[GLESIE FURLANE]

Il Prindalan, al è muart a l’improvise monsignôr Alfredo Battisti (www.friul.net/dizionario_biografico.php). Al jere stât arcivescul di Udin dal 1973 al 2000, guidant la Glesie furlane tai agns strussiâts dal taramot dal 1976 e de riconstruzion. Nassût a Masi di Padue ai 17 di Genâr dal 1925, al jere deventât predi dal 1956. Consacrât vescul te catedrâl di Udin ai 25 di Fevrâr dal 1973, al à operât pe aplicazion dal Concei Vatican II in Friûl, inmaneant la Samblee dai cristians pe riconstruzion dal Friûl, realizant la Sinode diocesane, predicjant la pâs e pratindint rispiet e cussience pe identitât dal popul furlan. Si è batût ancje cun determinazion pe instituzion de Universitât furlane, seondant lis lotis dal Comitât popolâr dal professôr Tarcisio Petracco.

[CINE]

Martars ai 3 di Genâr, i furlans di France a podaran viodi par television il film di Christiane Rorato (www.friul.net/dizionario/biografico.php) “La rosade dal timp. I cjantôrs di Çurçuvint”, dedicât a l’“Onoranda compagnia dei Cantori” de Plêf cjargnele di San Martin. Il documentari al sarà proietât a 18.40 de emitente “Kto” da la cjadene “Tnt”, ch’e transmet ancje par internet.

[GLESIE FURLANE]

Lis esecuiis di monsignôr Alfredo Battisti a saran celebradis miercus ai 4 di Genâr, a 15.30 te catedrâl di Udin. Al cjantarà messe il president de Conference episcopâl dal Nordest, il vescul di Gurize Dino De Antoni. Martars ai 3 di Genâr, la Glesie furlane si darà dongje par une vegle a 19, li de catedrâl. Il cuarp dal arcivescul ch’al à guidât la Glesie di Udin dal 1973 al 2000, al sarà veglât in dom di 9 di matine fin 20 e po ancje miercus ai 4 di Genâr, di 7 fin 15. L’ultin salût al “Vescul de riconstruzion” al sarà marcât dal sun des cjampanis di dutis lis Glesiis parochiâls la dì dal funerâl, a misdì. Il Rosari di martars e la messe di miercus a saran transmetudis in direte di “Radio Spazio 103”.

[MOSTRIS]

Si podarà visitâ insin ai 8 di Genâr, li de “Buteghe dal timp” di Pesariis, la mostre dal “Wwf” sui flums talians e su la prevenzion dal dissest idrogeologic “Liberafiumi”. L’esposizion e je imbastide cu la colaborazion de Ministrazion frazionâl di Pesariis e dal Coordenament regjonâl de Propietât coletive. Oraris: (10.30-12.30 / 14-18).

[DIASPORE]

Al è tornât ancje chest an il lunari de “Clape Friûl dal Mont”, cun dutis lis lunis dal 2012, colms, cuarts e lunis gnovis. La Clape e opere cul fin di dâ dongje e di judâ i emigrants ripatriâts.

[DIASPORE]

Dai 5 di Genâr ai 4 di Fevrâr, si podarà visitâ li di vile Dora di San Zorç di Noiâr la mostre “In viaggio”, cun inmaginis e peraulis dal mont de emigrazion furlane, cuntune cjalade speciâl su l’emigrazion de Basse. L’esposizion e je curade dal Dipartiment di siencis umanis de Universitât furlane, dal Servizi regjonâl pai furlans e pai julians pal mont e dal Centri di catalogazion di Vile Manin, cui matereâi dal “Archivio multimediale della memoria dell’emigrazione regionale”. La mostre e sarà screade joibe ai 5 di Genâr a 17, li de Biblioteche di San Zorç, cu la proiezion dal documentari “Fuochi friulani nell’Agro Pontino” di Stefano Morandini. Oraris: di martars fin vinars, 15-18, e sabide, 10-13.

[MUSICHE]

La vilie di Pasche Tafanie, ai 5 di Genâr, la filarmoniche “La Prime lûs 1812” di Bertiûl e scree, cuntun grant conciert, lis fiestis pal so bicentenari. Il spetacul “200 anni tra tradizione e innovazione” al tacarà a 20.45. li dal auditorium, direzût di Chiara Vidoni e di Manuela Vignando.

[TEATRI]

Roberto Pagura e Gianni Fassetta de companie “Molino Rosenkranz” ur daran ad imprest la sô vôs e la sô musiche a Nievo, Zanzotto e Pasolini, intant dal spetacul “Riflessi a fior d’Acqua”. La rapresentazion, cun proiezions di inmaginis de Valceline, e tacarà a 16 dai 6 di Genâr, in Andreis.

[MUSICHE]

Arno Barzan e Ludovica Burtone a tornin a sunâ e a cjantâ insiemit la dì di Pasche Tafanie, ai 6 di Genâr. Il lôr conciert al tacarà a 21.30 li dal “Caffè Caucigh” di Udin, tal borc di Glemone. I doi musiciscj a proponaran ancje cualchidun dai bocons ch’a son daûr a registrâ a Valarian pal lôr prin cd.

[TEATRI]

“Ortoteatro”, la dì di Pasche Tafanie, ai 6 di Genâr, al scree l’anade dal “Auditorium Concordia” di Pordenon cul spetacul “La pulce mingherlina e il berretto del folletto”, a 17.