[AMBIENT]

La manifestazion ambientaliste “TerraÈ” e devente regjonâl, proponint ator pal Friûl l’apontament “Sporchi da morire - Il viaggio nel mondo delle nano-particelle e delle polveri sottili”. Lis convignis a saran proponudis a 21, ai 2 di Mai, li dal “Teatro Benois De Cecco” di Codroip e li dal “Cinema Manzoni” di Manià; ai 3 di Mai, li dal “Ridotto del Teatro Verdi” di Pordenon; e ai 11 di Mai, li dal “Auditorium Menossi” di San Svualt di Udin.

[CINE]

Vie pal mês di Mai, il cine “Carnia 1944. Un’estate di libertà”, dedicât ai fats de Republiche partesane cjargnele e dal Friûl ocidentâl dal regissêr Marco Rossitti cul “CinemaTeatroEden”, al ven proietât joibe ai 2 a Udin, a 20.30 e a 22 (Cinema Visionario); vinars ai 4 a Dartigne (a 21, li dal teatri); sabide ai 5 a Ruvigne (Teatro Canciani); e joibe ai 10 a Glemone (a 21, Cinema sociale).

[MOSTRIS]

Dai 2 ai 18 di Mai, li dal palaç de Regjon a Rome (place Colonna 355), a saran esponudis lis oparis dal artist Mario Micossi. L’inaugurazion e cole a 17 di miercus ai 2 di Mai.

[TEATRI]

Tal lûc internet de companie “Anà-ThemaTeatro”, si pues burî fûr il regolament pe selezion pal VI “Campus teatrale internazionale Progetto Shakespeare”. Lis lezions a saran proponudis par 3 setemanis, vie pal mês di Lui, li de “Cjase di Catine” di Vilalte di Feagne.

[SALÛT]

Vinars ai 4 di Mai, si dan dongje a Tei, parsore dal ambient “Le Majorettes”, in place, i organizadôrs di “Etica-mente 2012”. Si continuarà a lavorâ par prontâ la X edizion de manifestazion, ch’e tocjarà Tei, Puart, Concuardie e Fossalte, dai 5 ai 10 di Jugn, frontant la cuistion “Il corpo sequestrato. Il diritto alla salute, la politica, l’economia, la dignità”. La riunion e tacarà a 21. La presentazion uficiâl di “Etica-mente 2012” e je stabilide pai 15 di Mai, a 11 li dal municipi di Puart.

[AMBIENT]

Il circul “Greengang” di “Legambiente”, ch’al opere tal Mandament di Monfalcon, vinars ai 4 di Mai, al organize une convigne par discori di “diagnosi energetica, certificazioni e riqualificazione degli edifici”. Si tacarà a 20.30 li dal Municipi di Roncjis di Monfalcon, dulà ch’a saran presentadis lis termografiis fatis sui edificis publics dal Cumon.

[DIASPORE]

Il “Dopomisdì in biblioteche” di vinars ai 4 di Mai, al sarà dedicât dal Fogolâr di Turin a la cuistion “Il Friuli. Una Patria”. A 16.30 li dai uficis di Corso Francia, si podarà visitâ la mostre inmaneade de Provincie di Udin e puartade in Piemont cul jutori di “Friuli nel Mondo”. Di chê strade, si resonarà ancje sui furlans ch’a àn fat l’Europe, mediant de sô emigrazion in France, Austrie, Svuizare, Belgiche e Russie.

[MOSTRIS]

La Fondazion “Palazzo Coronini Cronberg”, li de viere cjase gurizane tal viâl 20 Settembre, e propon la mostre “«Delle mie gioie ed oggetti d’oro…» Le mode e gli affetti nei gioielli dei Conti Coronini Cronberg di Gorizia”. E restarà imbastide fintremai ai 2 di Setembar.

[SOCIETÂT]

“La Viarte” di Sante Marie, sabide ai 5 di Mai, e organize la convigne “Custodire ciò che cresce. Le pratiche educative della comunità per minori La Viarte”. E tacarà a 9, li de sede de clape te strade Zompicco 42.

[CULTURE]

Vie pal mês di Mai, Palaçûl al celebre mil e 250 agn di storie. Di chê strade e je stade inmaneade la manifestazion “Palazzolo del...”. Si tache ai 5 di Mai a 18, li des scuelis vieris, cu la presentazion dal libri “Le origini di Palazzolo” di Giuliano Bini; po a saran screadis lis mostris “Palazzolo del… Nel 1250° anniversario della prima documentazione di Palazzolo e Marianis”, imbastidis fintremai ai 13 di Mai.