita - Venezia 2012 per uno sviluppo sostenibile”.

[MOSTRIS]

Lunis ai 2 di Lui, si scree a Lignan la mostre “Alois Beer, Paul Scheuermeier, Ugo Pellis. Istria tra ’800 e ’900”, ch’e jentre tai programs culturâi di “Spilimbergo Fotografia” 2012. Inaugurazion a 17.30, li dal centri civic “Sandro Pertini”, par cure dal “Craf”.

[ECONOMIE]

Ogni domenie dal an, al numar 35 di strade Bini, e vierç la “Buteghe dal mont” di Glemone, dulà che si pues comprâ i prodots dal cumierç just e solidari. La buteghe e je vierte di 10 a misdì e po di 15 a 19.

[TEATRI]

Lunis ai 2 di Lui, la companie Carlo Pastori e Marta Martinelli e propon a Bibion il spetacul teatrâl “Lazzaro, vieni dentro”, vincidôr dal festival “I teatri del sacro” 2011. Il teatri al tacarà a 21.15, li dai ambients de Parochie.

[MOSTRIS]

Il Museu diocesan di Udin, di chê strade de convigne “Chiese del 2000. La ricostruzione del Friuli nella stagione post conciliare”, al à imbastît la mostre “Giacomo Della Mea architettura sacra 1948-1968”. Ufici diocesan pai Bens culturâi e Ordin dai architets udinês, cu l’esposizion, a smirin di valorizâ l’opare dal architet di Racolane (1907-1968), ch’al à savût antecipâ il rinovament de architeture gleseastiche. Oraris: miercus-domenie, 10-13 / 15-18, fintremai ai 29 di Lui.

[MOSTRIS]

Il Museu cjargnel des arts popolârs al presente la mostre “Fruts. Bambini di una volta”. E restarà imbastide insin ai 30 di Setembar. Ducj i dîs de setemane (gjavâts i lunis dai mês di Jugn, di Lui e di Setembar), 9-13 / 15-18. Di chê strade a saran inmaneadis convignis e ativitâts, ai 3 di Lui (laboratori a 15 su mascaris e liendis); ai 31 di Lui (zûcs par fruts a 15); ai 21 di Avost (leturis a 16) e ai 4 di Setembar (laboratori par imparâ a fâ zûcs in cjase a 15).

[MOSTRIS]

La mostre “Alois Beer - Paul Scheuermeier - Ugo Pellis. Istria tra ’800 e ’900”, imbastide dal “Craf” a Lignan cul jutori dal Museu civic de vile cravuate di Rovinj/Rovigno, e restarà vierte li de Biblioteche fintremai ai 15 di Avost. Oraris: lunis-vinars, 14.30-19.

[GLESIE FURLANE]

La Glesie di Gurize e à un vescul gnûf. Par dâi la volte a monsignôr Dino De Antoni (classe 1936) al è stât nomenât monsignôr Carlo Roberto Maria Radaelli, vicjari gjenerâl de Glesie di Milan. La gnove e je rivade di Rome ai 29 di Jugn. Il gnûf arcivescul al è nassût dal 1956, predi dal 1980, al è indotorât tal derit cjaluni. Dal 2004 al è stât ordenât vescul, deventant ausiliâr dal gardenâl Dionigi Tettamanzi. Al è ancje president dal consei “Cei” pai afârs juridics.